Ioe le avepasi Moe Ioapo moliaga fasioti tagata paivalea

O le moliaga o le fasioti tagata paivalea ua molia ai le alii ave taavale o le pasi lea na tafea i Lano i Savaii i nai masina e lei mamao tele atu ma manunu‘a ai le toatele o le pasese ae maliliu nisi, ma o le faamasinoga maualuga i Apia na tulai ai le alii avepasi e tali i le moliaga.

O se tasi lea o faalavelve tau taavale ua amata faaaogā ai e leoleo teuteuga fou o soligatulafono ogaoga e molia ai se ave taavale, ma ua lē faaaogāina ai moliaga e pei o le ave taavale faatamala ua mafua ai ona oo le maliu i se tasi poo nisi poo le ave taavale matautia ua mafua ai le maliu.

O lea ua sosolo nei aiaiga o le tulafono fou i tulafono i isi atunuu e pei o Niu Sila lea e molia se ave taavale i le fasioti tagata faamoemoeina poo le fasioti tagata paivalea pe a aafia i se faalavelave tau taavale e maumau le soifua pe aafia ai foi le soifua saogalemu o tagata.

Ua nofo faatalitali nei le alii o Moe Ioapo o Fagaee ma Vaitele fou, i le aso o le a aumai ai se faaiuga a le faamasinoga mo ia, ina ua ioe i moliaga e lua o le fasioti tagata paivalea e mafua mai lea foi faalavelave matautia na tafea ai le pasi a le Itu o tane i Savaii ina ua taumafai lē ua molia e sopoia se alasima maualalo i le nuu o Lano ae tafea ai loa le taavale ma maliliu ai ni fanau teine se toalua o le isi e 5 a o le isi e 12 tausaga le matutua.

Sa molia muamua Moe i le ave taavale matautia na mafua ai le maliu ma manunu‘a ni tagata o le pasese a le pasi sa ia faafoeina, peitai na toe faaui i tua e leoleo lea moliaga ae suia i le moliaga o le fasioti tagata paivale le manslaughter. O le masina o Iulai o le tausaga nei na tulai mai ai lea faalavelave tau taavale ma o ata o le faalavelave lenei na tapue e nisi ia latou telefoni aemaise ni tagata tafafao mai fafo sa iai tonu i le taimi o le faalavelave ona faasalalau lea i luga o fesootaiga televavave faaonapo nei e pei o le Youtube.
O le aso 12 o le masina fou o Novema e lau ai se faaiuga o Moe Ioapo.

Le alii avepasi o Moe Ioapo