Na molia se tamā o le nuu o Tufulele i le fasioti tagata pa‘ivalea ona o le maliu o lona afafine tausi poo le stepdaughter e iai ona manaoga faapitoa, ma sa teena ai e lea tamā o Siatua Apulu Ini, 46 tausaga le matua le moliaga a leoleo.
Peitai ina ua tulai i le amataga o lenei vaiaso mo le suesueina o le solitulafono na suia ai lana tetee i lona ioeina o le moliaga.
O le moliaga lea na muamua molia ai le tamā, ae na toe faaopoopo e leoleo isi moliaga e lua, o le lē faia o lona tiute faamatua i le tausiga o le teineitiiti, atoa ai ma le moliaga o le faaoolima.
Peitai ina ua tulai lē ua molia mo le valaauina o molimau a leoleo na faateia lana loia ma le faamasinoga i le suia o lana tetee i le ioe, ma o le mafuaaga lea na faitau ai moliaga taitasi ae na tumau lava le ioe.
Ua faaui ai loa i tua e leoleo moliaga faaopoopo e lua ae totoe ai le moliaga o le fasioti tagata pa‘ivalea ua faamauina ai lana ioega i le faia o lea solitulafono. O tolaulauga a leoleo ina ua faatoa valaau le mataupu na ta‘ua ai, sa faaoolima lē ua molia i le afafine, o le mafuaaga lea na palasi ai i fafo mai se nofoa sa nofo ai ma aafia ai loa i ni manu‘a tuga.
Peitai o le faamatalaga a lē ua molia i leoleo na ia ta‘ua ai na palasi lava lona afafine i lalo ae o le taimi lea o loo i fafo o le fale o loo ao mai le tagamea ona ua timu.
O le aso 5 o le masina fou o Mati, e lau ai se faaiuga mo Siatua Apulu Ini.
