“E moomia le toe vaai lelei i le atoaga o nei fesoasoani ae e lē fesiligia le manaomia,” Patele Penitito Mauga
O loo tālia pea se suesuega o loo feagai nei ma se komiti faapitoa a le Ekalesia Katoliko i Samoa e faatatau i le faatautaiga o nofoaga o sulufaiga ua fesoasoani ai le Ekalesia i soo se tagata puapuagatia i Samoa.
O le komiti lenei na tofia ina ua laga se mataupu na tulai mai i le amataga o le tausaga i le lotoā i Moamoa, lea ua iai le Fia Ola Clinic i le fale ua ta‘ua o le Toaimanu.
O le lotoā lea o loo iai ma se isi nofoaga o sulufaiga e faatautaia e se ituaiga o le Ekalesia e faaigoaina o le Mother of Mercy.
O se nofoaga ua avea ma aiga o le toatele o tagata matutua, mātele lava i alii ua leai ni nofoaga e faamautu ma nonofo ai ma sa tele ina nonofo solo i le taulaga o Apia.
O le toatele o nei tagata o nisi foi sa tuli faasalaga faafalepuipui ae na talia lava ona o le manatu o le ekalesia e tatau ona ofo atu le alofa ma le agalelei e tausia ai ia sui o le atunuu.
O le see atu o le vaega sa faatautaia ma vaaia le Fia Ola Clinic, na o la vaaia atoa ai loa ma nei nofoaga.
O le masina la na tea nei lea na faamalolo ai mo se vaitaimi le Faatonu o le Fia Ola Clinic ina ua lagalagā mai ni lipoti o le tulai mai ai o ni faafitauli ua aafia ai nisi o fanau sa i lea nofoaga i ni sauaga matagā.
O le mau a le sooupu o le Ekalesia Katoliko na manatu e tatau lava ona muamua faasa‘o o le itu lenei, “Ua tele lipoti ua alu i luga o lomiga o nusipepa, e lē gata i lea o faasalalauga i leitio ma televise ma ua faamauina ai ua faatea le Faatonu o le Fia Ola Clinic.
E leai e lei faateaina le Afioga i le Tiakono ae o le faasee ese mo lenei taimi ona o loo fai suesuega i nofoaga nei, ae o le vaai a le Ekalesia na mafua ai ona faia lea faaiuga ona o le itu lenei, o i laua ua ave i ai le faatuatuaga o le Ekalesia e vaaia nei nofoaga, ma na faamautu lava ona ua see i totonu o le lotoā ma faapea ona iai ma le faalagolago ma le faamoemoega lea o le ekalesia – e pei lava o soo se faalapotopotoga e tulai mai ai ni mataupu faapenei e palasi lava ia i latou e taitaia ma faauluulu i ai nei ituaiga nofoaga, le mamafa ma tuuaiga o soo se faafitauli e tulai mai ai.
“E lē o tuuaia le Afioga i le Faatonu o le Fia Ola Clinic i ni sese ona o le manatu na ia faia ni faiga e ono lepeti ai lona tofiga i le vaaiga o nei ofisa poo ona tofiga faalelotu, e leai, e mafua lava le faaiuga na faia ona o le manatu o ia sa vaaia nei nofoaga.
“O le taimi foi la lenei e lei mae‘a suesuega ae e foliga mai o loo tele lava le lavelave o lenei mataupu ma seiloga ua mae‘a suesuega ona mafai loa lea ona matou toe saofafai lelei i lalo ma toe vaavaai lelei loa i galuega e tatau ona maioio i le faatinoga o lenei auaunaga a le Ekalesia.
Ua aumai foi le faatuatuaga o le Malo i le Ekalesia latou te faatautaia ai nei ituaiga auaunaga ma e tatau i le Ekalesia ona vaavaai i le atoatoa o le tautua ua ofo atu i le atunuu,” o le saunoaga lea a le alii patele ina ua tapa se finagalo i le suesuega lenei.
Ta‘ua foi e le Afioga Patele Penitito Mauga, e foliga mai o nisi o lipoti ua tuuina atu mai i totonu o le lotoā i Moamoa ua aofai faatasi faafitauli na alia‘e mai a o lei taitai lea oo atu le susuga i le Tiakono o Ioane Sefo ma lona faletua e vaaia lea nofoaga.
“O le isi foi itu, e tatau lava ona silasila foi i le itu lenei, o le Ofisa o le Fia Ola Clinic e i le taulaga o Apia ae o le lotoā i Moamoa o loo iai nofoaga o sulufaiga nei ma e lē o iai le taimi atoa o le Faatonu ma lona faletua e vaai ma mātau ai a la tagata faigaluega ua tuu atu i lalo o le la vaavaaiga, o lea la ua tapunia nei le ofisa i Apia ona o le manatu o le ekalesia e tatau nei loa ona tasi le nofoaga e taulai uma ai auaunaga nei e pei ona iai nei i Moamoa.”
Faaalia foi e Patele Penitito Mauga, e iai lava foi tulaga ua vaaaia ai e lē o ogatusa finagalo o i latou ua faatautaia nisi o auaunaga fesoasoani nei ma le agai atu o le Faatonu o le Fia Ola na te vaaia lenei nofoaga atoa.
“Ae o le mafuaaga na faia ai le faaiuga lenei e pei ona sau sa‘o lava mai i le Taitai o le Ekalesia i Samoa nei, le Afioga i le Epikopo, ona o le manatu e moomia e nofoaga nei se taitai faaleagaga o se tamā faaleagaga e mafai ona vaavaai i le atina‘e o lea itu o soifua ua afaina ona o sauaga.
Manatua la e ui o le faatonu o le Fia Ola Clinic le alii tiakono o Ioane Sefo, ua iai le tomai faatasi ma lona faletua i le ofo atu o auaunaga tau faufautua, counseling ae o se tasi e mautofi i le ekalesia ma o le mafuaaga lava lea o le manatu e moomia tele lea ituaiga taitaiga i nofoaga nei i Moamoa.
O lea lava la na faia ai le faaiuga lenei a le Taitai o le Ekalesia. Ae e pei e lē o masani foi nisi ua leva ona vaaia lea nofoaga i ia tofiga ma suiga fou.”
O lea la e lē o iloa poo afea e mae‘a ai le suesuega a le Komiti Faapitoa lenei ae ua manatu Patele Penitito Mauga, o le suesuega ua aofia ai ma le vaavaai o le Ekalesia i nisi auala e mafai ai ona matuā mautu lelei ia nofoaga ma ia maioio tiute tauave o i laua nei ua ave i ai le faatuatuaga latou te faaleleia ai ma saga atia‘e lenei fesoasoani.
Ta‘ua foi e le sui sooupu o le Ekalesia Katoliko i Samoa, afai lava o iai ni tuuaiga e ono faia i le faatonu o le Fia Ola Clinic e mafai ona faapea o le faatamala ae e lei mae‘a suesuega e tatau ai ona faia se tala mautu a le Ekalesia – ona pau le tulaga o iai nei e lē o afaina fua tofiga faalelotu o le afioga i le tiakono ma lona faletua, ae e tatau lava ona malolo seia mae‘a le suesuega o faia nei.
“Ae o le itu o le moomia o lenei auaunaga, e matuā moomia lava e pei lava ona silafia o auaunaga nei ua mafai ona ofo atu ai taitaiga faaleagaga ia i latou ua mafatia ma puapuagatia.
O le matou galuega lena o tagata ma taitai o le ekalesia, o le ofo atu o lenei auaunaga e fesoasoani ai i soo se tasi ua iai mafatiaga o le tino ma le mafaufau. O le faaleagaga e lima taitaina ai le matou tautua.
“O le fesoasoani ua ofo atu e le Toaimanu, le Mother of Mercy aemaise le Fia Ola Clinic e lē mafai ona taofia auā e talafeagai ma le galuega faale talalelei o loo matou faia.
O le mafuaaga lava foi lea o le agai atu o le Faatonu Sili o le Faatāua le Ola ma lona faletua i le nofoaga lenei o sulufaiga i Moamoa ona o le manatu e matuā moomia le galuega o le counsel o loo faia e le faatonu sili o le Fia Ola ma lona faletua mo fanau o loo taofia i le nofoaga lenei o sulufaiga a o faagasolo ai a latou mataupu i luma o le Faamasinoga”.