E mae‘a taimi faigaluega o le Aso Lulu, le aso 3 o Novema o tumutumu lava fafo o le nofoaga lē tumau ua see i ai le lesitalaina o suafa o le au palota ona o le tuai ona oo atu le atunuu e faatino a latou lesitala.
Faaalia e le afioga Tanuvasa Isitolo Lemisio, o le vaiaso mulimuli lava o lesitala lea ua mae‘a atu na oo i le itula e 10 i le po le faatinoga o lesitala ona ua na o le pau lea o le taimi ua faatapulaa mo le faatinoga o lea galuega.
O le faanoanoaga tele o le afioga i le Ofisa Sili o Faigapalota, o le lē utagia e le toatele o faasilasilaga ua tele le tupe alu a le Ofisa e totogi ai ona o le manaoga lava ina ia usitaia e le atunuu le faatino vave o lesitala.
O le faamamafa lava na ave o le itu lea e sala i le tulafono soo se tasi e tatau ona palota ae e lei lesitala peitai faato‘ā tumutumu atu lava le atunuu ina ua oo i aso e tolu mulimuli o lea galuega.
Sosoo ai loa ma le solo i lalo o le faapaologa o le Ofisa o Faigapalota, atili ai le tuai i le Aso Lulu, ma tatala ai loa le avanoa e le Ofisa Sili o Faigapalota e toe faaopoopo nisi itula seia oo i le taeao o le Aso Tofi.
O le itula e lima (5am) i le taeao, na faato‘ā tapunia ai loa lesitala o suafa o le atunuu e mo le faiga palota. O lea tapulaa ua mae‘a ai loa lesitala o suafa mo le faigapalota.
Faaalia e le alii Ofisa Sili o Faigapalota o le toatele o le atunuu ua sui itumalo na lesitala muamua ai ma ua agai a latou palota i isi vaega o le atunuu o loo iai o latou piitaga.
O se tulaga lea ua manino ona o le toatele o nei tagata na faapea ona agai mai mo faigapalota ona o komiti a sui tauva na maua ai taavale e momoli ane ai le au palota mo le faatinoga o a latou lesitala.
O le upu mai i le Ofisa Sili o Faigapalota, e faataga lava le agai o sui tauva e aumai a latou sui mo lesitala, ae e matuā tapu lava le ave o ni tupe i tagata nei.
E ui i lea lapataiga, ua faaalia e nisi o sui tauva e iai lava le manaoga o tagata latou te momoli e faatino a latou lesitala mo seleni. E lē o tagata uma ae o nisi sui tauva ua ave tai $10, o nisi lava e oo i le $100 i sui lesitala.
Ua faaupu o le tupe mo le lunch ae o nisi ua faapea mai o se meaalofa i le agai atu e lesitala.
E iai lava le faamoemoega o nisi o sui tauva atonu o le momoli i le ofisa o Faigapalota mo le lesitala e mautinoa ai le palota a lea sui ae ua manino uma lava, o loo filo lava i latou e savali i upu i le vaega muamua lenei o le faiga filifiliga o sui faipule, ae o loo toatele foi nisi, e talia lava soo se tupe e aumai i sui tauva, ae o i latou foi ia o le a tulai i luma o le Faamasinoga i le tausaga fou ma molimau faasaga i ia sui tauva.
E ui i lea e lei faaitiitia lava le numera o sui tauva na matuā totogi taavale ma taamilo solo i afioaga o loo iai sui e mafai ona palota ia i latou auā le aoina mai mo le faatinoga o lesitala.
Atonu o se faiga foi lea na faatalitali ai loa le toatele ia na toe lolofi atu i aso mulimuli o lesitala.
O le tele lava o sui tauva na mulimuli ane faaali lo latou faanoanoa tele ona ua avea le tatala o le avanoa e faaaogā ai a latou taavale mo le momoli o le au fai lesitala ma auala ua sosoo ai ma aisiga i fesoasoani o faalavelave o sui palota ia.
O se isi sui o loo tamoe i le vaega faaupufai a le HRPP mo le uluai taimi, na ia ta‘ua le leai o se galuega o toe mafai ona fai i le tumu atu o le atunuu e talosaga fesoasoani mo taulaga, o tupe auā faalavelave ma isi lava manaoga ma e alu atu lava le talosaga ma le numera o tagata palota e mafai ona o latou aumaia i le aso o le palota mo sui faatutū nei.
O le mau a nisi, e foliga mai ua avea lea tatala o le avanoa e sui tauva ua “faamatanana” ai tagata palota, lea la ua toe faitio ae ua tatala fua le avanoa ae o le lesitala o le tiute lea a le tagata palota auā e sala i le Faamasinoga pe a lē faatautaia, o lona uiga e faatino uma lava lesitala e pei ona toe vaaia ai le tumutumu i le amataga o le vaiaso i Mulinuu o i latou e lei faatinoa a latou palota.
