O le mana’oga o le Malo e ala mai i le laulau a fono a le kapeneta ia toe faataga ona sasa fanau i a’oga maualuluga e faatonutonu ai a latou amio. O le mafuaaga ona o vevesi na aafia ai nisi o fanau i nisi o kolisi maualuluga i le li’o o le taulaga. E lē o faigofie i nisi o faalapotopotoga tuma’oti ma tagata e aofia ai le Komesina o Sulufa’iga le afioga Maiava Iulai Toma, le teuteuga o le a soalaupule e le Palemene ise isi o ana fonotaga o le a sosoo ai.
O se teuteuga ua faaalia e Maiava i lana folasaga tusitusia poo se submission ua tuuina atu i le komiti faapalemene e tatau ona faatali se’i mae’a ona faalauiloa le lipoti o suesuega i aafiaga o aiātatau o tagata i Samoa.
I ni vaega o lea folasaga ua faaalia ai e le Komesina o Sulufa’iga o le tiute o le Malo o le puipui malu o fanau peitai o le tiute tauave o tagata uma o le puipui mai o fanau mai le aafia i soo se ituaiga o sauaga.
Ua siitia pea le numera o faiaoga e molia i le faamasinoga ona o le faaoolima i nisi o fanau ae ua fesili le Komesina o Sulufa’iga i lana folasaga pe o faamalosia le tulafono ua tapu ai ona toe faia ni faasalaga e sasa ai fanau.
E lē o faiaoga uma e saua e aoai ai fanau peitai o faiaoga ia e tatau ona agai iai se aoaoga e faia ai o latou tiute o le a’oa’o ia popoto fanau ma ia saoloto mai se siosiomaga e le ulufale iai ni faiga saua e aafia ai le ola tuputupu a’e o fanau.
Faaalia e Maiava i lana folasaga e lē o mafai ona iloa tonu le sootaga o le teuteuga i le taofia o le sauaina o fanau, ma o se luma le toe agai e ave se malosi e faaaogā e a’oa’i ai fanau ae e lē o le faafitauli lea o loo tupu. Ua fautuaina e le Komesina o Sulufa’iga le komiti a le Palemene ina ia toe faataatia le teuteuga se’i mae’a ona faalauiloa le lipoti a le komiti faapalemene.
O se masina a’o lei mae’a le tausaga nei e faalauiloa ai lea lipoti o suesuega i aafiaga o aiātatau.
O Samoa ua na afifi ma talia le feagaiga faavaomalo e puipui malu ai aia tatau o fanau iti o se isi lea popolega ona e fuatia ai Samoa e isi atunuu o le lalolagi ua latou sainia ma talia lea feagaiga. O le faalapotopotoga o le Toomaga mo ē Puapuagatia ua tuuina atu foi se latou folasaga i le komiti a le Palemene e tusa ma ia teuteuga ma o loo latou teena foi.
