(E lē sefea oe i ni moliaga i le tulafono ona o lou faapea mulimuli mai i le taimi ua e puapuagatia ai, e te lei malamalama i le tulafono)
O lou titue o lou faaeteete. Ae e te lei sainia lou suafa i luga o se feagaiga,
o lou tiute o le faitauina o upu uma i luga o pepa na ei ou luma, e oo i ni upu tusitusi ninii (small print). O le taimi e te saili ai le fesoasoani o le taimi ae e te lei sainia lou igoa i luga o se pea e te lē malamalama ai.
E te saini loa lou igoa, e tusa o lena ua ta‘uina atu i le tulafono, ua uma ona e faitau ma ua e malamalama ma malie o le a e mulimuli, ma tausi i faatonuga ia e tusia i le pea lea na e sainia.
Afai e te saini se pepa e te lei faitauina, ae mulimuli ane ua molia oe i le tulafono ua e lē tausi feagaiga, e te lavea lava i le tulafono. Tusa pe e te faapea mai e te lei malamalama i upu ninii o le feagaiga na e sainia.
O mea nei o loo tutupu mai i le saini faatamala ae lei malamalama:
1. Ua ave e le Bank le fale ua lē mafai ona totogi le mokesi.
2. Ua ave atu le notice a lē e ona le fale e o ese ma se fale rent ona ua lē tausi feagaiga.
3. O totonu o falemai, ua tele tagata maliliu i togafiti sese, ae maua ane mulimuli e leai se mea e mafai ona ua saini ai le ma‘i poo se isi o le aiga i pepa a le falemai.
4. O ni tagata Samoa lea ua maua i Niu Sila nei, lea ua molia e Niu Sila ona ua maua e le Immigration poo le ofisa o Citizenship e sese ma pepelo latou tautoga na omai ai i Niu Sila, ma maua ai sitiseni Niu Sila (NZCitizenship).
5. O totonu o Ekalesia ua o nisi ua tasaini pepa e fai ai mokesi i luga o meatotino a le Ekalesia, ae mulimuli ane iloa e tagata na faia mokesi e lē o ni trustees e pulea meatotino a lotu.
E lē lava le taimi ma le Column e tusi uma atu ai mea uma o loo tutupu mai i le taimi nei, o le saini faasolitulafono o ni pepa tāua. E iai lo‘u popolega ona e iu lava ina falepuipui nisi ona o mea ia ua ou ta‘ua i luga. Ua ave foi fale o tagata talu ai le faatamala e tausi le feagaiga tusitusia, ma totogi le tupe o le mokesi i totonu o le feagaiga. E tusa lava poo le ā le tele o faalavelave e ave i ai tupe a le aiga, ae tatau lava ona muamua totogi le mokesi, poo le rent o le fale. E faapea foi feagaiga ma ofisa loia i mea tau pili totogi.
O le feagaiga tusitusia ma se loia, e faapea foi ona ia te oe le tiute e tausi ai le feagaiga i mea tau totogi o le loia, faapea ma lou fesili e faamalamalama se mea e te lē manino ai ae lei sainia se feagaiga.
E leai sau aiā i le tulafono e te fesuiai toatasi ai e oe le feagaiga sa lua saini uma ai ma se isi. E leai se contract poo feagaiga i le tulafono, pe a lē saini lima ni tagata se toalua (two parties).
Ia iai se Faamaoniga o lua Tala – a o lei Lafoina:
O se tagata e tu i luga ma fai i se isi e nofo i lalo e aua le tautala e lē o ia o se matai, o le ituaiga taufaaleaga i upu lafo lea e afaina ai i le tulafono lea o le (Defamation Act).
E faasā i le tulafono a Niu Sila ona e lafoina se tala e faamatagā ai se isi i luma o tagata, pe afai ae lē sa‘o le tala lafo, ma ua afaina ai le tagata lea na lafo agai i ai lau tala. E vave tele le faalele, pei e taufaifai ma fia mālie i luma o tagata, ae afai e afaina ai se isi tagata i lau tala lē sa‘o na fai, e te lavea i le tulafono pe a tagi le tagata lea ua afaina i lau tala ses e.
E vave tala e fai i taimi o fai ai ni faatau a matai. Ae tautuana, e leai se tulafono e puipui ai ni aiā a matai i Niu Sila nei, e taufaifai ai ma faaleaga le isi matai i luma o ni tagata.
Afai ua e lafoina se tala i se isi e nofo i lalo o lē o ia o se matai, i taimi o faatau i luma o se faalapotopotoga, e matuā matuia i lo‘u iloa faaloia le afaina o le tagata lea e fai i ai le tala, pe afai e sese le tala lafo. I lo’u tulaga loia Samoa e malamalama i le faasamoa, o se upu lafo faapenei e faatupu vevesi i aiga e ona le suafa matai lea ua faaleaogāina e le tagata na lafoina le upu i luma o ni tagata se toatele.
Atonu e lē tāua i nisi i Niu Sila nei le matuia o upu lafo faapenei i aiga lautele, e latou te tauaveina ni paia ma mamalu o suafa o aiga. O le fautuaga i lenei vaiaso, ia fai tiute o tagata matutua uma lava, ina ia faitau feagaiga tusitusia a o lei sainia ni pepa.
Ia fua i luma ma toe fua i tua, a o e lei lafoina se faamatalaga e tauvalea ai le igoa o se isi tagata. O suafa matai e lē na o le tagata lea e lafo i ai lau tala e tiga ma lagona le mā i le tala sese ua lafo i luma o se potopotoga. E lagona foi i aiga ma nuu o le tagata ua faifai sese, le matuia o le tala faalele ae sese. O le Defamation lea, e puipui ai igoa ma tulaga o tagata uma. E tatau lava ona molia i le tulafono mea faapenei, e taofi ai le taufaaleaga lē mafaufau.
E puipui i le tulafono aiā a le tagata ua e faatauvalea lona igoa poo lona tulaga, i sau tala lē sa‘o ua lafo.
