O le taeao o le Aso Faraile i le faatoa tea laitiiti o le itula e 7, ua gasolo le fanau aoga aemaise tagata faigaluega ae vaaia loa pasi e tumu i tagata, ua afe atu i Tufulele.
O pasi na maua mulimuli e mai i le afioaga o Satapuala ma na malaga mai ai se aiga o se alii avetaavale e tulai i luma o le Faamasinoga Maualuga i le vaiaso lenei, i tuua‘iga o le avetaavale faatamala ua mafua ai le maliu i se tagata.
O lē ua maliu i lea faalavelave o se tamaitiiti e igoa ia Ionatana, ma e pei ona ta‘ua atu i se lipoti o lenei faalavelave i le lomiga o le vaiaso talu ai, e uma le ola o lenei tamaitiiti i le faalavelave tau taavale i le amataga o le vaiaso na tea nei ae toe tasi le aso atoa le ono o tausaga o lona matua.
O “Tana” e pei ona silafia ai lea tamaitiiti e iloa e le nuu atoa auā e fealuai solo lava i le nuu ma e faauo atu i lea tamaitiiti ma lea tamaitiiti. O le taumafai e sopoia le aualatele ae lavea ai loa. O le avetaavale lenei, e lei faalauiloaina lona suafa e leoleo, sa agai mai i le auala lea e sau i le Malaevaalele i Faleolo agai atu i le taulaga o Apia.
E oo mai i Tufulele o loo tu se pasi laupasese i luma tonu ane lava o le vai taele a le afioaga o loo tumutumu ai tamaiti. O tua la o le pasi lea a o tu i le isi ituala, na alu ane ai “Tana” i tua atu ae o loo agai mai le taavale laupasese i le isi itu o le alatele.
Faaalia e nisi na molimauina lea faalavelave na taia e le taavale “Tana” ma toe alu ai i luga. Na tu le taavale laupasese ma na faamauina e nisi sa iai i lea ituala le vave ona tumutumu ane o tagata i lea nofoaga ma na fautuaina le avetaavale e aluese vave loa ae o le a logo le ofisa o leoleo e matai sa iai i le nofoaga tonu na tulai mai ai lea faalavelave.
Faaalia le taumafai o le nuu e faatatope le tamaitiiti lenei ua lavea i le falemai ma na ta‘ua e le falemai e lei au atu “Tana” ma na taumafai lava e faaola le tamaitiiti ae e foliga mai ua tuga tele manu‘a o lona ulu ma uma ai lava lona ola.
O le tausaga lenei ua faamauina ai e le Vaega o Fuainumera faamauina ua oo atu i le 15% le siitaga o faalavelave tau taavale i totonu o Samoa.
O se tulaga ua toe faalauiloa ai foi lapataiga faalauaitele a le Matagaluega o Leoleo ma le Pulega o Felauaiga i luga o le Eleele i le mamalu o le atunuu, avetaavale ma le au savavali ina ia toe silasila lava i le faatuputupulaia pea o faalavelave e tulai mai i luga o alatele.
O le toatele lava o loo aafia o le fanau laiti ma ua toe fautuaina ma lapatai leoleo i le saosaoa e tatau ona feoai ai taavale aemaise lava i totonu o nuu.
Na talia e le afioaga o Tufulele le ifoga a le aiga o le avetaavale ae o le mataupu ua tuu atu i le ofisa o leoleo atoa ai ma le Faamasinoga.
