O le masina o Me, sa tatou faatāuaina ai le tele ma tāua o le sao o tina i totonu o tatou aiga. E faigata foi ona talia e le mafaufau se aiga ae leai se tina.
Auā foi o la latou fautua ma lo latou taulogologo i mea lelei o le tasi lea o mafuaaga e maopoopo ma lelei ai aiga. Ae talofa e, auā pe fia ni tina o loo soifua ma auga o le ma‘i fatu e aunoa ma se silafia o lea tulaga? Ae poo iloa foi ma o latou silafia – o le ma‘i fatu o le gasegase numera tasi lea ua tele tina o Niu Sila ua maumau ai lo latou soifua?
O Aggie Tupou o se tina e tele meaalofa ma taleni a le Atua o loo ia te ia. O nei foi taleni ma meaalofa ua tele ai lona pisi i aso taitasi o le vaiaso.
O le tina e toalua si ana fanau, e galue o se tagata faasalalau i luga o le letio ae lē gata i lea, o se tina e tele lona taimi e galue fesoasoani ai mo isi tagata aemaise foi lana lava komiuniti (community).
Ua avea la le pisi o Aggie i nei mea uma ma ala ua faagalo ai e ia lona lava soifua maloloina lelei. O le ala lea sa maua ai o ia i le tino puta ma sa ia popole ne‘i maua o ia i le alama‘i a lona aiga – o le ma‘i suka lea.
Fai mai le tautinoga a lea tina – ‘Na oo lo‘u mamafa i le 115kg. Sa ou faalogo a maua a‘u i le tino puta, o lona uiga o le a faigata ona fai le galuega a lo‘u fatu, o le pamuina lea o le toto i itutino eseese o lo‘u tino. I le ma lea, ua 33 o‘u tausaga ae mafai ona matua atu tausaga o lo‘u fatu i lo o a‘u ona o le lē tausia lelei.’
‘O lo‘u sauni atu mo la‘u faaipoipoga o se tasi lea o vaega sa unaia a‘u ma lo‘u mafaufau ina ia faia loa se suiga. O le aso 20 o Iulai, le aso o lea faamoemoe.
Ua ou auai i bootcamps ma le faamoemoe o le a ou tauaveina aoaoga tāua ua ou maua mai ai auā le tausia o lo‘u soifua maloloina lelei, e lē gata mo aso uma o lo‘u ola, a ia aogā foi mo lo‘u aiga. O le fatu o se itutino tāua lea i soo se tagata. Ma e tāua lo tatou tausia lelei pe afai tatou te fia ola umi.’
‘Ou te talitonu e leai lava se mea tatou te lē mafaia pe afai e tuu atoa i ai le loto ma le agaga. O la‘u motto i le taimi nei o le NO EXCUSES pe faapea, ua lē toe iai se isi alofaga. O la‘u faamalosi foi lea i tina uma lava – e lē tāua pe faapefea ona e amataina se faamoemoe a o lona faaiuina.’
Mo tina uma lava, ia tautuana ma outou lo outou lava soifua maloloina lelei e pei o le tina i a Aggie. E mafai ona fai sau galuega alofa i lou fatu e ala lea i le:
• Faaitiitia lou taumafa i mea‘ai lololo ma le ga‘oa, e oona ma maualuga le masima, atoa ai ma tausami suamalie.
• Toaga e fai au faamalositino
• Taofia loa le taumafa tapaa
• Toaga e alu i le fomai e fai au siaki ma siaki ai ma lou fatu.
Mo nisi faamatalaga i le tausia lelei o lou fatu, asiasi mai i le www.heartfoundation.org.nz