O le vaiaso ua tea na taofia ai a‘u e le fomai se‘i faia a latou suesuega, ma sa lē mafai ai ona ou malaga i Toga. E leai se mea o faaletonu pau lava o le fautuaga a fomai ia te au, ia lava le malologa o le tino, ia taumafa i fualaau aina, ia faaitiitia le taumafa i manufasi ma meataumafa lololo, ma ia faaavanoa foi taimi e fai ai faamalositino auā le tausiga o le soifua maloloina. Ou te talitonu e sili lava le puipuia i lo le togafitia ma ua ou usitai ai loa i fomai.
Ua avea le taofiga o a‘u e fomai ua maua ai lo‘u avanoa e asiasi ai i le falemai i Middlemore ma ou maitauina ai e tau leai ni tagata Pasefika o loo avea ma fomai, poo alii ma tamaitai tausi mai. Ua toatele lava o le aufaigaluega i tofiga fomai ma le au tausimai o tagata mai Asia ma papalagi. O le fesili pe mafua aisea? A o le toatele o tagata o loo faasolo atu i le falemai e mama‘i o tagata Pasefika. Ou te talitonu e lē talafeagai lea tulaga.
O se sini tāua le tatou galulue ina ia taumafai e unai o tatou alo ma fanau ina ia taumafai e avea i latou ma fomai, ia avea foi i latou ma alii ma tamaitai tausimai. O le isi foi sini tāua mo le tatou atunuu o le galulue lea ina ia tausi le soifua maloloina, ma ia malamalama i auala e puipuia ai le soifua maloloina mai ma‘i o le tino ma isi faafitauli e ono maua ai i faama‘i eseese.
Ou te maitau foi e toatele naua tagata Pasefika ua maua i le lapopoa, ma ua avea lea lapopoa ma mafuaaga ua faigofie ai ona maua i ma‘i o le tino. Ua avea le taofia o a‘u e fai suesuega a fomai, ma avanoa ua ou lagona ai e matuā tāua lava le tausi o le soifua maloloina.
Ou te manatu i tupulaga lalovaoa, o latou o le a avea ma ta‘ita‘i o le lumanai, e matua tāua tele lava le maua e i latou o le malosi o le tino ma le soifua manuia, ma ia maua foi e i latou avanoa mo a‘oa‘oga. Afai e lē maua e latou le poto ma le atamamai, ma maua e i latou le malosi o le tino, e faapefea la ona avea latou ma ta‘ita‘i o aiga, komiuniti, ekalesia ma lenei atunuu?
Ou te manatu alofa i nisi o fanau ua laititi tausaga o o latou olaga, a o tino ua lapopoa tele e pei o ni tino o tagata matutua, ma o le faamatalaga a fomai, afai e lē foia le lapopoa o tamaiti, o le a avea le lapopoa ma mafuaaga e maua ai lava i le tele o faamai e lē tatau ona latou maua.
O le Aso Toonai ua tea na ou maua ai le avanoa ou te auai i le tatalaga o le North Shore Pasefika Festival i Northcote. Ua fa nei tausaga o faia lea atina‘e ma ua maua ai le avanoa e faatasi ai tagata Pasefika o loo afifio i North Shore. O le tāua o lea faatasiga o loo lagolago faatasi e ekalesia eseese a Samoa, Toga, Fiti, Niue ma Rarotoga. Sa ou momolia le agaga faafetai ia i latou sa taulamua i le faamaopoopoga o lenei faamoemoe, le tamaitai taitaifono o Sesilina Setu ma lana komiti.
Sa ou faafetaia foi le aoga maualuga o Massey University ma le matagaluega o le soifua maloloina mo le fesoasoani i le tapenaga o lenei faamoemoe. Sa ou luiina alii ma tamaitai ‘councillors’ (Hartley, Woods, ma Anae) o le Supercity ina ia latou lagolagoina lea faamoemoe, ma o se mea e tatau ona latou lagolagoina.
Ou te manatuaina le fonotaga muamua ua atoa nei le 4 tausaga talu ona faavae le faalapotopotoga o le North Shore City Pasefika Forum ma sa ioe le North Shore City Council i lena vaitaimi latou te lagolagoina, ae pagā lea e oo mai lava i lenei taimi e leai so latou sao. O lea la ua faataoto manino se lu‘i i sui o le council sa auai i lea aso ia latou fesoasoani i le faatupeina o lea faamoemoe i tausaga o i luma.
Ua faavae nei se polokalame fou e le faalapotopotoga o Samoa Atia‘e i Magele ma ua faatupeina e le Council. O lenei polokalame o le a maua ai le avanoa e tupulaga talavou ina ia a‘oa‘oina ai e alii ma failauga o lenei mafutaga i tū ma aganuu mamalu o Samoa. O le talitonuga, afai e malamalama tupulaga i le tāua o le gagana, i le tāua o le aganuu, i le va fealoaloai, ma le avafatafata, o le a faapena ona avea latou ma tama ma teine e agavaa i le tauaveina o tiute o latou o tamafanau o Samoa i le lumanai.
Ou te matuā talitonu i le tāua o lenei polokalame. I se tasi o aso sa fesili mai ai se alii talavou ia te au e fesoasoani atu i lana ‘homework’ na aumai e se faiaoga Maori ia te ia. Ua fesili mai lenei alii, pe mafai ona ou fesoasoani atu e tali fesili a le faiaoga Maori, poo le a le uiga o le ‘whakapapa’? O le isi ua fesili mai lenei alii talavou, pe mafai ona ou fesoasoani atu pe faapefea ona iloa ‘mauga ma vaitafe’ e tupuga mai ai tagata Samoa.
Ona ou tali lea i ai, o le upu faa-Maori lea o le ‘whakapapa’ e tutusa ma le upu faa-Samoa o le ‘gafa’, ma e tatau ona fesiligia ona mātua. A o le fesili o tagata Maori ia te ia poo ā ‘mauga ma vaitafe’ e tāua ia te ia, e lē talafeagai lea fesili auā o ia o le Samoa, e lē o ia o se Maori, ma e tatau ona fesiligia ona mātua poo le ā le nuu ma alaalafaga a lona aiga.
Ou te maitauina pea i nisi o tupulaga, e foliga Samoa, e suafa Samoa, ae e lē o malamalama i mafuaaga ua avea ai latou ma tagata Samoa. E lē o se sese a ia tupulaga, ae ou te talitonu o le sese e mafua mai mātua ma o latou aiga.
