O se taimi muamua lea ua asiasi atu ai le Ekalesia Faapotopotoga Kerisiano Samoa i le maota fono o le Palemene o Niu Sila ina ua latou taunuu atu i Ueligitone i le vaiaso ua tea e faamanatu ai le atoaga o le 50 tausaga talu ona faavae le EFKS i Aotearoa nei.
O le tāua ia te au o lea sauniga faamanatu ona ua faalauiloa ai foi i lea aso se tusi ua tusia e le EFKS i le gagana Samoa o talafaasolopito a le Ekalesia talu lona tau amata mai i le tausaga 1962 i Grey Lynn. O le tāua o lea tusi ona e pine ai galuega faatino a le EFKS ma Samoa atoa i totonu o Niu Sila o lea e galue punoua‘i lava le tatou komiuniti e faatāua le faaaogāina o le tatou gagana.
Ou te manatu ua telē le sao a le EFKS i le mataupu lea o le faaaogāina o le gagana Samoa i Niu Sila. Ou te manatu foi o se mau tāua lea e lē gata i le EFKS, ae faapea foi ona galulue uma i ai isi ekalesia ma faalapotopotoga – ia faatāua le faaaogāina o le gagana Samoa i Niu Sila.
E lē gata i lea tusi ma isi tusitusiga, ae o loo faaaogā foi le gagana i sauniga lotu, i aoga faataitai, faafiafiaga, ma le tele lava o polokalame mo le autalavou.
O lea lava o loo galulue i ai le komiuniti Pasefika ia faalauaitele ma faatāuaina le faaaogāina o gagana a le Pasefika i Niu Sila, ae o loo ‘aloese lava le faigamalo mai le faataunuuina o le latou pitolaau ia fesoasoani ma faatupeina ia taumafaiga – aemaise ia aoaoina tatou gagana i totonu o aoga i Niu Sila.
O le mea la lea ou te momoli atu ai le faafetai tele i le Ekalesia Faapotopotoga Kerisiano Samoa i ona taitai ma susuga i faafeagaiga, aemaise foi latou na tau amataina mai lenei galuega tāua i Niu Sila ma ua fai i lagi le folauga. E tāua tele le auai atu o le EFKS i le maota fono a le Palemene a Niu Sila e amataina ai le faamanatu o le atoaga o le latou 50 tausaga i Niu Sila. O le maota lea o loo vevete ai mataupufai o malo a Niu Sila, ma ua avea le ‘ava o le feiloaiga ma le minisita o le Malo i le maota fono o le Palemene, ua momoli atu i ai se feau tāua i sui o le Palemene, e lē na o papalagi lenei atunuu.
O Niu Sila ua avea nei ma atunuu o tagata Samoa. O le isi, ia ta‘u atu i o outou alo ma tatou fanau, e mafai ona au soo se isi lava o Samoa i soo se tofi o faigamalo a Niu Sila mo le agai i luma i le isi 50 tausaga. E tāua tele ia te au le tulai mai o le isi augatupulaga e avea ma faipule poo taitai o Niu Sila, o loo latou silafia ma malamalama i le gagana Samoa.
Faafetai i lau susuga Reverend Elder Tavita Taulealo, o le Taitaifono Faaitulagi a le EFKS i Niu Sila. Faafetai foi i lau susuga Reverend Elder Lucky Slade, o le Taitaifono o le Komiti o Tapenaga i Niu Sila. E momoli atu foi le agaga faafetai i lau susuga i le faafeagaiga Reverend Elder Popo Su‘a, o le Failautusi Faaitulagi a le EFKS i Niu Sila, ma o oe foi o le Taitaifono o Ekalesia Soofaatasi a Samoa i Ueligitone.
Faamalo le galulue mo le lelei o Samoa atoa. Ia manuia le 50 tausaga o le EFKS i Niu Sila, ma ia manuia fuafuaga mo le isi 50 tausaga o i lumanai. Ua onomea ma alagatatau le faavae poo le autū o le faamanatu o le atoaga o le 50 tausaga – Ia tatou sii le viiga ma le faafetai i le Atua. Afai tatou te toe vaai mamao mo le isi 50 tausaga, ia tatou tulimatai ia u‘umau tatou fanau ma outou alo i le faaaogāina o le tatou gagana, tū ma aganuu mamalu o Samoa – auā o lo tatou tofi lea mai le Atua.
Poo ai lava le faigamalo i Niu Sila, o le latou tiute lava ia fesoasoani i le Ekalesia ma ona tagata. Ia fesoasoani ina ia puipui a tatou gagana ia faaauau e le isi augatupulaga fai mai. O se tasi o pine i le tāua o le faaaogāina o le tatou gagana i Niu Sila lava, ona o le vaiaso ua tea na faailoa ai le faamavaega a le alii faiaoga, le afioga ia Galumalemana Afeleti Hunkin, mai lona tiute o se sui i le Fono Fautua i le malo mo Mataupu tau Pasefika.
O lana faamavaega e mafua ona o lona tetee i le Fuafuaga mo Aoga Pasefika (Pacific Education Plan 2013) a le malo lea na tatala i le vaiaso ua tea. Ta‘utino e Galumalemana e leai se naunauga moni i le malo a le National e fai se faiga mautu e faaaogā ai gagana a le fanau e lagolago ai a latou aoga.
Na ia ta‘ua le leai o ni aano, e fesootai i le leai o ni tupe poo ni alaga‘oa e lagolagoina ai lea faamoemoe. O le gaioiga a le alii faiaoga o se faailo manino lea i le malo a le National, o le lagona o loo mafuli i ai le pasene maualuga o mātua ma taitai a le Pasefika i lenei mataupu.
E 14 tausaga o avea le afioga ia Galumalemana ma sui faufautua o le Fono Fautua a le Matagaluega o Mataupu tau Pasefika. E tele foi tausaga o avea ma faiaoga ma faatonu o polokalame tau Pasefika i le Victoria University i Ueligitone, ma o ia foi o se tasi o tamā iloga o Samoa sa avea ma taitai o le FAGASA i le tele o tausaga ua mavae.
I le talitonuga maumaututu a faiaoga ma latou o loo suesueina (researchers) i mataupu o gagana i aoga maualuga, ua mautinoa ai lenei mau – o le tamaititi e malamamalama i lana gagana muamua, poo le gagana a ona mātua, o se tamaitiiti e malosi lona faavae mo le aoaoina o mataupu tau aoga mo le lumanai.
O lona uiga o le tamaititi e malamalama ma faaaogā lana gagana muamua o se tamaitiiti poto, ma e vave ona ia pueina ma malamalama foi i isi mataupu. O le naunautaiga lea o tatou o mātua – ia maua e tatou fanau le poto ma le atamai. O le sini lea ma le autū e tatau ona tatou finau i ai mo le manuia o a tatou fanau.
Ia lē gata i le maua o le poto ma le atamai i le faaperetania, ae ia faapea foi ona malamalama lelei i le gagana Samoa.
