Ia tatou feiloai i le Aso Lulu, 24 Aukuso i Magele i le 3pm

O le Aso Lulu o le vaiaso nei, le aso 24 o Aukuso i le itula o le 3pm i le aoauli o le a maua ai le avanoa a le tatou atunuu e feiloai ai ma le afioga ia Lilomaiava Phil Goff, le taitai o le Itu Agai.

O lenei feiloaiga o le a faia i le maota o Pukapuka, 23 Canning Cres, i Magele lava. O le maota lea o Pukapuka e faafesagai ma le Maota o Ligaliga i Magele.

O lenei avanoa o le a mafai ona tatou faatalanoaina ai mataupu tau polokiki o loo aafia ai le tatou atunuu.
O le a mafai foi ona fofola manino atu mo lo outou silafia fuafuaga faataatia ua tapena nei e le vaega faaupufai a le Leipa mo le manuia o tagata lautele.

E tāua tele lenei avanoa ina ia silafia e lo tatou atunuu nei mataupu ma maua i ai le silafia lautele ina ia faafaigofie ai ona fai le filifiliga a le tagata lava ia i le aso o le faiga palota, le aso 26 o Novema 2011.

O avanoa foi faapenei e tāua tele ia i matou o loo galulue i nei galuega e mafai ai ona puepue mai finagalo lautele a le tatou atunuu i lea mataupu, ma lea mataupu.
O avanoa nei e mafai ai ona faaalia finagalo eseese e fesoasoani mai ai i le matou galuega auā le tapenaga o faiga faavae.

O le tāua o faiga faavae a lea vaega ma lea vaega i le taimi o faiga palota, auā o faiga faavae ia poo anavatau foi ia e faatino e vaega faaupufai pe a manuia mai le faiga palota.

O se faataitaiga, ua faapea mai le faigamalo o loo manuia uma tagata uma e leai se faaletonu o iai i le tamaoaiga o le toatele o aiga.

E lē gata ua saunoa mai foi le alii Palemia faapea, afai o iai ni aiga o faaletonu le tamaoaiga, e mafua lava ona o le “filifiliga” a le aiga lava ia.
O loo matou finau atu i ai e sese lea saunoaga o le “filifiliga” lava a le aiga poo le tagata lava ia ua mativa ai.

E leai se isi e manao e fia mativa, ae mafua le matitiva ona o le taugata o le tau o le soifuaga ae utiuti tupe maua a tagata faigaluega.

O feiloaiga ua fuafua nei mo le Aso Lulu, 24 o Aukuso i Magele e maua ai le avanoa e pue mai ai poo le ā so outou finagalo i lenei mataupu.

E sa‘o ea le Malo, pe sa‘o le finau o loo matou finau ai nei? E lē gata i lea, e fiafia ea i le fuafuaga ua faataatia mo le siitia o le totogi aupito maualalo faatapulaa faaletulafono i le $15 i le itula?

O le taimi nei e $13 le totogi aupito maualalo lea. E lagolago ea e le tatou atunuu le fuafuaga ina ia aua ne‘i totogiina se lafoga i le $5000 muamua o totogi faaletausaga? O le ā se lagona a le tatou atunuu i le aveesea o le GST mai le tau o fualaau faasua ma fualaau aina?

E lagolagoina e le tatou atunuu le siitia o le lafoga totogi i le 39 pasene mo i latou ua silia ma le $150,000 o latou totogi i le tausaga pe leai? E lagolagoina e le tatou atunuu le faavae o se lafoga fou e totogi ai le 15% mo polofiti e maua mai i le faatau ese o fale ma pisinisi (Capital Gains Tax), pe leai?

O fea o iai le tofa a le tatou atunuu i fuafuaga ua faataoto mai e le Malo i le faatauesea o aseta tāua e pei o le kamupani vaalele o le Air NZ, ma kamupani a le Malo o loo gaosia le moli eletise?
O le vaiaso foi lea ua tea na faailoa mai ai e le Malo a latou fuafuaga mo isi suiga faaopoopo i le penefiti a le Malo, aemaise le penefiti o loo maua e nisi o tupulaga talavou.

Ua iai le manatu a le Malo o le a faasoasoa mai e le Malo lenei penefiti ina ia faasā ona faaaogā le penefiti mo le faatauina o sikaleti ma le avamalosi, ae o le a tuu sa‘o lava le penefiti i le totogiina o fale mautotogi, poo pili masani, ma mea taumafa.

I se tasi itu e foliga o se mea manaia, ae o se isi foi itu, ua foliga ua aiā tele le Malo i aiā tatau a tagata.
O le isi itu, o loo matou tuufesiligia ai pea le alii Palemia, poo le a oso fai lea mea, ae faapefea ona maua ni galuega a nei tamaiti?

O le ā le mea ua le māua ai avanoa e faaauau ai aoga a nei tupulaga? E pei o itu ia o lea e fai ai le finauga, poo le ā le mea ua lē galue ai le Malo ina ia iai ni galuega ma lelei totogi, pe maua foi avanoa aoga a nei tupulaga ina ia aua ai ne‘i faamoemoe i le penefiti.

O la‘u fesili, e ioe le tatou atunuu i fuafuaga ia a le Malo pe leai? E matuā tāua tele le palota o lenei tausaga i le tatou atunuu, aemaise aiga o loo faaletonu le tamaoaiga, faletonu nofoaga o loo afifio ai, faaletonu le totogi o galuega o loo galulue ai, faaletonu avanoa faigaluega, poo avanoa aooga mo alo ma fanau.
O le toatele o le tatou atunuu o loo manaomia le fesoasoani.

O le tatou atunuu foi ma tagata Pasefika ua matuā lagona le faigata o loo mafatia ai i le taugata o le tau o le soifuaga, le faaletonu o totogi ma tupe maua, ma fesuiaiga foi ua iai le tele o auaunaga masani a matagaluega a le Malo.

E tatau lava i le tatou atunuu ma tagata Pasefika ona faatāuaina le faiga palota o lenei tausaga.
O le mafuaaga lea e tāua ai fonotaga e pei ona fuafuaina mo le Aso Lulu, aso 24 o Aukuso i le Maota o Pukapuka i Magele e faafesagai ma Ligaliga.

E lē gata o le a mafai ona faamanino atili le tele o mataupu e ao ona fai i ai lau lava faatatau, ae e maua ai foi le avanoa tatou te fetufaai ma faamausali ai tapenaga o faiga faavae mo le lumanai.
E matuā manaomia la outou lagolago mai ina ia faamāmā ai foi le avega, a o tatou tau saili manuia mo le lumanai.
Ou te faamoemoe o le a tatou feiloai ai i lea aso.