O le konesula o Samoa i Aukilani, afioga Faolotoi Reupena Pogi na ia tatalaina aloaia le faamoemoe o le Aufaipese ma le Ekalesia Faapotopotoga a Iesu i Samoa mai Magele i le faaiuga o le vaiaso, i se sauniga tāua sa faia i le malae i Eden Park.
O le saunoaga a le afioga i le konesula na ia faafetaia ai le susuga i le toeaina ma o le faafeagaiga foi lea o le ekalesia, susuga Mose Tuisaula, i le finagalo lelei na amata ai ona tuufaatasia lenei faamoemoe ma o se moemitiga ua taunuu mo le ekalesia aemaise le aufaipese.
O le uluai taimi lea ua tuufaatasia ai se lipine pese a le aufaipese, ma o le faipese ma o le faauluuluga foi lea o lenei poloketi a le ekalesia, o le afioga Tagaloa Peter Su‘a, o se tamafanau a le ekalesia ua tele foi lona tomai i le musika i totonu o Niu Sila.
O taitai o le aufaipese o le susuga Aloalii Maugatai ma le faletua ia Nuuausala Palelei. E silia ma le 60 le aofai o le aufaipese ma e 18 pese o loo iai i le lipine sa pueina i le malumalu o le kolisi a Uesele i Pukekohe.
O le sauniga i le po o le Aso Toonai na tea nei i Eden Park na saunoa ai foi le alii papalagi o Terrence O’Neill Joyce, o ia lea sa fesoasoani malosi i le tuufaatasiga o lenei lipine ma ia ta‘ua ai le tāua tele o le pese mo le Atua, aemaise o le suamalie o le faalogona e maua pe a ofoina le siufofoga o le tagata e pese ai i viiga o le Atua.
O le faipule o Magele le Tofa Su‘a William Sio sa fai foi lana saunoaga i le taua o le pasi atu o le tomai tau musika i tupulaga lumanai o Samoa ma ia faafetaia ai le taumafaiga a le susuga i le faafeagaiga ma le aufaipese.
O le faipule o le NZ First, afioga Leaufaamulia Asenati Lole Taylor sa ootiina faatasi ma Su‘a le lipine ae o sui mai le Matagaluega o Aoga ma le Matagaluega o Mataupu tau le Pasefika sa muai vavaeina le keke o le faamoemoe i lea po.
O faafiafiaga o le po na saunia uma e le Autalavou a le Ekalesia i Magele na felanulanuai ai le po. O le vaiaso nei foi ua malaga ai le susuga i le faafeagaiga ma nisi o le ekalesia mo le fonotaga a le Ekalesia Aoao i Samoa e pei ona faia i tausaga taitasi.
O le tele o pese o loo i le lipine e mai lava i le Tusi Pese a le ekalesia, ae o le faufautua o le aufaipese o le tina lava o le galuega ia Luisa Karene Tuisaula, o le teutupe o le susuga Erika Samu Lafoai, o le au fai musika a le Aufaipese e aofia ai Olive Viliamu, Uaine Palelei, Ata Samu, Nora Liutai, Desiree Samu ma Leone Tuisaula.
Saunoa le failautusi o le ekalesia, Luaitalo Palelei, o le faamoemoe o le siitia o le viiga o le Atua e ala i pese ua usuina i le lipine e pei ona taunuu ai foi le igoa o loo faaigoaina ai “Ia outou vivii”.
Ua faatauina nei le lipine i luma o le malumalu o le Ekalesia i Magele i Aso Toonai taitasi a o tālia ai se faamaoniga o isi nofoaga o le a faatauina ai i se tau taugofie tele.
O le lipine foi o loo aualofa ai i le susuga i le toeaina ma le faletua ua loa tausaga o galulue ai i le galuega i Magele. O le faamoemoe ua taunuu, o le laau foi lea o le soifua. Viia le Atua.
