O le soifua auauna i le tala‘iina o le Tala lelei ma le misiona na taulai i ai le silasila a tuaa ua fai i lagi le folauga e lē gata i Samoa a o le Pasefika foi. O se tasi lea o vaega tāua na faaautu i ai tautalaga i le polokalame sa faatinoina i le faaiuga o le vaiaso ua faaigoaina o le Pacific 2 Nations.
E uigaese ma maeu foi i le maitau a le tusitala lenei ituaiga polokalame ona o le toatele o i latou mai lanu ma gagana eseese na mafai ona faaavanoa o latou taimi e auai ai. O se polokalame felanulanuai i le lava saunia o lona tapenaga.
O musika ma pesega, o tala ma saunoaga, aemaise o siva faaatumotu o le Pasefika. O se tasi itu e pei ona maitauina o le toatele o le tupulaga talavou ae faapea foi faifeau mai ekalesia eseese, ma na matagofie i le maitau le talatalanoa ma talitaliē faatasi o le aufaigaluega a le Atua.
E toatele na malaga mai i atunuu mamao e auai i lenei faamoemoe. O nisi o auauna a le Atua ma failauga mai atunuu e pei o Saina, Brazil, Initia, le atu Aferika, Burma, Arapi, Sasa‘e Tutotonu, le atu Asia i Saute i Sasae, i Filipaina, o Amerika i Saute, Kanata, Amerika, Iapani, Europa, atoa ai ma ē malaga mai i atumotu eseese o le Pasefika e aofia ai ma lo tatou atunuu o Samoa.
O le sini ma le faamoemoe ina ia faaauau le galuega faamisionare i atunuu eseese o le lalolagi aemaise i vaipanoa e lei oo i ai le tala lelei. Ua moni ai se tasi upu a le atunuu, “O lupe sa vao eseese ae ua fuifui faatasi i le alofa o le Atua”.
O nisi o auauna a le Atua ma ē o loo faavaatu‘ia i soo se tafa o le lalolagi ua leva ona lē toe fevaaia‘i ma o latou uso i le galuega, peitai o se avanoa ua mafai ona toe faatasitasi ai i le faataunuuina o lenei polokalame tāua. O nisi o le aufaigaluega ua silia i le sefulu, luasefulu tolusefulu ma ona tupu tausaga faatoa toe maua lea o le avanoa e toe feiloai ai.
O le Pacific 2 Nations e pei ona faailo i le pepa o faamatalaga, o le gaioi a tagata Pasefika, e tulai ma faailoa i atunuu le tala lelei ma faailoa ai le alofa o le Atua ma lona mana.
O se polokalame o loo tuufaatasia e nisi o faafeagaiga e pei ona taitaia e le susuga ia Lui Ponifasio o le LifeChurch i Manurewa, faatasi ai ma le tele o faifeau mai fatafaitaulaga e fia atoa ai ma taitai o faalapotopotoga faamisionare i Niu Sila ma le lalolagi.
E lua aso sa faataunuu ai i le Vodafone Events Center i Manukau. Sa tatala ai le avanoa i soo se tasi e fia auai e faafofoga e aunoa ma se totogi. E eseese vaega sa faasoa i ai auauna a le Atua e faia ai a latou tautalaga ma faamalamalama atili ai le faamoemoe o le olaga faamisionare. O se tasi itu ua maitauina le matuā lelei o le faaaogāina e i latou ia o gagana a nei atunuu auā ua soifua ane ai lava ma nai o latou alo i totonu o nei atunuu o loo galulue ai.
E lē faigofie le avea ai o se tasi ma misionare ona o le tele o le mau luitau o le soifuaga aemaise foi o le faatupeina o le faamoemoe. Peitai o molimau a i latou o loo avea nei ma misionare, ua faapei mai ua faigofie le aumau ai i atunuu ese. O nisi o finagalo faaalia o le mamalu o le atunuu sa faaleo mai i le tusitala i le faaiuga o le polokalame, e tāua tele ituaiga polokalame faapea ua toe fafagu mai ai foi ma le faamanatu i tagata Samoa ma le Pasefika le tāua o le galuega sa feagai ai ma tuaa i aso ua sola i le folafolaina o le finagalo o le Atua.
Na maitauina le toatele o alo ma fanau talavou faapea foi tagata matutua Pasefika na tulai e ofoina atu o latou ola mo le galuega a le Atua.
Na ta‘ua e le susuga ia Lui Ponifasio e faapea, ua tapena nei mo le lumanai ina ia tulituliloaina pea le autū ina ia auina atu le 5,000 misionare i totonu o le isi sefulu tausaga o lumanai. O se tofa mamao ma se faautaga loloto ma le faamoemoe i le agaga o le Atua e fesoasoani i tapenaga.
O atunuu o loo faamoemoe e malaga i ai Misionare, o atunuu ma ituaiga o tagata e lei oo lava i ai le tala lelei. O se faamoemoe e faigata ona o tulafono faalemalo. Peitai na ta‘ua e le susuga ia Ponifasio e lē foi ai le faamoemoe ma le valaauina ona o le finagalo o Keriso ia o i atunuu uma.
O le tausaga fou ia Fepuari lea ua faamoemoe e faia ai aoaoga mo le tapenaina o ekalesia eseese mo le malaga atu i atunuu i fafo i le ogatotonu ma le faaiuga o le 2014. E tusa ma le 15 malaga ua fuafuaina nei mo le isi 12 masina o i luma.
O le susuga Iliafi Esera o le Faapotopotoga a le Atua i Niu Sila nei sa ia folafolaina le afioga a le Atua i le po o le Aso Toonai ma ia aumaia ai faamalosiau ina ia faatāua le soifua faamisionare e pei ona auga i ai se tasi o saunoaga a lo tatou Alii faaola, ‘ia outou o atu e fai nuu uma lava ma soo’.
Na faia se sauniga faaiu e pei ona taitaia e le susuga ia Ponifasio ma isi o faifeau mai le atu Pasefika sa saunoa i gagana eseese o le Pasefika. Sa vaaia le maligi o loimata o le toatele ona o le agaga ua faagaeetia ma luitauina mo le galuega a le Atua.
Mo nisi faamatalaga silasila i le www.pacific2nations.com
