Ia matua faalapo’a lau Miti! – Dream Big!

Dr MelbournemockbaCoupdetalei Mauiliu Wallis & Dr Nu’ualofa Jasmine Mauiliu
Dr MelbournemockbaCoupdetalei Mauiliu Wallis & Dr Nu’ualofa Jasmine Mauiliu

E malosi le talitonuga o le tamaitai foma’i ia  MelbourmemockbaCoupdetalei Mauiliu Wallis, afai e tuu atoa lou fatu i lau miti ma e matuā galue punouai e faalapo’a lena miti (Dream Big) e oo mai le taimi e te matuā ausia ai lena miti. Ae sa lei misia i lagona o le tamaitai foma’i le toe faafoi pea o le viiga ma le faafetai i le Atua o lē puna mai ai le atamai uma lea ua aeae ai ma si ona uso laitiiti, le tamaitai foma’i o Dr Nuualofa Mauiliu.

O le masina o Tesema 2018 na faaiu manuia ai aoaoga Faa-foma’i a Dr. MelbourmemockbaCoupdetalei Mauiliu Wallis ma lona uso laititi o Dr. Nuualofa Jasmine Mauiliu. Atonu o se matati’a lea mo Samoa i aoaoga faafoma’i ina ua faauu i le taimi e tasi se auuso i le tomai o le faafoma’i. Na faauu Melbourne mai le Iunivesite o Otago ma lona faailoga o le Bachelor of Medicine ma le Bachelor of Surgery (MB ChB) i le aso 8 o Tesema 2018, ae faauu Nuualofa mai le Iunivesite Aoao o Fiti ma lona faailoga o le Bachelor of Medicine ma le Bachelor of Surgery (MBBS) i le aso 12 Tesema 2018.

Na amata a’oa’oga a Dr. MelbournemockbaCoupdetalei Mauiliu Wallis i le Apia Primary School, sosoo ai ma Leifiifi Intermediate ma le Samoa College lea na Taitaiulu ai o Tamaitai (Head Girl). O ia foi na sili aoao (Dux) i le Kolisi o Samoa i lona tausaga faaiu o le 2004. Na faaiuina lona Tausaga Faavae mo Iunivesite (University Foundation Year) i le Iunivesite Aoao o Samoa (NUS) i le 2005 ma na toe sili aoao ai foi Melbourne (Dux) i le Vasega Faauu. O le tausaga 2006 na see atu ai loa o ia e faaauau lona taumafai i le Iunivesite o Otago i lalo o se sikolasipi a le Malo Samoa mo lona faailoga muamua (Bachelor of Science) ma faaauau ai i le faailoga maualuga o le Matua o Faiva i le soifua maloloina lautele (Masters in Public Health, MPH) lea na ia ausia ai le Masters with First Class Honours, ma le faailoga Tipiloma o Galuega tau Soifua Maloloina (Post Graduate Diploma in Public Health, PGDip).

O loo faigaluega nei Melbourne i le Falema’i o Middlemore i Aukilani o se tasi o Falema’i pito sili ona toatele gasegase e agai atu iai aemaise lava le mamalu o o tatou tagata Samoa ma tagata Pasefika. O le faamoemoe o Melbourne ia avea o ia ma Foma’i Faapitoa o tamaiti (Paediatrics) poo se Foma’i Tuma’oti (General Practitioner) ma faaauau ona fai ana sailiiliga i Faiga Faavae e aafia ai le soifua maloloina. E faamoemoe foi Melbourne e faaauau ana sailiiliga i le soifua maloloina o tagata Pasefika o se galuega  e tāua tele ia te ia. O le faamoemoe o Dr. Nuualofa Mauiliu e fia amata lana galuega i le vaega o Gasegase Lautele (Medical) i le Maota Gasegase o Tupua Tamasese Meaole.

Na amata le olaga a’oa’oina o Dr. Nuualofa Mauiliu i le Falefitu Primary School, Apia Primary School, Leifiifi Intermediate School ma le Samoa College ona see atu lea i le Iunivesite Aoao o Samoa mo le Tausaga Faavae mo Iunivesite, lea na faauu ai i le 2012 ma maua ai lana sikolasipi mo le faailoga Faafoma’i i le Iunivesite Aoao a Fiti (Fiji National University). E telē se iloa (experience) na maua e Nuualofa i Fiti i le galue ai i falema’i e pei foi o falema’i i Samoa le utiuti o alaga’oa e faatino ai galuega ma o se tulaga lelei lea mo ia a’o alo atu e galue i Samoa. 

O le miti a Nuualofa e fia avea o ia ma Foma’i Faapitoa o Ponaivi (Orthopaedic Surgeon) o se galuega faapitoa o loo fai nei e lona tuagane matua o Dr.Tuu’au Shaun Mauiliu.

E lē faigofie a’oa’oga Faafoma’i i le ono tausaga, peitai na ta’ua e Melbourne ma Nuualofa, o le tinou lava i le faamoemoe ma le galue malosi. E ui ina faigata ae talitonu lenei auuso tamaitai, o se faamoemoe e lelei lona taui ma o se galuega alofa mo isi tagata. Na faaalia e Melbourne lona faanoanoa ona o le toaitiiti o tagata Samoa ma le Pasefika o loo galulue i le galuega Foma’i ma o lona naunautaiga e fia fesoasoani ma fautua mo tamaiti aoga Samoa ina ia faatupuina ma faafailele i mafaufau le fia avea ma foma’i i le lumanai.

E talitonu Melbourne. “A tuu atoa lou fatu i se faamoemoe e pei o le avea ma foma’i ona e talitonu lea o lau miti ma lau taleni lena mai le Atua e te faataunuuina mo le manuia o tagata. Ia taulai le vaai i le miti ma ia sauni e fai le ositaulaga (sacrifices) ina ia ausia lau miti. I le taimi e faataunuuina ai ua ausia lau miti, e faapea ona patipatia foi e lou aiga ma ou tagata ina ua taunuu le faamoemoe o le Atua mo oe ma ona tagata.”

O Dr. Melbourne Mauiliu Wallis ma lona uso Dr. Nuaalofa Mauiliu e o mai i Iva, Gautavai, Sapapalii, Falealupo, Vailoa Palauli, Saleaula, Saanapu, Vaiee ma Fasitoo Uta. O lo la tuaa tamā o le Afioga Magele Mauiliu Magele Taupati, o loo seei nei i le tofiga o le Komesina o Fefaataua’iga a Samoa i Niu Sila, ma lo la tina o Tuagaalela’i Tuuau Sao.

E momoli atu foi faamanuiaga ma le faamalo a le nusipepa o le Samoa Times i nei alo tamaitai o le atunuu, i lo la soifua finafinau ua avea ai le la matati’a o se alafua lelei mo nisi foi alo o Samoa o loo mulimuli mai. Faamalo foi i mātua ma aiga mo le tapuaiga a’o alofaiva fanau i le sailiga o le atamai i a’oa’oga.