Afai ae ma‘i se isi o le tou aiga i se falemai, o le tiute o outou o loo malolosi, o le tofi o se isi o le aiga e fai ma sooupu a lē o loo ma‘i ma le falemai. E fautuaina e tatau ona tofia se isi e lē fefe e fesili i fomai. Ia tofia se isi e iloa o lona tiute o le puipui o le tagata ma‘i. Afai e lē lelei le gagana Peretania a le sooupu a le tagata ma‘i, tāpā se faamatala upu.
A tofia mai foi e le falemai se faamatala upu, ia manatua e le tagata o le aiga lea ua fai ma fofoga o le ma‘i, o lona tiute o le fesili i le faamatala upu e toe fai mai le tala pe a lē malamalma pe lē manino le faaliliuga o le tala a le falemai.
E lē o se fiapoto e te toe fesili ai, ae o lou fia malamalama, auā o lou tiute lea ua e tauaveina faamaoni mo le tagata o loo ma‘i. Ia e tu malosi foi e tetee i se upu poo se mea e te lagona e lē sa‘o, pe lē o sa‘o le faaliliuina.
E tatau i aiga a o loo malolosi ona faatino le alofa i le tagata la e ma‘i, i le tutufaatasi e fesili i le fomai i taimi uma e faamalamalama mai le tulaga o le ma‘i o loo maua ai le tou tagata ma‘i. E tatau foi ona tou fesili ma tou malamalama ia togafiti vaila’au ma tui e ave e le falema‘i i le tou tagata ma‘i. O le tou tiute foi o le fesili i le tou tagata ma‘i poo malamalama. Fesili poo iai se mea e na toe fia iloaina?
Pe aisea ua talanoaina ai lenei mataupu?
Ua lē tasi lē lua ni aiga o faafesootai mai i lenei vaitau, ni a latou faaseā i galuega a foma‘i. O lea ou te suesueina “misdiagnoses”. E fesili aiga pe na sese togafiti na fai i si o latou tagata na ave atu o malosi, ae maliu mai i le falemai?
O le tele o mea ia ou te suesueina faaloia, mo tatou tagata na ave i le falemai e lē o tigaina, ae te‘i ua maliliu, ae a ou fesili atu i le falemai ae fai mai le tali, e tutusa lava i taimi uma. E tuua‘ia le tagata ua maliu.
E faapea mai, na uma ona faamalamalama atoatoa le ma‘i ma togafitiga, ma sa iloa ma ioe i ai le tagata lea sa ma‘i ma ua maliu. Afai la e maliu le tagata na ma‘i e faafefea na iloa e outou o le aiga, pe na ta‘u i le tou tagata lea ua maliu, e le fomai le pogai moni o lona ma’i pe leai? E faafefea ona tatou mautinoa o togafiti na fai i lo outou tagata lea ua maliu o togafiti tonu ia e tatau ona fai i le ma‘i lea na fai mai le fomai, na maua ai?
O le mea e sili ona tāua o le mataala o aiga, pe a alolofa moni i lo outou tagata la e tigaina i se ma‘i. Aua le faatamala i se mea e tasi. Poo ai e tofia e fai ma sooupu a le ma‘i ma le falemai, ia tautuanā le tusitusi uma i lalo o se notebook ni tala a soo se isi e fai atu i totonu o le falemai e uiga i togafitiga o fai i le tagata ma‘i, ma ni fautuaga i ni mea e tatau ona fai e le tagata ma‘i.
A fai ni taotoga (tipiga), tapue ni ata e faaleoleo i manaomia i se taimi o i luma. Tusi uma i lalo fualaau na inu, ma ni tui na fai.
O mea nei e tāua ia tapena auā le lumanai ae tupu mai se mea faaletonu i le tou tagata. E lelei le tupu mai o se mea ua faaletonu ae o lava a outou sauniuniga ma tapenaga.
A tusi i lalo ni mea e tutupu, manatua ia tusi le taimi, aso, ma le igoa o le tagata na faia le togafiti. Tusi i lalo le vailaau, fualaau, tui, ma mea uma sa fai.
Ia tautuana le tāua o le iai o se isi e molimau pe a tupu se faalavelave. Poo ai le molimau, tusi i lalo le suafa ma fai i lē o molimau, e fai foi lava lana ia tusitusiga e ese mai i le sooupu a le ma‘i lea na tofia e le aiga.
Ia manatua o le tagata ma‘i o loo afaina i tiga. O isi e afaina i fualaau ma vailaau o ave i ai. E lē tatau la i fomai ona na ona talanoa i le tagata la e ma‘i auā e tatau ona latou iloa o le tagata la e ma‘i e lē o manino tonu lona mafaufau o loo feagai ia ma tiga. O loo afaina foi ia i le malolosi o vailaau ma ni fualaau o loo ave i ai e le falemai.
A tou nofo tapena, a tupu mai se faaletonu i le tou tagata, e mafai ona fesoasoani atu pe a manino, ma mautu tusitusiga ma ni ata na tapue e fesoasoani pe a masalomia e le tou aiga, e sese le togafitiina e le falemai o le tou tagata lea na ave atu o malosi ae oti mai i le falemai.
Aua le fai i le fefe. Aua le talitonu i le tala a le fomai poo teine tausimai, ae o le tou tiute o le fesili ma faamaumau tusitusiga o mea uma e tutupu. E aogā tele nei tapenaga i se taimi o i luma pe a tulai mai se faafitauli.
E sili le puipuia i lo le togafitia. E lē na o se fautuaga lea ou te avatuina ona o lo‘u tulaga faaloia. Na ou oo i se tulaga lea e ta‘ua, ona o se tasi o tina o lo‘u aiga sa ou alu atu i le falemai e asi, ae ou maua atu ua tuu i le potu fai mai e faamavae i ai le aiga, ua leai se togafiti e toe aogā i ai. ‘Ua lē avea i ai se vaiinu, leai se meaai’. Na o le fetagisi o latou sa iai ma fai mai ua oo i lona taimi leaga na fai mai ai le fomai. Sa ou finau e fafaga ma faainu le tina ona sa tagi ane ia te au e fia inu, ina ua ou alu atu ma feiloai. E 6 masina na toe ola ai ma fiafia lenei tina ma nai ona alo, faato‘ā oo i ai le valaau a le Atua. Ana lē finau e maliu le tina, ae maliu fia ai ma fia inu!
O le tāua lea o le fautuaga i tagata o aiga, ia tutū ma le alolofa i lē ua ma‘i. Aua le fefe e fai le mea e tatau ona fai!
