Ua toe pau lava lea o faagatama a le Lalolagi e lei ausia ai e Samoa se Pine o taaloga o le Olimipeka. E pei ona silafia o le Tauvaga numera tasi lea o taaloga i le lalolagi, sosoo ai ma le Ipu o le lalolagi i le Soka. Ina ua tatalaina i le vaveao o le Aso Toonai i Lonetona lenei Olimipeka lona 30, na vaaia ai le sagisagi fiafia o le ‘au a Samoa faatasi ai ma isi atunuu e 204 o le lalolagi.
O se vaaiga faamomoi loto le agai mai o le ‘au a Samoa i totonu o le malae e taitai mai e le ave fu‘a ia Ele Opeloge. O le faamoemoe lenei o Samoa mo se pine muamua auā o loo tulaga tolu i lana aupaga i le lalolagi. E na o le tasi le kilo na misi ai e Opeloge le pine apamemea i Beijing i le 2008.
O le autaalo a Samoa e to‘a 18 e aofia ai sui o le Siisii uamea mamafa ia Toafitu Perive ma Ele, fana fulu‘aū (archery), alovaa (canoeing), Afeleti, Taekwando ma le Judo. O le susuga a Kaino Thompsen (taekwondo) le isi sui o loo maitauina le ono faateia ai o le lalolagi.
O se avanoa lelei faaauro e feiloai atu ai sui o Samoa ma tauva ma siamupini eseese mai le lalolagi. E lē gata i lea o tagata iloga o taaloga e pei o David Beckham, Muhammad Ali, Sir Sebastian Coe ma le toatele.
O le Afioga Toleafoa Douglas Greevey (BlueSky) o loo avea ma sui tusitala o le Pulega i le faasoa mai o ripoti ma ata o tapenaga a le au. O loo faatasi atu foi ma le Peresetene o le Asosi o Taaloga a Samoa Tapasu Leung Wai ma le susuga Seb Kohlhase (chef de mission) le taitai Malaga.
Na faaalia e Toleafoa o le vaiaso nei e amata ai tauvaga fana fulu‘aū (archery) lea e malaga atu ai Muaausa Walter, Salale Moananu ma Maureen Tuimalealiifano.
O le aloga vaa foi o loo auai ai Rudolph Williams e amata i le vaiaso nei ma faasolo atu ai lava lea o taaloga taitasi.
O le Aso Toonai, aso 4 o Aukuso e sii muamua ai Ele Opeloge.
Ma o le aso lea o loo talitali i ai le tapuaiga ina ia manuia e pei ona Pine Auro ai foi Opeloge i Initia i taaloga o Malo Taupulega i le 2010.
Vaganā ai ua faafuaseia se isi e maua se pine i luma mai, o se aso aupito maoa‘e tele lea mo taaloga a Samoa.
I se ripoti a le pulega ma le BlueSky Samoa mai Lonetona o loo manuia uma le autaalo. Talosia ia a‘e manuia le faamoemoe auā le tapuaiga.
O tafatafa ane o le aai o taaloga i le pitonuu o Middlesex na siamupini muamua ai le Taitoafitu a le Manu Samoa i le tausaga e 1992.
O le au na taitai malaga ai Marina Schaafhausen, faiaoga ai Taufusi Salesa, kapeteni ai Malaki Iupeli, Vaa Vitale, Alefaio Vaisuai, Jason Ah Siu, Leilani Une, Tapu Meleisea, Pasikale Faoagali, Reupena Reupena, Kalolo Toleafoa, ma Imo Tuatagaloa.
O nisi nei o lipoti lata mai i le au a le atunuu
Judo: Na amatalia taaloga a le alii o Aleni Smith o Samoa, i lana paga i le Aso Gafua, aso 30 Iulai, i le tauvaga Pa‘ū ma nofo i le aupaga o le 77 kilo.
Archery: O le tamaitai o Maureen Tuimalealiifano sa amata Tauva i le Aso Lua, aso 31 o Iulai.
Men’sWeightlifting: O Toafitu Perive na amata sii foi i le Aso Lua, aso 31 o Iulai, i le aupaga o le 77 kilo.
Shot Put: O le Aso Faraile nei, aso 3 Aukuso, e amata tauva ai le alii o Emanuele Fuamatu.
Women’s Weightlifting: O le Aso Sa, aso 5 Aukuso e amata sii ai Ele Opeloge i le aupaga o le 75 kilo.
Talosia ia manuia foi taumafaiga a si tatou au i le 2012. O tou māmā na. Go Team Samoa!!!
