O le Faaipoipoga, o se aso fiafia mo le ulugali fou, ae faapea foi ona sili atu ai le faafiafiaina o mātua ma aiga e lua, o uo ma aumea mamae e oo lava i ē masani.
E faapena lagona, uiga ma taga eseese atoa ma vaaiga sa laualuga i le aso tele o le alii o Lloyd William Ah Kau, ma le tamaitai o Rita Teulevalasi Tuimalealiifano-Nanai, ina ua taulau o le la faamoemoe.
Sa amatamea le fofoga o le aso MC, le tofa Faimalo Alan Stower, i le faataunuina o isi uiga mālie ma faafiafiaga e seāseā ona faia i aso faapea.
Ae sa maitauina foi ma le toto‘a le toatele o le mamalu o aiga ma uo, sa faatinoina e agaga lava lea e tasi o le fiafia ma le olioli.
O le alii o Lloyd o le alo o Tevaga William Ah Kau ma Kika Stowers, a o le tamaitai o Rita Teulevalasi, o le alo o le afioga ia Nanai Panapa ma le faletua ia Mina Tuimalealiifano Nanai. O se tasi o feau momoli mo le toatele o aiga Samoa, o le faafaigofieina, ma le faataugofieina o aso faapea mo le fanau.
E matuā leai se gaogaosa ma le tele o isi faiga masani o faaipoipoga faasamoa, peitai sa mamafa ma palasi tonu le tele o meaalofa ma faamanuiaga mo le ulugali fou, ma o se aso faigofie tele ona laasaga ma ona aga, e oo lava i le aganuu sa faafaigofieina.
O le susuga ia Fr Falaniko Stowers, o le ekalesia Katoliko, sa feagai ma le sauniga o le faaipoipoga, atoa ai ma Misisa Paia. O le susuga ia Pastor Fereti Maualaivao, o le Samoa Unity Church mai Sini Ausetalia, o le faifeau foi lea a le tamaitai faaipoipo, sa fesoasoani i nisi o polokalame o le aso.
Sa matuā faatumulia le Malumalu i Onehunga i le sauniga, atoa ai ma le nofoaga o le Event Centre i Manukau i aiga ma valaaulia faapitoa.
O le tofa a Sooalo Setu Mua sa fai ma fofoga o le auvalaaulia, e talifaitau i faaaloaloga ma le fofoga fetalai o le tausamaaga, le fetalaiga ia Faimalo Alan Stower.
E faamanuia atu ai mātua pele o le ulugalii fou, o aiga ma uo faapea ē masani sa malaga mamao mai Samoa, Amerika Samoa, Ausetalia ma Amerika, i le faato‘āfaiava, faapea le faatoanofotane, ma le aiga ua amata faavaeina.
Ia manuia tele le aiga fou ma ia foai e le Atua se fanau e fai ma pine faamau e saga faamausaliina ai le mafutaga ma le aiga fou.
