Avea ia lenei avanoa e momoli atu ai le faamalo ma le faafetai i le tatou atunuu, i tupu ma e‘e, faletua ma tausi, faapea foi susuga i faafeagaiga ma o latou faletua, le mamalu o Samoa aoao o loo afifio ma papaaao i Aotearoa nei. Faamalo le tauivi ma le finau i matata eseese i lenei tausaga. Faamalo le galulue ma le tautua auā le tausiga o aiga. Faamalo le saili malo ma le saili manuia auā alo ma fanau o loo lalovaoa.
Faafetai mo le tapuaiga o le galuega i lenei lava tausaga. Faafetai mo le lagolago mai ma le faamalosiau mai i soo se taimi ma soo se avanoa. Ou te lagona lava o lenei tausaga, o se tausaga sa feagai ai nisi o tatou aiga ma ni faafitauli tuga. E toatele nisi sa vāea mai galuega i lenei tausaga.
Sa iai foi nisi ua faaletonu le tamaoaiga ona ua siitia le tau o oloa ma auaunaga a pisinisi ma matagaluega. Ua siitia le GST, ma ua iai foi suiga o faiga faavae a le faigamalo ua aafia ai nisi o tatou aiga, aemaise suiga i a‘oa‘oga, i mataupu tau soifua maloloina, mataupu tau fale, ma mataupu tau fesoasoani i penefiti ma fesuiaiga ua iai nei lafoga totogi i le Malo.
O nisi foi o aiga ua faaletonu le tamaoaiga ona o nonogatupe ua faia i se tulaga ua maualuga tele lava le tului e toe totogiina, ma atili ai lava ona faaletonu le faasoasoa. E ui i lea o loo galulue punouai lava ia aiga ma tagi lava le tagata i ona lima auā le taumafaiga e tausi aiga ma ia maua e alo ma fanau se lumanai manuia, auā o latou o ta‘ita‘i o le lumanai.
E masani lava ona ou tautala i totonu o fonotaga a le Palemene o Niu Sila, o tupulaga lalovaoa a le Pasefika, o latou nei o le a faamoemoe i ai Niu Sila i le lumanai. E mafua ona ou faia soo lea faamatalaga ona o lea ou te vaai i faamaumauga a matagaluega a le Malo o loo manino mai le siisii pea i luga o fuainumera o le autalavou Pasefika. Ua mautinoa ia te au, o le isi 20 tausaga o i luma, o le a sili atu le fuainumera o talavou Pasefika, i lo talavou papalagi.
Ou te talitonu foi, o tupulaga talavou a le Pasefika o ni tagata ua matuā faamanuiaina e le Atua, auā e lē gata i le talenia i soo se matātā, ae e ese foi le aulelei. Ae e ui i lea, o tupulaga Pasefika foi, o latou nei o le a pito i sili ona feagai ma faafitauli o lenei olaga i Niu Sila. E lē gata i le maualuga o le fuainumera o nisi ua falepuipui ona o ni solitulafono, o loo maualuga foi fuainumera o nisi o loo faaletonu le soifua maloloina ona o ma‘i o le tino e pei o le suka.
O nisi foi ua iu mai aoga, ae leai ni faailoga maualuluga. O nisi foi o loo faigaluega i ni galuega e maualalo totogi. O le mafuaaga lea e masani ai lava ona ou faapea e tatau lava ona tatou galulue faatasi ina ia unai o tatou alo ma fanau ina ia tumau i le aoga, ma finau ia maua ni tomai faapitoa, poo ni faailoga maualuluga.
Ou te talitonu o le maua e tupulaga talavou o ni tomai faapitoa ma ni faailoga maualuluga mai aoga maualuluga, o le a fesoasoani lelei ai mo latou e tulai e avea ma ta‘ita‘i i aiga, ekalesia ma upufai o malo i tausaga o lumanai. E lē gata ia latou maua le poto ma le atamai mai aoga, ae ia latou maua foi le loto onosai i faafitauli o lenei olaga, maua le faatuatua i le Atua silisiliese, ma ia maua le tofa saili, maua foi le faautauta ma le faapalepale auā le faiga o faaiuga lelei mo le lumanai.
E ao foi ona tatou galulue ina ia taofi le sauāina o fanau ma le sauāina o tina ma le itupa o tamaitai i totonu o o tatou aiga. Ua lē o toe talafeagai ia amioga, ua tatau ona tatou maua le malamalama. Ua tatau ona tatou galulue ina ia maua e o tatou aiga aemaise fanau, ni nofoaga saogalemu i totonu o o tatou aiga, ia sefe mai i latou mai sauāga.
Ia mafai foi ona latou aloese mai le ‘avamalosi, le taumafa tapaa ma vailaau ma fualaau faasāina. O ia mea ua mautinoa lava i suesuega a le ‘au saienisi, ua toatele ua maliliu ai.
E ui o loo silafia e le toatele le tāua o upu masani a le Atunuu e faapea, e fafaga le fanau a tagata i upu, ae fafaga le fanau a manu i fua ma fuga o laau. A o le upu moni lava, afai e lē mafaia e tatou o mātua ona tatou faia ni faataitaiga lelei mo a tatou fanau, e toe tusi lima mai lava le tamaititi i o tatou sese pe a faatonu atu ae vaai mai e lē o tutusa a tatou upu ma a tatou amio ma faiga.
O le tausaga fou o loo lumanai nei o se tausaga tāua tele. O le masina o Mati 2011 e fai ai faigapalota i Samoa ma iloa ai foi poo ai e tulai mai e avea ma faigamalo, a o ai foi e avea ma le itu agai.
Ua taoto foi fuafuaga o le masina o Setema 2011 o le a faataunuuina ai taaloga o le ipu a le lalolagi i le lakapi, ma o le a maua ai le avanoa i nisi o aai i Niu Sila e talimalo i nisi o aulakapi.
O le tausaga fou foi o le 2011 e fai ai faigapalota mo le sailiga o se faigamalo fou mo Niu Sila. Ua foliga lava o le masina o Novema 2011 o le a faatino ai lea faamoemoe, ma e tatau lava foi ona tatou sauni i ai e resitala o tatou aiga ina ia mafai ona tatou palota.
Ia alofa faamanuia mai le Atua i le tatou Atunuu ia maua se Kerisimasi fiafia ma le saogalemu. Ia avea le faamanatuina o le aso na soifua ai le Alo o le Atua, e faafouina ai o tatou agaga ma taumafaiga. Ia tatou sao mai ni faalavelave ma ia tatou aulia atu i se Tausaga Fou manuia ma saogalemu.
