SATUPAITEA
ALOIAMOA Tua Savaii
ASIATA Wairaki Toevai
TAVUI TIAFAU Tafu Salevao
PALAULI SASAE
AFOAFOUVALE John Moors
LEAVAISEETA Savavau L. Tuipolu
MISA Lisati Leleisiuao Palemene
TAULAFOGA IAULUALO Fatufala
TOLUONO Feti
PALAULI LE FALEFA
FAUMUINA TIATIA Liuga
LE TAGALOA Pita
TIATIA Mapesone
INDIVIDUAL VOTERS
FALEOMAVAEGA Vincent Fepuleai
MAUALAIVAO Pat Ah Him
MULIAGATELE Alfred Hunt
PAPALIITELE Niko Lee Hang
TAMALETA Taimang Jensen
TUPA‘EMANAIA Anthony Stephen Brown
E lē fesiligia le atamamai ma le popoto o le mamalu o sui tauva mo itumalo eseese o le atunuu, ua aga atu nei mo le faiga palota tele mo le isi paeaiga i le vaiaso fou mo le 2011.
Peitai o le upu masani a le atunuu e olaola pea, Ia fili i le tai sē agavaa. E atamamai tautai, peitai e iai ogasami ma tai e lē oo i ai le silafia o nisi tautai. E iai foi taimi e soua, ma galua ai le gataifale, e lomaloma foi nisi tai o le atunuu, peitai o taimi tonu ia e fili ai se tautai matapalapala. O le poto masani ma le a‘oa‘oina ua selau pasene, peitai o le agavaa ma le faautauta e sili atu ona manaomia mo le fausia ma le tausisia o se malo mautu ma le malosi.
E telē se tāua o le faiga palota o lenei tausaga, ona ua na o le lua vaega faaupufai o loo tauva ai sui taitoatasi ma itumalo.
O le isi fesili tele, pe ua sauni se tasi mo le tofiga palemia? A faapefea pe a lē manumalo mai le Tautua Samoa e tusa ma lona manaoga? Ae faapefea pe afai na o nisi o le Tautua Samoa o le a toe foi mai, ma lē toe maua ai se fuainumera e mafai ai ona aloaia lea vaega faaupufai mo le agaia o le malo?
Ae mālie foi se vaavaai faanenefu i ai i se faaiuga o le a oo i ai le faiga palota. O le ā se finagalo ae toe malo mai Tuilaepa ma lana faigamalo, lē lava le numera o se itu agai, soloia e lē faaaogāina e le Fofoga Fetalai? Manaia foi le toe foi i le amataga, leai ni faiga pati ma ni vaega faaupufai, ae saili i le tofa ma le faautaga faafaleupolu mataupu i le taitaiga a le HRPP.
O le ā sou finagalo ae toe tulai mai le faigamalo o loo iai nei a le HRPP, ma faapea ane loa o le a ta‘i sefulu tausaga ma fai le palota, ia poo le tai luasefulu foi tausaga ma sui le nofoaiga?
Nisi o Itumalo e mataina le taufetuliga a sui tauva:
O le itumalo o Vaimauga i Sisifo, le isi tauvaga manaia tele, ma e tulimataia se faaiuga o le a tulai mai, ona o le taufai malolosi o sui tauva e pei ona faailoaina i le lisi. O Faleata i Sisifo, i le va o le Igoa Matua, Ale Vena ma Lealailepule Rimoni Aiafi.
O Sagaga le Usoga, e ao foi ona mata‘ituina e lē gata ina malolosi sui tauva, ma e matuā lagolagoina uma foi e le itumalo, ae lua sui mo le HRPP, ae toatasi le sui o le Tautua Samoa.
O Aiga i le Tai, e foliga mai ua lē mafai ona toe foi i le tulaga sa masani mai ai, e faasolo le tofi o le itumalo. O lona uiga o le a fai lava i le malosi ma le toatele o le aupalota a afioaga ma pitonuu, e manumalo ai ma maua se tasi mo le nofoa.
O Falelatai ma Samatau, o le a soosoo gata le sui o le Sui Palemia sa seei i le tofi mo se vaitaimi umi, le afioga ia Misa Telefoni.
O sui e toatolu o loo tauva, e lagolago uma e afioaga o le itumalo, o lona uiga e fai lava foi i le malosi o le faatosina ma le finau o le sui tauva.
O le itumalo o Safata, o le sui taitai o le Tautua Samoa, Palusalue Faapo II, peitai o loo foliga e lagolago tele afioaga ma le itumalo i le faigamalo a le HRPP. E lua nofoa o le itumalo, o loo malolosi tele foi sui tauva o loo tamomoe.
O Palauli i Sasae, ua tele ni vaega tau i le tulafono sa aafia ma o loo tauivi ma le sui a faipule o loo iai nei, atonu o le a avea ma lape o lona toe manumalo mai, peitai o ai na iloa lea tulaga i le faia o le palota a le tagata lava ia na o ia?
Tatou faanonomanū ma tatalo i le Atua, auā o i tatou lava ia na ona fuafua ma tatalo a o Ia lava o loo iai le faataunuuina o manaoga. Na pau le tatalo ia filifili tatau, filifili faatasi ma le agaga o le Atua le faia o lau palota, ina ia tusa ma le amiotonu ma manumalo ai, ma maua se ‘ai mo Samoa i le lumanai.
Ia manuia le faiga palota o le 2011
