
Ole naunautaiga lea ole tamā ia Toa Miti Faamafu, 64 tausaga le matua mai ile afioaga o Falevao ina ia ola manuia si ana fanau. Ose aiga e toaiva ma e faalagolago lava i aso uma i tupe e maua mai i faatoaga. E na’o le toatasi le tagata faigaluega o lea aiga, ole atalii lea o Toa e $175 le totogi ile vaiaso, ose vaega tupe e faalagolago iai le aiga mo aoga ale fanau, o meafai ale lotu, nuu aemaise ai le tausaga ole aiga.
E ui ose aiga e lē maua ele fanau a Toa le tele ole sosia oloo maua e fanau i Apia peitai na vaaia lava le laumata fiafia ole fanau ina ua feiloai ma le Talanoa mai Samoa. Saunoa le tamā ia Toa, e lē maua uma e lona aiga le manuia o sapi ai isi aiga e pei ole matamata ile TV, o meataalo mo le fanau, o lavalava i sikaili eseese, meaai taugata ma le anoanoai o manuia, peitai ole sini autu mo ia ole maua lea ole fiafia ole fanau ma lona aiga tusa pe iai pe leai foi.
Tasi le faafitauli o feiloai pea ma lenei aiga i aso uma, ole leai ose suavai, ma ole tauloto masani lea i taeao uma a’o lei amatalia feau ma tiute masani ole aso, e tatau lava ona muamua alu le asugavai e faaaogā ai paelo. E iai le punavai o lea afioaga e asu vai iai lenei aiga ile taeao ma le afiafi pe tusa ole 30 minute e savali agai iai. Ua uma ona taatia paipa ile fanua o Toa ma lona aiga ma le faamoemoe ile suavai peitai e oo mai ile taimi nei e lei au atu lava iai se suavai.
Saunoa foi lea tamā o auala o femalagaa’iga le isi faafitauli tele o feagai ai ma lona aiga ile taimi e agai ai ile lotu aemaise o taimi e toe a’e ai aoga ona e fai lava si mamao o lo latou nofoaga ma le vaega tonu o iai le faleaoga. Na ta’ua e Toa, e tatau ona ta le ono ile taeao ua sauni a latou fanau ina ia ‘afa ane le ono ae ua amata le savaliga agai ile faleaoga lea e tusa ma le 40 minute e savali ai, a tuua foi le aoga e toe savali foi i aiga.
E naunau lava Toa ina ia maua ni lumanai manuia o fanau a lana fanau aemaise ose avanoa e mafai ona malaga atu ai i atunuu e mamao e saili manuia ai ma alolofa mai i aiga i Samoa. Ua lua ai nei tausaga talu ona faato’a ai le fanua lenei ma aumau ai Toa ma lona aiga. Ose aiga e tua i faatoaga i aso uma ma le latou miti, a ola lelei faatoaga ua manuia foi aiga e ala ile aooga o fanau faatasi ai ma le tautua i aiga, lotu ma le nuu.
Ose aiga foi e tausi aiga tele pe a fua atu ile tele o ona tauaiga e asiasi iai lea tamā ma se ato meamata, a lē ose ato talo poo se ato ufi foi.
Ole fagaga foi e pei o moa ma meatuaolo e faavela lelei e talimalo ai lea aiga i o latou tauaiga e asiasi atu. Pau le agaga faafetai o lenei tamā ole tulaga lelei ole auala e agai atu i lo latou fale, afai foi e fuafua se meamata e ave ile maketi i Apia e mafai lava ona fesootai le telefoni ale avepasi ina ia agai atu e piki mai a latou ato meamata.
E lē ose aiga foi e faitio i mea nei ole olaga e lē o mafai ona o latou maua, ae ose aiga e ola fiafia lava latou i manuia ua maua i o latou lima, e ui e ese foi le olaga e vaaia i o latou laufanua faatusa atu ile olaga o soifua ai le tele o aiga i Apia ma nisi o afioaga.
Ole mau tauave lava ale tamā ia Toa, ia maua le ola fiafia ole fanau.