“Ia Leoleoina Lou Loto” – Tauaofiaga Faapitoa a Molimau a Ieova i NZ

O se vaaiga e lē masani ai aemaise lava mo le aai o Hemilitone, le matuā faatumulia uma o ona faletalimalo tetele ma faletalimalo laiti, o faletaumafa, o faleoloa, ma isi nofoaga faitele, i le faitau afe ma afe o sui o se tapuaiga e tasi, a o tumutumu atu mo se fuafuaga faapitoa.

O le aso 11-13 o Ianuari 2013 lea na usuia ai i nisi o nofoaga se lua mo faatasiga tetele i le aai o Hemilitone, le Mystery Creek Events Center ma le Claudelands Arena, le tauaofiaga faapitoa a le ekalesia Molimau a Ieova.

E tusa ma le 10,000 Molimau a Ieova na potopoto atu i nofoaga nei e lua i Hemilitone, e ese ai isi nofoaga tetele e 4 i aai e pei o Kalaiesetete, Ueligitone ma isi vaega o Aukilani, ma o nei nofoaga e 6 sa auai le aofia atoa e 20,042.

O le ‘au‘au poo le matua aoao o le polokalame faaleagaga mo aso e tolu
“Ia Leoleoina Lou Loto”, o se fuaitau mai le Tusi Paia i le Faataoto 4:23.

Ma o lauga uma faale-Tusi Paia, o faataitaiga, o faatalanoaga, sa taulai uma atu i lenei matua autū, ina ia toe faamanatu ma toe fafagu i auauna uma a Ieova, le tāua o le leoleomalu pe puipuimalu i o latou loto, ina ia lē faaseseina i le tele o faatosinaga leaga o loo luitauina ai i aso taitasi, ma ono toe taitai ese ai mai a latou tautoga na muai faia, o le a auauna ma le faamaoni ia Ieova lo latou Atua.

O polokalame o tauaofiaga a Molimau a Ieova, e faaaofia ai ma se tala faatino faale-Tusi Paia (Bible Drama), ma o le tausaga lenei, sa na o le vaaiga faaonaponei na faatino ai le tala, o lona matua: “O le ā le Alofa Moni?” lea sa matuā manino lona faatinoga ina ia momoli mai ai le a‘oa‘oga tāua, ia faaipoipo ona o le alofa moni i le va o le tane ma le avā, aemaise lo la alofa moni ia Ieova, o Lē na uluai faavaeina le faatulagaga o le faaipoipoga.

Sa mafai ona faapolokalame i fesootaiga tau satelite, ina ia fesootai uma nofoaga e 6 i le taimi e tasi pe a faia le lauga faapitoa o aso taitasi, lea na tauaao auauai e sui o le Vaega Pule o Molimau a Ieova mai lo latou faauluuluga i Brooklyn Niu Ioka, o Brother Geoffery Jackson ma Brother Kenneth Flodin. O lauga autū foi na sa tatala ai nisi o lomiga faale-Tusi Paia a le ekalesia, e fesoasoani i le faalauteleina o la latou galuega tala‘i e pei ona lauiloa ai.

O le isi vaega o le nofoaga i Claudelands Arena sa faatulaga faapitoa mo le polokalame i le gagana Samoa ma e tusa ma le 800 ma ona tupu le auusufono Samoa sa auai. Na malaga mamao mai nisi o sui Samoa o le ekalesia mai Kalefonia, Seattle i Amerika, Hawaii, Ausetalia, Tutuila ma Samoa, ona o le fia auai i lenei mafutaga faaleagaga ma o latou uso ma tuafāfine i Niu Sila.

O tauaofiaga tetele nei a Molimau a Ieova, e valaaulia ai o latou tagatalotu mai isi atunuu o le lalolagi ina ia asiasi atu ma auai i tauaofiaga i isi atunuu; o se avanoa lelei e tapuai faatasi ai, aemaise foi le auaufaatasiga faaleauuso i le lalolagi aoao.

Ma o se vaaiga lea sa tele ni lagona faaalia ai o nisi o tagata o le aai o Hemilitone, i lo latou matauina o foliga fiafia ma le fegalegaleai o tagata uma, mai soo se lanu ma soo se matua, a o tumutumu ai lo latou aai i lea faaiuga o le vaiaso.

O lenei foi faatasiga tele a le ekalesia sa matuā avea o se faamanuiaga mo le aai o Hemilitone lava ia i le itu tau pisinisi, auā na faaalia e nisi faipisinisi le telē o se siitia o a latou tupe maua a o lolofi atu le auusufono mo faatauga ma taumafataga, o se taimi o le tausaga na semanu e tau lē pisi ai pisinisi a le aai. Ta‘ua e se tasi o pule o se faletaumafa, le Iguana Restaurant, o Debbie Burgess, pe ā ma le 90 Molimau a Ieova na lolofi atu i le latou fale‘aiga i le afiafi o le Aso Toonai mo taumafataga, ma na matuā tumu ai le latou fale‘aiga i lea afiafi.

Mo le isi nofoaga i Mystery Creek, na ta‘ua e le faauluuluga o meafai i lena nofoaga, Sonya Anderson, o le tauaofiaga a Molimau a Ieova o se tasi o faatasiga e pito sili ona faigofie le faamaopoopoina e ui i le toatele o tagata na auai.

E to‘a 46 sui fou o le ekalesia na papatiso ai lenei tauaofiaga, ma ua ta‘ua aloaia ai nei i latou o Molimau a Ieova.

O le faaiuga lea o se faasologa o tauaofiaga faapitoa nei a Molimau a Ieova i lea matua e pei ona sa faagasolo mai le tausaga talu ai, ma ua sauni atu foi la mo isi tauaofiaga faapea i se isi taimi i le lumanai.