O le aso 24 seia oo atu i le aso 31 o Me ua atofaina o le vaiaso e faatauaina ai le gagana Samoa i Niu Sila. Ua fetaui lelei le faatinoga o lea faamoemoe ma le sisigafua o Samoa i le aso 1 o Iuni, ma ua onomea ma talafeagai ia te au, le sisiga o le tagavai o Samoa, e avea ma taualuga o le faatauaina o le Gagana Samoa.
Na faavae i le tausaga 2007 le amataga o le “Samoa Language Week’ i Niu Sila ona o le finau a le FAGASA Inc., le Faalapotopotoga mo le Aoaoina o le Gagana Samoa i Aotearoa.
I le tausaga 2009, ua manatu le Komisi o Aia Tatau o Tagata Soifua (Human Rights Commission) o le a galue e lagolagoina le FAGASA ma le tele o nisi faalapotopotoga tumaoti, ina ia faatino ni polokalame e faailoa ai ia Niu Sila atoa le taua o le Gagana Samoa ma le taua o le faaaogaina o le Gagana Samoa i Aotearoa.
I si o matou lava itumalo tele o Manukau, ma o le laumua lea o Aotearoa, o le Gagana Samoa, o le gagana o loo tulaga lua i le gagana faaperetania pea faatusa i le toatele o tagata o loo faaaogaina. E muamua le faaperetania, sosoo le Gagana Samoa, ae tulaga tolu le gagana Maori, i le toatele o tagata o loo faaaoga ia gagana i aso taitasi i Manukau.
Ou te manatuaina ao avea au ma talavou, e pei sa iai le talitonuga malosi a le toatele o matua, i tausaga ua mavae, ae maise lava i le vaitaimi faatoa taunuu mai aiga Samoa i Niu Sila, faapea ia ave le faamuamua o alo ma fanau i le aoaoina o le gagana faaperetania.
O le talitonuga sa iai, o le gagana faaperetania o le gagana lea e iloa ai le tamaititi poto ma le tamaititi atamai. O le tagata e lelei lana faaperetania, o le tagata foi lea e maua lana galuega filemu ma le galuega e totogi lelei.
E le gata i lea o le tagata e lelei lana faaperetania e faigofie foi ona maua lana sikolosipi e aoga fua ai i aoga maualuluga.
Atonu ua avea le faatauaina o le sailiga o le poto i le faaaogaina o le gagana faaperetania ona o galuega ma taumafiaga i avanoa mo aoga maualuga, ma tulaga ua toatele ai nisi ua matutua ae ae ua vaivai le malamalama ma le faaaogaina o le Gagana Samoa i Niu Sila lava.
O le mea ua tupu, ua toatele e na tuputupu ae i Niu Sila ua toe moomoo ina ia mafai ona latou faaaogaina le Gagana Samoa. Peitai ane, o le toatele lava ua galo upu ma faamatalaga. O nisi foi e malamalama i le tagata o loo faa-Samoa atu, ae ua le mafai lava ona tali ise upu Samoa e tasi.
O le mea lea ou te matua faafetai lava au ia, i le alofa o le Atua i le foai mai o lana meaalofa ia i tatou, o le Gagana Samoa lea.
Ou te talitonu, o le tagata Samoa ua le mafai ona tautala i lana gagana, pe ua le malamalama foi i le gagana Samoa, o le a le maua e ia le atoatoaga o lagona ma mafaufauga lelei e musumusuina ai lona agaga, seia vagana ua ia malamalama ma i le Gagana Samoa.
I le vaiaso ua mavae, sa ou asiasi i falepuipui mo tupulaga talavou i Wiri, Weymouth ma Hamilton. E toatele lava le fuainumera o Maori o loo nonofo vaavaaia i ia falepuipui faapitoa mo tupulaga talavou. Ae o loo iai foi ma nisi o alo ma fanau mai aiga Pasefika.
Sa ou talanoa lelei i nei tamaiti ma ou taumafai e taufaaofi io latou lagona ma mafaufauga upu o le alofa ma fautuaga, ina ia latou maua le agaga o le salamo, ma le agaga o le toe faafouina o le olaga, ma saili mea lelei mo se lumanai manuia. E ui sa latou faalogo i au upu, peitai ane, ou te masalosalo e leo faatauaina ia faamatalaga, aua nao le faaperetania e malamalama ai tamaiti.
Ou te lagona ana faapea e malamalama tamaiti Samoa o loo iai i le Gagana Samoa, ou te talitonu latou te lagona le taua o upu, aua o le Gagana Samoa o loo teu afifi lelei ai le alofa moni, le faamaoni, le salamo, le toe faafouina, le faatoesega, le ava ma le faaaloalo, ma le tautua.
O le Gagana Samoa e mafai ai ona musumusuina tupulaga talavou i lana tu, savali, nofo, taoto, ma le tautala. E malamalama ai o ia e suli mai tupu ma toa o Samoa, ae le’o ia ose fanau o manu (sei tulou).
O le Gagana Samoa e maua ai le tofa loloto ma le faautautaga mamao aua le sailiga o malo ina ia maua se ai mo Samoa ma tupulaga lalovaoa.
Ia manuia lenei vaiaso Samoa.
