Ia faataalo Toeava i lona tulaga sa‘o

Ua oo i le taimi ua tatau ai i alii faiaoga ona faatulaga sa‘o le alo o le atunuu ia Isaia Toeava, i le tulaga sa‘o lava e tatau ona taalo ai, ma o ina foi o le a iloa ai le lelei ma le maualuga o le tomai ma le taleni o loo i lea alo talavou o le atunuu.

O Toeava lea ua agai atu i le 24 tausaga o lona soifua, ua savali foi tausaga ia e tatau ona naenae ai ma nanamu le faalauiloaina o le Toeava moni lava o loo i totonu o le atigi. Peitai o loo le mafai lava ona maua lelei sona tulaga e ono tumau ai e aunoa ma le fetuunai solo i le laina i tua.
Na amata mai lava ia mau fetuunaiga mo Isaia ina ua filifili i le Olopeleki i lana malaga taamilo mulimuli i Europa i le 2006, lea na muai faataalo ai i le taaloga ma Sikotilani i le numera 15, sosoo ai ma le mei ane i le tulaga o le 12 ma le 13 a o taalo ai i taaloga o le NPC ma le Super 14 ma nisi o taaloga faitaulia faavaomalo.

Faapea foi le oo ane i le tulaga o le uigi, a o lea ua toe faatamoe nei e le Blues i le numera 15.
Ua faatolu nei ona vaaia Toeava i le fulupeki a le Blues ma e foliga mai e agavaa tele le alii i lea foi tulaga, peitai, i le vaai lava ia a se tasi o faamatua a Niu Sila i le lakapi, le tamalii faipisinisi Samoa ia Vaaiga Tuigamala, o Toeava ma lana sikaili tamoe, e onomea lelei lava ma fetaui ma le tulaga o le Uigi, lea sa tautaua ai Inga Tuigamala i le ofu uliuli.

Fai mai Tuigamala, atonu e faigata ona talia e nisi lea manatu ona o le uigi e manaomia ai le tagata e matua saoasaoa lava, peitai o Toeava o loo iai le pace ma le vave e faafuasei ai ona oso ma ofi atu i se vaapiapi ma ono faigata ai ona taofiofi e tusa foi ma le ituaiga fuaitino o loo iai.

O lona malosi foi ma le lē paie i totonu o le malae lea ua tatau ai lea tulaga ia te ia, ma o se tasi o filifiliga fetaui mo le Olopeleki a o agai mai le Ipu o le Lalolagi i le tausaga fou, ma o Pat Lam foi e lelei tele le la fesootaiga ma Graham Henry, e le faigata ai lea fuafuaga mo Toeava.

Ia talosia ia ae o gatasi le vaai mamao a Inga ma fuafuaga a Alii Faiaoga, ia poo le o gatasi foi o le futia ma le umele e pei o lea upu, aua lava se manuia o lea talavou o le atunuu, a o maua lona taimi ma lona avanoa e faatino ai.