Ua maua nei le avanoa e faaali ai le tāua o le Gagana Samoa i luma o le Komiti a le Palemene o Mataupu Aoga ma le Saienitisi pe a e faafesootai le Ofisa a le Palemene i se talosaga tusitusia ae e lei oo i le aso e tapuni ai talosaga, le aso 25 o Iuni 2012.
E tatau ona muamua lafo lau talosaga tusitusia i le tuatusi lea: Committee Secretariat, Education & Science, Parliament Buildings, Wellington. O le telefoni pe a manaomia le faafesootaiga o le Komiti o le (04) 817 9448.
E leai se tupe e totogi mo le lafoina o lau talosaga tusitusia. Ia tusi lelei lou suafa ma lou tuatusi ma le numera o le telefoni e faafesootai ai oe e le Palemene. Ia e faailoa i lea talosaga o loo e manaomia le avanoa e feiloai ai ma le Komiti a le Palemene.
O loo fuafua afai e toatele i latou e talosaga mo lenei avanoa, o le a malaga le Komiti a le Palemene i aai o loo afifio ai i latou o loo talosagaina se feiloaiga ma lea Komiti.
E tāua lenei avanoa aua o le sini lava o le Vaiaso o le Gagana Samoa ina ia amanaia ma maua le fesoasoani e aoaoina ai le Gagana Samoa i totonu o aoga i Niu Sila. Ua tele tausaga o galue punouai le Asosi o le FAGASA mo lenei faamoemoe.
O le talitonuga foi o loo taofi ai le toatele o faiaoga ma i latou o loo nafa ma le aoaoina o gagana eseese i aoga maualuga o le tamaitiiti e malamalama ma faaaogā le gagana a ona mātua, o se tamaititi poto foi lea.
O se tasi lenei o galuega e ao ona faailoa i le Vaiaso o le Gagana Samoa lea na amataina i le Aso Sa 27 o Me seia oo i le Aso Toonai le aso 2 o Iuni 2012.
Mai le tausaga 2007 na amata ai ona faalauiloaina i aoga e le Asosi mo le Aoaoina o le Gagana Samoa i Aotearoa, FAGASA Inc , le tāua o le gagana Samoa.
Mai le tausaga 2009 sa faipaaga ai le FAGASA ma le Komisi o Aiā Tatau ma isi faalapotopotoga ina ia faalauteleina ai le vaiaso i le tele o isi komiuniti i Niu Sila.
Ua faamanatuina nei le vaiaso o le gagana Samoa i Niu Sila, Ausetalia ma le Iunaite Setete o Amerika faapea foi ma komiuniti o tagata Samoa i le lalolagi lautele. O paaga o le Vaiaso o le Gagana Samoa mo le 2012 ua aofia ai le FAGASA, o le Komisi o Aiā Tatau, o le Komisi o le Atunuu Atoa a le UNESCO, ma le Matagaluega o Tagata Atumotu.
E sili atu i le 130,000 tagata Samoa i Niu Sila. O le komiuniti Samoa e lona fā ai lea o komiuniti pito i toatele i tua mai o tagata Europa Niu Sila (2,381,000), Maori (565,000), ma Saina (147,000).
O le gagana Samoa o le gagana lona tolu e pito sili ona faaaogāina i Niu Sila i tua mai o le faaperetania ma le faamaori.
O le tausaga foi lenei o le 2012 o loo faamanatuina ai le atoaga o le 50 o tausaga talu ona tutoatasi Samoa ma le faaauauina pea o le mafutaga ma Samoa e auala atu i le sainiga o le Feagaiga Faauo poo le ‘Treaty of Friendship’.
O nei faamanatuga e lua o le a faia lea i le 2012 ma e faapito lava i le Aso na Tutoatasi ai Samoa, le aso 1 o Iuni ma le sainiga o le Feagaiga Faauo i le aso 1 o Aukuso.
O le Aso Lulu o le vaiaso nei e malaga ai le Kovana o Niu Sila e auai i sauniga fiafia o le Tutoatasi i Samoa.
O matou o faipule Samoa i vaega faaupufai o le National, New Zealand First ma le Leipa ua valaaulia e malaga faatasi ma le Kovana e fai ma sui o le Palemene a Niu Sila i sauniga faamanatu o le Iupeli Auro o le Tutoatasi a Samoa.
O le masina o Aukuso 2012 o le a malaga ai le Palemia o Niu Sila faatasi ma taitai o le Leipa ma isi vaega faaupufai o le Palemene a Niu Sila i Samoa e faamanatu ai le sainiga o le Feagaiga Faauo i le va o le Malo Niu Sila ma Samoa.
Ou te manatu e toatele tagata Niu Sila e le o malamalama e 48 tausaga le umi na pulea faakolone ai e Niu Sila Samoa.
Ou te manatu foi e toatele tagata Niu Sila e le o silafia o le tausaga 1918 na faataga ai e le pulega a Niu Sila le vaa o le Talune e taunuu i Samoa e ui sa iai tagata mama‘i i le faama‘i o le ‘flu’ i lea vaa ma e 22 pasene o tagata Samoa na maliliu ai ina ua pipisi lea faama‘i i Samoa.
O se faama‘i sa mafai ona taofi ma puipuia ai Samoa pe ana lelei le pulega a Niu Sila sa iai.
O lalo foi o le pulega a Niu Sila na mafua ai ona maliliu tupu o Samoa e aofia ai le afioga ia Tupua Tamasese Lealofioaana III ina ua osofaia ma faaaogā ai laau malolosi e leoleo Niu Sila i le savali filemu a le Mau i Apia i le tausaga 1929. Na maliliu ai Samoa e toaiva ae faamanu‘alia le 50 Samoa i lea lava faalavelave.
O le mafuaaga foi lea na faatoese ma faamaualalo ai le Palemia o Niu Sila Helen Clark i le Malo Samoa i le tausaga 2002. Ua talia e le Malo Niu Sila o latou sese sa faia ia Samoa i le vaitaimi a o pulea e Niu Sila Samoa.
Ou te manatu e ao i tupulaga Samoa i Niu Sila ona faatalanoa ma fesiligia le Malo Niu Sila, afai ua latou talia sese na fai i tausaga ua tea, e iai se isi galuega e i tua atu o le faatoesega lea na fai e Helen Clark, e tatau ona faia e le Malo Niu Sila mo Samoa?
