O se tasi o polokalame fou ua faaigoaina faapea, Know your Rights, o le a faasalalauina i luga o le Televise a le Triangle. O le polokalame sa fafauina e le alii Faatonusili o lea foi televise, mo tagata lautele.
O le naunau ina ia faalauiloa faalauaitele aia tatau a tagata uma, aemaise ai o se faamanatu ma se fafagu mo tagata uma, ina ia silafia lelei, o aia tatau uma a tagata taitoatasi, o loo umia ma faatonutonuina i lalo o le tulafono e tasi.
E toatele ma anoanoai tagata Niu Sila, o loo feagai pea ma le tele o faafitauli tau i le tulafono, peitai e le o malamalama lelei, poo fea, a o ai foi e ao ona fesili i ai i mataupu eseese o loo aafia ai.
O nisi ua na o nai solitulafono māmā e pei o sala o taavale, ae ua matua faaavega mamafa lava ia i latou.
Ua le gata ina matua mamafa i lagona ma manatu, a ua faatupu popole foi, ma o se faafitauli ogaoga lea o loo feagai ma tagata taitoatasi ma tagata lautele o Niu Sila.
Ae i le mau ma le manatu o le Loia faapitoa o loo nafa ma le faatautaia o lea polokalame, o loo taua ai e tusa ma se pepa o faamatalaga e faapea:
O le isi lea agaga ma le faamoemoe autu o le polokalame, ina ia faailoa i tagata o le tele o faafitauli laiti ma solitulafono mama, o loo tele le avanoa e faatautaia ai e le tagata lava ia.
O lea avanoa e mafai ai e le tagata lava ia, ona faia fesootaiga ma foia faafitauli, e aunoa ma le tau agai e vaai se Loia, ma totogi i ai ni tupe se tele e tusa ma se galuega laitiiti e foia lava e le tagata latou ia.
O le isi tulaga o loo atugalu i ai le Loia ma le polokalame, ona o le isi lea mafuaaga o le pagatia o tagata lautele, ona o pili a Loia, ma ua oo ai lava ina faia nonogatupe mo totogi o Loia i mataupu ma solitulafono māmā.
O le mea sili ma le naunautaiga lava lea ua fafau ma faataunuu ai lea polokalame, ina ia fesoasoani mo tagata uma, ina ia silafia ma ia malamalama lelei i aia tatau, e umia ma finauina ai se faaiuga talafeagai e tusa ma le tulafono, nai lo le sulufai i Loia, talu ai le popole ma le soona atuatuvale, ma iu ane ai i le totogi o tupe se tele, atoa ai ma le faia o nonogatupe e le manaomia.
O le Aso Tofi i le afa o le valu i le afiafi (8.30pm), ua fuafua e amata ai lenei polokalame fou i luga o le televise a le Triangle.
E iai le talitonuga o le alii Faatonusili o le Triangle TV, le susuga ia Jim Blackman, o ia foi o se Loia, o le a matua fesoasoani tele lenei plokalame mo tagata uma o Niu Sila.
Sa ia taua foi o le polokalame ua fuafua e faasalalauina e tusa ma le 13 ni ona vaega poo vaaiga o le a faagasolo i vaiaso taitasi i luga o le Triangle. O se tasi o vaega, o tautoga ma se vaega o le faataunuuina o polomisi e ala i le tautua le faatuaoia a le Televise, ua tusa nei ma le 14 tausaga talu ona auauna.
O le polokalame o le a faatautaia lea e le Loia o Catriona MacLennan, o se tasi o Loia ua leva ona auauna mo mataupu mo tagata lautele i le itu i Saute o Aukilani. Ua lava lona silafia, ma ua sefululua (12) tausaga o faia pea lea galuega fesoasoani mo soo se tagata o Niu Sila.
Fai mai MacLennan, afai e malamalama ma silafia e tagata uma a latou aia tatau, ma le nofoaga tonu e faamatuuina ai faamatalaga, o le a fesoasoani tele lea ma o le a penefiti ai le mamalu o tagata lautele.
Manatua le Aso Tofi, aso 26 o le masina nei o Aperila i le afa o le valu i le afiafi (8.30pm), i luga o le Triangle TV, ae toe faasalalauina lea polokalame i le afa o le lima (5.30) i le afiafi o le Aso Faraile e sosoo ai i le Triangle Television Channel UHF 41 Auckland.