Ia e faapelepele i ou faamanuiaga

Ina ua faatoa amata le ma faigauo ma le tamaitai o Viena, na fai lava lau tala i si ou tina ina ua ou tau i ai ua fai lau uo teine, ‘o se taimi muamua lea ua ese ai le malolosi o ou lagona fia mafuta i se tamaitai.’
Ou te manatua le ataata a si ou tina ma tago mai uu atu lou lima, ‘talofa e, i si au tama, o le a la le uiga o lau tala?’ Sa faamimigi atu i ai ou tauau ua pei ua ou tau matamuli e tau uma i lou tina isi mau lagona ua lofia ai ou mafaufauga i lou naunau tele i le tamaitai o Viena i lea taimi.
O fautuaga masani a le tina alofa lea foi na aumai uma e si ou tina ia te au i le ma talanoaga, ma e oo mai i le taimi nei, pe a ou toe nofo ma mafaufau i lea talanoaga taua ma lou tina, ua matua ou ioeina ai ana tala uma na faufautua mai ai.
E tele tala a si ou tina, ae o lana faamanatu e pei o se faaata manino i lou mafaufau i taimi uma, ‘Sola, o tama teine o purinisese a o latou tama. Ia e faamautinoa lelei, ua e nofosauni e tausi le purinisese a le isi aiga.
O se matuā lē alofa lou faatauga i pele a isi matua ma isi tuagane.’
E leai se mea o Viena e lei faamalieina ai lou manao ma lau vaai, ma e ui lava sa tele isi tamaitai sa masani foi ona matou faifai mea faatasi ma ou tau faamatamata tasi i ai, ae ina ua ou masani ia Viena, na faafuasei lava ona loka ai loa iina ou manaonaoga, ma ou faapea ifo ai i lou loto, ‘o lou tofi lava lenei mai le Atua.’
O le mea lena e le galo ai ia te au si ou tina e ui ua momotu e le oti le ma mafutaga, ona sa mafai ona ou tatala i ai ou lagona e uiga i lau uo tamaitai.
Ma ou te mautinoa o le mafuaaga foi lena na lelei ai le amataga mai o le ma faigauo ma Viena, ona sa iloa e lou tina, ma e lei mapu i le tele o aso e faamanatu mai ia te au auala mama uma ma le faaaloalo e tatau ona ou faatautaia ai lea laasaga o le olaga ua ou manao i ai.
Na manao foi Viena ia faailoa i ona matua le ma faigauo, ma sa ou ioe i ai e ui i totonu o lou loto sa matua tatavale ona o lou popole i teena mai au e le aiga. Ae leai, na matua ese mea na ou faatalitalia, ma le aga tamalii o le aiga na faaali mai ia te au ina ua matou feiloai.
O le ala lea ua ou nofo nei ma ou toe inoino lava au ia te au, ma ou faapea ifo, o au moni lava e fetaui i ai le upu, ‘ua maumau penina i uli’. Tafefe pe ana faapea o soifua mai lava si ou tina ma vaai i le taunuuga ua oo i ai lou olaga ona o lou le faataua o ana apoapoaiga.
Lenei ua na o le toe moomoo maimau e, pe ana toe foi i tua le vae o le uati, maimau e, pe ana mafai ona ou toe maua mai la‘u Viena sei ou tootuli i ona luma ma augani ina ia faamagalo mai au, ae paga lea, ua masaa le ipu vai.
Ou te faia pea lenei upu, ‘ou te le iloa lava poo le a tonu le mea na sasi,’ peitai ia te au lava ia, e pepelo lea upu ou te faia soo.
A fua i le tele o avanoa lelei sa ou maua ai ni apoapoaiga mai se tina alofa, le avanoa telē na semanu ou te maua ai se aiga sili ona tamalii sa latou talia lelei au, aemaise se tamaitai na faamanuia mai ai au e le Atua, ae o lenei ua mamulu ese uma na faamanuiaga, talu ai au le tagata le fautuaina ma le faamaualuga.
E le sese lava upu a le Tusi Paia, o le tagata faamaualuga e iu ina faamaualaloina. O le tulaga moni lena ua ou iai nei.
Ua leai se tina alofa, ua leai se aiga na semanu ou te ola fifilemu ai o se faiava, ma ua leai atu ma se teine e lalelei foliga ma lalelei le amio, ae ua totoe nei na o au le tama ua matua gaogao ii lava le olaga.
O le uluai ono masina o le ma faigauo, oka se manaia! Na ou iloa le losilosi mai o isi au uo ia te au i lou maua o se tamaitai lalelei, atamai ma tumu i uiga tauagafau.
O lau lava molimau, ailoga o toe maua gofie ituaiga o tamaitai faapea i lenei vaitau. I lena ono masina faaauro, poo fea lava se vaipanoa ma te feofeoai ma talatalanoa ai na o maua, e le mafai ona faaalia mai e Viena ni uiga poo ni faamatalaga e faamaite ae ai ni faanaunauga sese o se tama tane e faatino ni amioga lea e taua e le toatele o le faaaliga o le alofa, ae o le mea moni lava, o le faamalieina lena o tuinanau le talafeagai.
O le Viena lena sa ou mitamita ai ma ou nenee ai i le va ma isi tama o lau tupulaga.
Ma na tasi le moemitiga sa ma tuu taula uma i ai, ia faaiu lelei a ma aoaoga i le iunivesite ma ia maua ni galuega e amata ai le olaga, ona fuafua ai loa lea o se aso e tuufaatasia ai i maua i le sakalameta o le faaipoipoga.
Ou te iloa o lou sasi lena, atonu ua ou mautinoa naua i lou atamai, ae ua ou le faalagolago i le poto mai le Atua.
Ua punapuna ae uiga fiasili ma le faalialiavale ia te au, ua lagona le nenee pe a faaviivii mai uo, seia oo ina ua suamalie le fia faalogologo pea i nei viiviiga ae galo ai ia te au, ua mamao ese lava lau alu, o lea ua ou tofu i le lua o leona feai.
Sa faufautua mai Viena ia te au, ae ua iai le lagona musua e toe talia ni fautuaga, e ui o lou alofa mo le tamaitai sa leai se mutaaga. Ua leai foi si ou tina sa faigofie ona uai atu i ai ou taliga.
Ua ou malosi i le ava a o faagasolo tausaga mulimuli o a ma aoaoga i le iunivesite. Na iu ina uma le tausaga ae ua iai le tala faanoanoa, e na o Viena na pasi, ae ua le manuia au taumafaiga.
Ua sosola nei uo, ae ua ufitia lou lalolagi i lea taimi i lagona ita ma le masiasi ma ou tuuaia ai si au uo pele, i lona faalavelave i lou olaga.
Sa tagi Viena ma taumafai e faamalamalama lou mafaufau, ae atonu o le taimi tonu lea na matua saofai faamagalua ai Satani i lou ulu, ma matua unai au ia aua lava nei ou toe amanaia ni upu a Viena.
O le malosi tele o lou tiga na ou lafo ai le upu ia Viena ua ou le toe manao ia te ia, seia oo ai lava ina ou liliu ma matua faato‘ato‘a lelei loa le olaga tafao ma le faiuo.
O le taimi tonu lena na afatia ai loa lou vaa, ma tafea atu i le vasaloloa o le agasala sa pei o se mea suamalie ia te au i lena taimi, ma ua le iloga se tamaitai ua ou faasaolo solo ai.
E lei fiu gofie Viena e faatali mo au ma taumafai pea e toe sosoo le ma mafutaga, ae paga lea, ua savali i le tolu masina ua le toe maua lava e Viena le Sola lea sa alofa i ai.
Ona liliu ai lea o si teine ma toe fai se isi amataga fou i lona olaga, seia oo ina ua suia le alii ua la mafuta ma faamautu i le faaipoipoga mulimuli ane.
O ina tonu lava na toe taia ai lou mafaufau ina ua ou fetaui atu i se tasi o au uo i le taulaga ae faapea mai, “Na e iloa o le Aso Toonai na tea nei lea na faaipoipo ai Viena ma Roy?” E leai sau tala na faia, ae na ou lagona e peiseai ua ou pau malosi ifo mai se mea maualuga, ma na faafuasei ona pepe atoa ou tino ma mou atu lou malosi, o lagona o le tagata ua leai se faamoemoe.
Na ona ou ulufale lava i lou potu, ou tagi masusu loa e pei o se tamaititi na sasa faamoamoa e sona tina, ua toe faasolo mai uma i lou mafaufau le taimi atoa o le ma mafutaga mafanafana, ae o lenei ua ou le afu i faamanuiaga o le alofa moni o Viena ia te au.
Ua ou tagi ma tautau si ou tina, ‘Mama ea, aisea ua e lafoai mai ai au’.
Na toe tau vave lou mafaufau i le tala a lou tina, ‘Sola, o tama teine o purinisese a o latou tama…O se matua le alofa lou faatauga i pele a isi matua ma isi tuagane’.
Ua matu vave ou loimata ona ou saofai ifo lea i luga o lou moega ma ou faapea ifo i lou mafaufau, ‘amuia oe Roy o le a e mafuta e faavavau ia Viena.
O lo‘u lava faavalevalea ma lou faatamala lenei ua ou faapenei ai’.