Gugulu le filiina o se faiaoga taitoafitu Manu Samoa

O le po o le Aso Faraile na tea nei na faia ai le faaiuga a le Komiti faafoe i le faiaoga ua filifilia nei mo le aulakapi taitoafitu a le Manu Samoa, ae Aso Toonai na sosoo ai valaau mai i le tusitala se tagata ua leva tausaga o lotolotoi i le taaloga lakapi i le itu tau faasalalauga ma ia faailoa lona lē talitonu i le filifiliga ua taunuu i ai le iuni lakapi a Samoa mo se faiaoga o le aulakapi taitoafitu.
“Ou te lē talitonu o le sui lea e tusi aao i ai le filifiliga a le panel na lauliliuina talosaga ma faatalanoa i latou na faia i ai le iuga mo se faiaoga”, o le finagalo lē mautonu lea o le molimau ua lē mafai ona faailoaina lona suafa.
O le mau a lea sui sa ia maua faamatalaga mai nisi e latalata tele i le galuega sa faia o le sailiga o se faiaoga, ma faailoa ane ai na iai se sui o le panel poo le laulau na faia le faaiuga, sa ia lē talia le taunuuga o le faatalanoaga poo le interview mai ia i latou na short list poo sui na talosaga na filifilia mai le aofaiga atoa o i latou na tuuina atu tusi talosaga mo le avanoa.
O aiaiga o le avanoa na faasalalau e manaomia ai i latou e iai le agavaa i le lakapi ma o loo umia le tusipasi o le level tolu poo le level three i le tulaga o se faiaoga poo se coach. I le faamatalaga a le molimau na ia faailoa le gugulu o se tasi o le laulau na faia le filifiliga i le taunuuga, sa finauina e lea sui o le laulau poo le panel, ina ia faailoa atu i luma le tusipasi level three o lē ua tofia.
Peitai e tusa ai ma le faamatalaga a le molimau, e leai se mea na tuuina atu ae na o le faamatalaga a se tasi o sui o le laulau le panel, o loo iai le tusi o le sui talosaga ua faia i ai le faaiuga. O le a tuliloaina pea lenei mataupu, ae mo le faaiuga ua taoto mai nei ua faaalia ai i se pepa o faamatalaga mai le iuni lakapi a le atunuu:
“Ua faalauiloa aloaia e le Iuni Lakapi a Samoa le tofiaina o le Susuga ia Viliamu Punivalu e avea ma faiaoga ulu o le Manu Samoa taitoafitu. O le tofiaina o Punivalu na faamaonia i le fonotaga faapitoa a le fono faatonu a le Iuni Lakapi a Samoa i le afiafi nei aso 19 o Iulai 2013.
Na momoli le faamalo a le taitaifono le Susuga Tuilaepa Fatialofa Lupesoliai Sailele Malielegaoi i lē ua tofia, ma faapea foi ona ave i ai faamanuiaga i lona tofiga. E toa sefuluvalu tusi talosaga, toa fitu na filifilia mo le faatalatalanoaga o le avanoa.
O le susuga Viliamu na avea ma faiaoga ulu o le aulakapi a Vaiala i tausaga ua mavae. O loo avea ma faiaoga ulu o le aulakapi i lalo o le 20 tausaga le matutua, lea na auai i le ipu o le lalolagi i Farani.  O le au foi lea a Samoa na siitia mai lona tulaga mai i le tulaga 10 sa iai i le faatulagaina o ‘au i lalo o le 20 tausaga le matutua i le tulaga 9”.
O lipoti na faaalia ai o nisi sa filifilia mo le faatalanoaga o le avanoa e aofia ai le sa avea ma faiaoga le susuga Tausa Faamaoni Lalomilo ma lē sa avea ma lagolago ma taitai malaga le susuga Fataalii Milovale Moke. Ta‘ua foi i lipoti o se tasi o alo o le atunuu lauiloa i le lakapi le afioga Muliagatele Brian Lima sa talosaga, faapea foi ona toe talosaga le tasi o alo o Samoa sa avea foi ma faiaoga o le au taitoafitu le susuga Rudolf Moors.