Na amata toe lalaga mai le asosi poo le faalapotopotoga o Taulasea Samoa o loo tautaulia le tulai mai o lona peresitene le susuga Vaitogi i le tauaveina o le taitaiga o le faalapotopotoga.
O sui o le asosi o tamā ma tina o loo faia le galuega o le fofo o soo se gasegase i le faaaoga o togafiti faasamoa ma vai mai lau laau o le laufanua. O le taimi nei e le o maopoopo le talitonuina atoatoa e nisi o sui o Taulasea o le latou taitai poo le pelesitene.
E tele vaega o loo mafua ai lea tulaga le talitonu ona o le faafoeina o le galuega o loo faia e taulasea.
O nisi o sui lesitala o le faalapotopotoga o loo galulue i fale Samoa i tua atu o le maota o le pulega o tagata tafafao i le eleele fou.
Faaalia e se tasi o tina taulasea ua le faailoaina lona suafa, ua le fiafia le toatele o sui ona e le o sagatonu le faafoeina o le faalapotopotoga e faapitoa lava lea i le itu tau tupe.
O loo ao e taulasea o loo galulue i le eleele fou le $50 tala mai gasegase e lesitala ai pe afai o se ma‘i faatoa oo atu.
O le seleni lea e ave i le tusitupe a le asosi ae o se faamanuiaga mo le galuega o loo latou faia e tuu lava i le va o le gasegase ma le taulasea.
Na faaalia e le tamā matua o Asiasi Aumua, ua silia i le 80 tausaga o lona soifua, e le maua ni o latou totogi i le galuega o loo fai aua e le totogia le auaunaga. Peitai o loo nunumi sui poo taulasea poo fea o faaaoga i ai le tai lima sefulu tala o loo ao ma ave e teu.
E oo i sina seleni e faatau ai se latou meaai mo aso taitasi, pe faatau ai foi se mea faiti ma se suka e lipi.
“O le tulaga lena o loo gugulu ai le toatele o matou ma ua iai nisi taulasea ua le toe o mai iinei, ae ua toe foi lava le tagata ia i lona aiga e fai ai le galuega”.
O pasese mo feoaiga i aso uma i le usu i le taeao ma le toe foi i le fale e le o maua se fesoasoani mai le asosi.
O lau laau mo vai faapea fagu suauu o loo fofo ai gasegase o le matafaioi lava lea a le taulasea. “Ua tatau i le peresitene ona tulai mai e faatino le tulaga tonu e tatau ona faagaioia ai le matou faalapotopotoga, aua e foliga mai i la‘u vaai e le o lelei le faafoeina o si a matou asosi”. O le faamatalaga lea a se tasi o taulasea. E leai se isi o taulasea na talatalanoa i ai le tusitala o silafia pe fia se aofaiga o se seleni o loo teu i le teugatupe.
“Na fesiligia e le tusitala le tulaga o loo faatino ai le tautua a taulasea ina ua faamalamalama ane e le tamā matua o Asiasi o soo se gasegase lava e taunuu atu mo le taimi muamua e totogi le limasefulu tala o le lesitala. Peitai na fesili i le tamā matua pe faapefea pe a manuia le ma‘i ae toe oo atu le tagata lava lea i se isi taimi e manaomia se fesoasoani mo se isi gasegase.
O le tali a Asiasi e toe totogi foi le isi tupe tusa lava foi pe toe oo atu ona o le ma‘i sa aafia muamua ai.
Na le mautonu le faalogo ina ua faapea mai le tamā matua e leai se isi o latou o silafia ma iloa poo fea tonu o loo faaaoga i ai le ta‘i limasefulu tala o loo tapa e totogi e gasegase.
Faaalia e le tamā matua o le tele o aso e saosao nai taulasea i seleni e maua mai ia latou ma‘i e fofo ona ave lea faatau ane ai se latou tausiga o le aoauli ma faatau ai foi se iputi vevela ma tapaa a nisi o taulasea e lavea i le vasega o le au ulaula.
E faia le talanoaga a le tusitala ma taulasea o loo malaga le peresitene ma nisi o sui o le laulau a le asosi a Taulasea Samoa i Salafai mo le faatuina o se isi auaunaga i le taulaga o Salelologa.
Na valaau i le numera o le telefoni na tuu mai e se tasi o taulasea e maua ai le peresitene, ae e na ona tatagi ma tali mai le masini ae leai se isi na tali mai.
O le Aso Gafua 7 o Me 2012 o le a faia ai le fono tai masina a le asosi lea ua faamoemoe sui e fesiligia ai vaega o loo faaletonu i le latou silasila i le faagaioia o le asosi.
