“Ua lē iloa e le atunuu poo ai a talitonu i ai”…Palusalue
Ua silia nei i le masina poo le fā vaiaso o tatali le atunuu poo fea ua agai i ai suesuega a leoleo ma moliaga faasaga i le Sui palemia ma se tasi o ana minisita lagolago.
Ua uma ona faailoa mai e le Minisita o le Matagaluega o leoleo ma falepuipui i le tusitala o le Samoa Times, ua oo atu le lipoti ia te ia a leoleo ma ua ave foi le lipoti lea i le Palemia ua faailoa atu ai le molia o le tofa Fonotoe Nuafesili Pierre Lauofo ma Muagututagata Peter Ah Him.
Peitai e uma le vaiaso ua mavae atu nei e lei toe maua lava se faamatalaga mai le sui Komesina o leoleo le susuga Leiataua Fata Aviga Salale, poo ua faatino le tuuina atu o moliaga, e tasi mo le Sui palemia ae tasi foi mo le minisita lagolago o Muagututagata.
Na muta mai se iloa i sailiiliga na faia i le mataupu i le faaaliga mai a le sui komesina, o loo agai leoleo e faailoa i le Sui palemia ma lana minisita lagolago moliaga ua faia.
O le moliaga o le Sui palemia o le faalavelave i galuega a leoleo, ae o le minisita lagolago o lona lē usitaia o aiaiga o le tulafono e faasino i le faaaogāina e leoleo o le masini mānava poo le breathalyzer lea e iloa ai o loo tagofia e se ave taavale le ‘ava malosi, ma iloa ai foi le maualuga o pasene o le ava malosi ua inumia.
I se feiloaiga a tusitala ma le Itu agai na faaalia ai e le afioga Palusalue Faapo II le taitai o le Itu agai, ua matuā pogisa le atunuu i le mataupu lenei ma ua leiloa poo ai a talitonu i ai.
O le finagalo o Palusalue e faasino i finagalo o le matagaluega o leoleo ma ona taitai sa ta‘ua ai o loo faia suesuega, ae mulimuli ane foi faapea mai ua suesue leoleo na tiute lea na latou lipotia le mataupu i le Sui palemia ma le minisita lagolago. Na sosoo ai ma le tagi a le afioga Muagututagata faasaga i se tasi o ia alii leoleo i se isi gaioiga lata mai nei na taofia ai le taavale a le minisita lagolago ma fautuaina e feula le masini manava.
O loo tuua‘ia ai e le minisita lagolago lea alii leoleo i le toe taofia o ia e foliga ai o loo tulituli‘aupu o ia ma le faatinoga o le tiute o lea alii leoleo e lei lelei. Peitai ua tali le alii leoleo o Maanaima Patu ma ia teena ia tuua‘iga ma lana faaaliga, o le tiute masani o leoleo ma sa lelei foi le faatinoga ae seiloga e manao le minisita lagolago e faapitoa se tiute o leoleo e fai ese ai lava le siakiina o tagata faapei o ia o le faipule o le Palemene.
Sa maua ni molimau e lei faamaonia na ta‘ua ai ua uma ona faaulu e leoleo moliaga o le Sui palemia ma lana minisita lagolago i le faamasinoga ae peitai o sailiga i le ofisa o faamasinoga i le fia faamaonia pe moni ae poo le ā foi le aso ua faatulaga e valaau ai, na iloa ai e lei oo le mataupu i le faamasinoga. O le a tuliloaina pea mo se isi laasaga e oo i ai lenei mataupu.