Gūgū le komiti taofia tuuga fautasi o le Teuila

Na sau le polokalame ua pasia o le Teuila o loo iai tuuga fautasi, ae oo ane nei ua amata ona faitau vaiaso oo i le faamoemoe i le vaiaso muamua o le masina fou o Setema, ae maoga a‘e faamatalaga ua leai ni tuuga fautasi o le ‘au‘au lea o polokalame eseese o le Teuila.
Masalo ua lata pe ua sili atu foi ma le sefulu tausaga o avea le faaagatama o tuuga fautasi ma se tasi o polokalame tāua o le Teuila, ae o lea ua taofia i le tusaga nei.  O loo talosia ua na o le tausaga nei ua faia ai lea faaiuga faafuasei, ae e toe faaauau i le tausaga fou, e pei ona lipotia ai se finagalo o le kapeteni o le fautasi o le Tolotolo o Tamauli mai Salelologa, le susuga Pauli Ivan. Ua faailoa e lea kapeteni lona faateia faapea lona auvaa ina ua maua ni faamatalaga salatua ua leai ni tuuga fautasi.
Sa valaau ai loa Pauli i le Komiti o le Teuila e fia manino pe moni, ae sa‘o lava ua leai ni tuuga. O le fenumia‘i o tagata ona o le faasauga muamua o le polokalame o le Teuila sa faailoa mai ai le tuuga vaaalo paopao lea o le a auai ‘au alo mai atunuu eseese o le Pasefika, ae o loo filo ai lava ma le tuuga fautasi. Peitai e sau isi lipoti i le vaiaso na tea nei e pei ona faaalia e Pauli Ivan i se tasi o nusipepa, ua faailoa ai le taofia o le tuuga fautasi. O atugaluga o lea kapeteni ona afai sa koleni isi auvaa, e alu atu loa le tala ua lē taunuu le faamoemoe, ona alofa lea i le taimi, o tupe ma le malosi ua alu ae ua lē taunuu.
O le Tolotolo o Tamauli o loo siamupini talu mai le Teuila o le tausaga ua mavae. O le faanoanoaga o Pauli ona o lea suiga ua faia e leai se faamatalaga na tuuina atu e le komiti o le Teuila mo le silafia e nuu ma afioaga o iai o latou fautasi ua lē oo le faamoemoe.
E oo mai lava i le vaiaso nei e leai se faasalalauga ua aumai faalauaitele e le komiti e faatatau i lea suiga. Na o se finagalo o le tamaitai pule o le Pulega o Tagata Tafafao ua ia ta‘ua ai i se lomiga a le nusipepa o le Weekend Observer, ua mafua ona taatia le tuuga fautasi ona ua manatu le komiti, ua pei o le a lē tulimataia ai e tagata le tuuga fautasi o le Sisigafu‘a auā o le polokalame autū lava lea o le Tutoatasi i tausaga uma.
E manatu le tamaitai pule le susuga Papalii Matatamalii Sonja Matalavea Hunter, e pei a toe fai atu le isi tuuga fautasi i le tuanai o le lua masina talu ona mae‘a le tuuga o le Tutoatasi, e pei o le a lē tāua ai le auga o aute o polokalame o Sisigafu‘a.
Pau lea o se faamatalaga mai le tamaitai pule sili i le mafuaaga o le taofia o le tuuga o le Teuila o lenei tausaga, ae o loo iai nisi lagona ua faaalia ai atonu ua leai se seleni e faatino ai faailoga o le tuuga, pe ua ave le faamuamua o le Teuila o lenei tausaga i le tuuga vaaalo paopao faavaomalo e faia tonu i le vaiaso o le Teuila.