O le tuinanau ua lē faamalieina, ma le manao tele ua lē fanau
E lei toe nofonofo lelei se tasi o ulugalii Samoa i Aukialani i Saute, ina ua maua ane se tusi faamaonia a le ofisa o lafoga, o le rebate poo le lafoga toe faafoi a le tina o le aiga ua mae‘a ona totogi ane i lana tusitupe.
Sa matuā faateia le aiga i lea tulaga ona talu ai e mautinoa lelei e le aiga e lei faatumuina le pepa o le lafoga sa lafo ane muamua ia i laua, peitai ua taunuu ane le tusi o loo faailoa ai, ua mae‘a ona teu le tupe i totonu o le tusitupe o loo iai le suafa o le tina.
E ui ina logo mālie le faaupuga o le tusi ona o le maua o se vaega tupe mai le lafoga, ae na pau le tulaga lē manuia ona o le teuga tupe sa ta‘u ane i le tusi, e ese le tagata e ona. O lona uiga e foliga mai o le igoa o le tina ua faamauina sa agai i ai le tupe, a o le tusitupe a le faifeau o loo faaopoopo pea le paleni.
E lei faamaonia e le aiga le tagata lē alofa lea ua selesele i le afu o le isi, ae sa na ona masalosalo agai i le faifeau, ona na pau lea o le tagata e manatua e le tina, sa ia faamatuuina i ai ona faamatalaga uma mo le faia o lea galuega i le tele o tausaga ua mavae.
O le upu e masani ai le atunuu, “E ‘asa le faiva, ae lē ‘asa le masalo”.
O le faalua ona taumafai o le aiga e saili fesoasoani i le ofisa o lafoga ma faamatala i ai le mea ua tupu, ona e lei maua e le tina se sene apa o le vaega tupe sa faailoa ane ua toe faafoi mai. Peitai e foliga sa lē talileleia e le ofisa o lafoga i Manukau le ausulusulu atu i ai o le aiga mafatia.
Sa fetuleiai pea le aiga i le va o le faletupe o loo iai le teuga tupe lea sa agai i ai le seleni ma le ofisa o lafoga. Ua agai ina tele taimi e alu ma penisini o le taavale ona o le fetuliai solo, na manatu ai le aiga se‘i asia pea le Samoa Times, pe maua ai sina fesoasoani.
E fai o le tosotoso ma le lē mautonu o le ofisa o lafoga, a o le saisaitia foi o le faletupe latou i aiaiga ma taiala o loo mulimulitai ai galuega, ae ua sili ai ona tigaina le aiga e ana le tupe o loo tau saili.
Na pau lava le tulaga sa manaomia e le aiga, pe faamaonia le tagata o loo agai i ai o la masalosaloga, aemaise ai sa taulimaina e le aiga le numera o le tusitupe a John Wayne ua leva ona mafanafana ai le seleni, ia ae po ua faaaogā foi.
O le aso lava lea na fautuaina ai le aiga ina ia tuusao loa le mafatiaga i le ofisa o leoleo, ae se‘i gaioi foi le Samoa Times latou ia e faatamoe lana sailiiliga.
O le aso lava lea na maua ai le ‘au o le paipa ma na umia ai foi e le Samoa Times, le suafa o le tagata tonu e ona le tusitupe, ma e faamaonia lava e lē sese foi masalosaloga o le aiga sa iai.
E lua a aso na va ai, ae toe valaau mai le tamā o le aiga ua maua mai pepa mai le ofisa autū o lafoga mai Waikato, o loo manino lelei mai ai lava le suafa o le faifeau sa ia faia le galuega o le faatumuina o le lafoga a le isi tagata, ma liliu ane i ai seleni uma poo le rebate.
O loo ua agai nei i ai suesuega a leoleo i lea mataupu, peitai ua lē ‘alo le tusitusiga o lenei vaiaso, ona o le manatu e ao ina faamanatu i le mamalu o le au faitau, le tulaga ogaoga o loo faatino ai galuega a nisi. O se fafagu tāua tele mo Samoa ina ia mataala, ma silasila toto‘a i ai i ituaiga faiga faapea, ina ia ‘alo ‘alo ese mai ai, aemaise o le faasaoina ai o seleni o loo faamoemoe i ai fuafuaga a aiga.
O le isi tulaga sa maua e tusa ai ma faamaumauga sa tuuina mai i le ofisa o lafoga, o loo faailoa ai le solitulafono o le faatinoina o le galuega a lea tagata. Sa ia matuā faaa‘oa‘oina lelei le faiga o le saini a le tina sa mafua ai ona ioeina e le ofisa o lafoga le faamatuu ane o le seleni, agai i le tusitupe a le gaoi ma le faomea.
O le isi solitulafono o le tusia faamalosi lea o tupe o le loto malie donations ma faalisiti i le suafa lava o le tina, ae ua leva ona lē toe mafuta ai le aiga i le ekalesia o loo taitai ai lea tagata faaletonuga. Sa ia tusia le $1,500 o tupe sa foai ane e le aiga mo le lotu, e ui ina ua leva ona motusia lea mafutaga, ma o le mafuaaga mautu lea sa galueaina ai mafaufau o le ofisa o lafoga, ma soona ioe ane ai lava, ma maua ai le tupe faasili e toe totogi mo le tina.
O loo manino foi i faamaufaailoga poo stamp sa faaaogāina mo le faamaoniaina o tusitusiga uma sa talosagaina ai lafoga toe faafoi a le aiga, o loo iai le igoa o le ekalesia. Ae na maua e le Samoa Times e faapea se faamatalaga, e oo mai i le taimi nei, e lei ulufale lava le ekalesia a le faifeau lea i totonu o le fono a le ekalesia aoao, poo le faamalu lea e tatau ona iai.
O lona uiga e foliga mai, o loo fai lava lana ia lotu na o ia lava, ma nai tagata o loo ia faapogisaina pea i le pouliuli ma le matautia o le tiapolo.
O le mafuaaga foi lea na tāpā ai ma fesiligia nisi o toeaiina o le ekalesia, ona o le fia faamaonia lava o faamatalaga e uiga i le lotu lenei.
O le lāgā e le aiga o loo tagi o le mataupu lea, ua toe susue ai ma faafitauli o isi aiga sa lolotu ai foi i le ekalesia a le ao lafoga lava lea. O le ituaiga faafitauli lava e tasi, e uso lelei faafitauli o isi aiga, ma le mea na tupu i le aiga e ona le tagi. O le isi aiga e tusa ma le $3,000 e pei ona faailoa mai, o nisi foi ua silia ma le $2,000. Sa faamaonia mai foi e nisi o molimau e faapea e fai foi e le faifeau lava lea pepa nofomau poo pemita nofomau o tagata mai Samoa.
O le molimau a nisi e faapea o le matuā tele lava o tupe sa totogi e tagata i le susuga i le ao lafoga, ona o le fia maua o pemita nofomau ma visa faigaluega.
O le toatele o nei tagata, ua toe faafoi uma lava i Samoa e lei manuia, ae gotouga ai tupe i lē o loo tuuaia. E faapea se faamatalaga a nisi, a silafia loa e lana susuga o le a maua le leai o sana galuega o faia, ae ua malosi tele lana ‘ai o tupe a tagata, ona toe lipoti loa lea i le ofisa o femalagaiga a Niu Sila le ova o aso ma toe ave faamalosi ai i Samoa.
Sa taumafai faalua le Samoa Times i le tuatusi o lē o loo tuuaia i le mau faiga piopio ma le lē alofa, peitai e lei manuia ia osofaiga e lua ona e lei maua i ai le susuga i le faifeau. Atonu o le a toe taumafai pea i ai mo le vaiaso fou, pe maua sona finagalo faaalia i lea mataupu. E pei ona ta‘ua o pepa uma ma faamaumauga sa tuuina mai e le ofisa o lafoga, o loo manino ma faamaonia ai le suafa o lē o loo tuuaia, ma o ia foi lea sa ia faatinoina uma sainiga lima, ma isi tulaga solitulafono ma faavaleaina ai le ofisa o lafoga.
