Ua leva tausaga o faagaioia e le Malo le faalapotopotoga sa pulea ma faafoe i se tulaga faapisinisi le faleoloa o oloa tau faatoaga, lea sa fua mai ana taumafaiga i nisi faigamalo ua mavae i se tulaga lelei.
Atonu o loo manatua e le atunuu le vaitaimi sa fagaioia ai e lea faalapotopotoga a le Malo se atinae fai e lē gata o fa‘i papalagi sa faatau atu i Niu Sila, ae o le fa‘i Samoa ma le misiluki sa faapena foi ona faatau i fafo.
Na sosoo ai ma le talo ma atinae e pei o fualaau‘aina lea sa faaaogā ai faiga faaonaponei e totō ai laau e pei o le kapisi ma le tamato, ma o lea faiga e ta‘ua o le Agrcoponic e leai se palapala e faaaogā ae o le suavai e ola ai laau.
O nei taumafaiga uma sa maua ai ni tupe lelei a le Malo, ae peitai e lei umi ni tausaga ae faaletonu ma taofia ai. O le faalapotopotoga foi o le faleoloa o faatoaga a le Malo, sa tuusa‘o i ai nisi o fesoasoani tau faatoaga mai fafo e lē gata o oloa eseese e galueaina ai faatoaga, ae sa faapena i le faataugofie o vailaau tau faatoaga ma faalelei eleele, aemaise o meaai mai fafo mo le tausia o lafu puaa ma lafu moa.
E ui sa maua ai le toomaga o le aufaifaatoaga i tau o ia oloa, ae sa iai pea faitioga i le lē lelei ona pulea o lea aseta a le Malo ona o le alu ai o tupe ae sa lē manuia i nisi o tausaga ana taumafaiga ma faasolo atu ai ina maua tupe pa‘ū poo tupe ua lē maua mai i ana galuega faapisinisi.
O le liliu o le Malo ma faatau ese atu nisi o ana aseta ma faatau ese atu foi ona sea sa faapea ona tuuina atu i nisi o tautua faapisinisi, sa silasila ai loa i le faatau ese atu o le faleoloa o faatoaga e pei ona mae‘a pasia ai le tulafono i le Palemene e faatino ai lea fuafuaga, ma ua soloia ai nei le faalapotopotoga o le faleoloa o faatoaga.
E ui ina afea e le Itu agai i saunoaga i le soloia o lea aseta a le Malo ona o le mafuaga ua gau, ae o le mau sa finauina e le Palemia ma le faigamalo, o se faiga o le a mafai ona tatala ai le avanoa e tauva le faleoloa o faatoaga ma isi auaunaga faapea i le atunuu.
Ua feololo lava pisinisi ua latou faatauina foi oloa tau faatoaga ma o le finauga lea a le Malo o se itu lelei le faatauva ona maua ai lea o tau pa‘ū mo soo se oloa e maua ai e le aufaatoaga se faamāmā avega.
O se tasi o polokalame a le Malo sa faatino e le faleoloa lenei o le tufaina o faalelei eleele e aunoa ma se totogi. Peitai na faaalia e le Palemia, o ni tupe na gau ai le Malo ona ua na ona la‘u atu o faalelei eleele, ona lē faaaogaina lea, ma ua o ai isi aufaatoaga ua faatau e maua ai a latou tupe.