O totonu o le sefulu masina amata ia Setema 2008 e oo ia Iulai o le 2009 na faatino ai e le tamaitai o Sarai Faleupolu, sa faauluulu i ai le vaega o fesootaiga tau komepiuta a le Faalapotopotoga o faaputugatupe mo le luamanai manuia o tagata le NPF, se gaioiga faasolitulafono i seleni o le saofaga a se tasi o tina o lona lava aiga.
E 14 moliaga o le faasese o faamaumauga, ma le gaoi a o avea ma tagata faigaluega, na faia e leoleo faasaga i lea tamaitai ofisa sinia ina ua mae‘a ona suesueina le faaletonu.
Na faaalia i tolaulauga a le faamasinoga e faapea, sa faia e Sarai ni gaioiga i faamaumauga i luga o komepiuta a le NPF i le saofaga a le tina na aafia, lea sa ia faia ai ni nonogatupe e alu i luga o le suafa o lea tina e aunoa ma le silafia e lē e ana le saofaga.
O ia nonogatupe sa ia talaina ma faaaogā mo ia lava e pei ona faaalia e $38,500 tala le aofaiga o le tupe o le saofaga na ia faaaogā. Na faatino e Sarai ni nonogatupe na amata i le $1,000 e oo i le $7,000 tala.
“O oe o se tamaitai talavou ma e maualuga ou faailoga mai Iunivesite i fafo ma e tele foi sou lumanai. Peitai e na o le faanoanoa o le faamasinoga i se tasi e pei o oe ua tulai i le faamasinoga ona o se moliaga e atagia ai le lē faatuatuaina o lou tagata”.
O le saunoaga lea a le afioga Vui Clarence Nelson le faamasino o le Faamasinoga Maualuga, ina ua lauina se faaiuga mo Sarai.
O le tomai o lea tamaitai i tulaga tau fesootaiga ma galuega o masini komepiuta na ia suia ai faamaumauga o seleni o le saofaga a le tina o lona aiga na aafia ma ia faatino loa i ai se gaioiga solitulafono.
Sa ia ioeina moliaga ma o sona lelei lea i le silasila a le faamasinoga ua faasaoina ai nisi tupe a le faamasinoga ma le atunuu mai le valaauina o molimau.
O se lelei foi mo Sarai le faato‘ā molia lea i se solitulafono. O se tagata galue lelei ma faatuatuaina ma o se isi lea faamāmā avega mo ia i lona faasalaga.
Na ia toe totogi le $8,000 o se vaega o le seleni na aafia ma o se isi lea ona lelei.
I le 5 tausaga na amata ai le faasalaga a le faamasinoga na toesea uma se vaega tele o lea faasalaga ona o vaega lelei na ta‘ua, ae totoe ai le 2 tausaga ua nofosala ai Sarai Faleupolu i le falepuipui.
Ua 32 tausaga o lona soifua. E iloa ane le faaletonu i le saofaga a se tina o lona aiga lea na ia aitalafu ai pe nonō, o loo i Iapani Sarai mo se a‘oa‘oga e ono masina. Na toe taliu mai i Samoa e lei mae‘a lea a‘oa‘oga ina ua manaomia mo suesuega e faasino i le mataupu ua nofosala ai nei i le falepuipui.
