Na feiloai le Komiti o le Pulega a le Samoa Tag Sports Inc ma le afioga i le Konesula Aoao o Samoa, Afioga Faolotoi Reupena Pogi i le Maota o Samoa i Karangahape Road, i Aukilani.
E tāua tele lenei feiloaiga na faia ma le afioga i le Konesula, auā na saunoa ai le Konesula ma talanoaina le taaloga o le Tag faatasi ma le Komiti, ma faatalanoa ai le latou polokalame mo le 2012, lea e aofia ai le taamilosaga o le International Cup, lea o le a faia i le masina o Oketopa i le Gold Coast i Ausetalia.
Na faaalia le fiafia o le afioga i le Konesula i le polokalame ua faataatia, ma ua iai foi ona naunautaiga e lagolago atu i le Samoa Tag, o se taaloga na ia tautino, e lei iai muamua sona malamalamaga i ai. O upu faamalosiau sa fofoga i ai le Konesula, ua avea o ni faalaeiauga i le Komiti o le Pulega.
Ua faamautinoa o le a galulue soosoo tauau le ofisa o le Konesula Aoao a Samoa ma le asosi a le Samoa Tag Sports Inc, ma faatumauina ai pea a latou faiā lelei.
E ono ni ‘au o le a auina atu e le Samoa Tag mo le taamilosaga lenei a le International Cup, e iai le Open Mens, Mens U/20s, Womens, Open Mixed, Over 30s ma le Over 35s.