Ua galulue faatasi nei le Ofisa o Aoga ma le Matagaluega mo tagata Pasefika i le iloiloina ma le tapenaga o le Fuafuaga mo Tamaiti Pasefika [Pasefika Education Plan] mo le 2013 – 2017.
O lenei faamoemoe o loo taiulu se tasi o tamaitai poo alo o Samoa o Fatulatetele Tolo i lona fuafuaina ma le tapenaga.
O lenei tamaitai ua iloga lona tomai i le faatinoina o le tele o galuega a le Ofisa o Aoga, sa galue foi i le fuafuaina o polokalame mo tamaiti Maori. Ua talafeagai ai le avea o ia ma taitai i lenei galuega ona o loo matauina le agai i luma o le taumafai o tamaiti Maori ona o le lava tapena o polokalame sa aofia ai.
O le taimi nei o loo matua galulue malosi nei matagaluega e lua ina ia matua tapenaina lenei galuega aua lava le agai i luma o le aoaoga o tamaiti Pasefika i Aotearoa.
Ua matua naunau nei matagaluega ina ia maua ni faamatalaga mautinoa e faatino ai ni fuafuaga talafeagai mo tamaiti Pasefika.
Ua talosaga ai i latou o loo taitai i Aoga Amata, Komiti Faafoe o aoga, puleaoga, faiaoga, mātua, tagata lautele, taitai o atumotu, faifeau, ma i latou uma o loo aofia i polokalame mo tamaiti poo tagata Pasefika, ina ia omai faatasi e talanoa, fefaasoaai ma fuafua ni auala talafeagai e faaleleia ai avanoa mo tamaiti Pasefika ina avea ma ni tagatanuu lelei, ma maua ni avanoa sili ona maualuluga e faamanuiaina ai i ni galuega totogi lelei mo ni lumanai lelei.
O vaega e fia maua i ai ni faamaoniga:
O a ni vaega o aoaoga o loo talafeagai mo tamaiti Pasefika?
O a vaega e le o talafeagai?
O a ni suiga e tatau ona faia e faaleleia atili ai vaega o loo talafeagai?
O loo ua amataina nei ni fonotaga i le atunuu atoa e aoao mai ni manatu ina ia talafeagai lelei ma anagata nei fuafuaga. E 19 fonotaga ua amata faagasolo, e 6 fonotaga ua fuafuaina mo Aukilani.
North Shore Birkdale Primary School 8 Me 2012 5pm – 7pm
Waitakere Waitakere College 9 Me 2012 5pm – 7pm
Central Auckland Mt Albert Primary 15 Me 2012 5pm – 7pm
Tamaki/Glen Innes Tamaki College 17 Me 2012 5pm – 7pm
Otahuhu Otahuhu College 22 Me 2012 5pm – 7pm
Manurewa Finlayson Park School 23 Me 2012 5pm – 7pm
E tāua tele lo tatou auai i nei fonotaga e faaleo sou finagalo mo le agai i luma o le aoaoga o alo ma fanau. Ua matua faatauaina e nei matagaluega lau faasoa mo le faaleleia o avanoa mo alo ma fanau i totonu o aoga.
Ua manaomia ni suiga mai Aoga Amata seia oo atu Iunivesite ma Matata Eseese ina ia faamalieina manaoga o alo ma fanau.
O lo tatou avanoa tāua lenei e faaleo ai ni o tatou manaoga aua ni lumanai lelei mo fanau.
Manatua o a tatou tapenapenaga i le taimi nei, e faaagaga mo alo ma fanau ina ia maua se taunuuga fiafia ma le manuia.
Ua fai i lagi folauga a nisi o taitai iloga ma le mataalia, ae le mafai ona galo a latou saunoaga o loo fai pea ma taiala pupula mo tatou a o tatou iai i lenei lalolagi: “O lou ananafi e fausia lou taeao” [Saletaulua Autagavaia FT. Otahuhu EFKS]
