Galuega faatalalelei a le Youth Power Group

O le tāua o le faamalosia o galuega faatala‘i ma le faasoa atu o le finagalo alofa o le Atua i le tupulaga talavou i totonu o Otahuhu ma Aukilani i Saute, e ala i pese ma siva faaleagaga, ma galuega faatala‘i i le Aso Toonai na tea nei.
O le mafuaaga tonu lea o se polokalame tuufaatasi a se autalavou, ua faaigoaina o le Youth Power Group, i lalo o le fesoasoani mai le ekalesia Universal Church of the Kingdom of God (UCKG) o Otahuhu lava.
O se avanoa lelei na tutu faatasi ai le atunuu lautele faapea ma auaunaga eseese e faalauiloa a latou foi fesoasoani mo le tupulaga e ala i le faalauiloaina o a latou auaunaga i ni auala e o faatasi ai le ola faaleagaga ma le nofo saogalemu o tagata lautele.
Ua lē gata ai o galuega faatala‘i a le Youth Power Group, peitai na iai foi le fesoasoani a le Matagaluega a leoleo ma le Puipuiga, o aoga e iai le Best Training, o faafiafiaga e iai aitema na faatinoina e le Serve Team, faapea ma le anoanoai o faafiafiaga matagofie i lea aso.
Ua talafeauga lava le faatinoina o lenei polokalame faatalalelei a le Youth Power Group, ma le vaitau o tuuaga a nai fanau aoga, ua fai ma toomaga mo nai mātua, ua faanonofo lelei ai ma matamata, auā e leai se totogi o nei faafiafiaga.
O se vaaiga matagofie ma le felanulanuai lea aso, o le toatele o nei talavou ua ofo o latou soifua e tala‘i ai le Atua ma lona finagalo, avea ma faamalosiau mo nisi tupulaga na matamata i lea aso.
E lē faailogaina foi se tagata e auai i nei polokalame, e pei ona maitauina, o le tupulaga Pasefika, o Initia, Saina ma soo se tagatanuu lava, na galulue faatasi, auā se sao mo le faatalaleleiina o le tupulaga talavou o Aukilani aemaise le ola faaleagaga ia faatāua pea.
Sa faataunuuina lea faamoemoe i fafo mai o le Town Hall i Otahuhu, amata mai lava i le 9am i le taeao seia faamae‘a i le 3pm i le afiafi.