E iai ni vaega o le soifuaga o Panapa e ese le matagofie, e tatau na tatou matamata i ai, ma fai ma fesoasoani mo lo tatou lava ola taumafai mo le Alii. E tāua nei uiga e faamanatu ai le faamoemoe ola o le avea o tatou ma Kerisiano. Auā e agamalie ma felanulanuai uiga o le soifuaga lenei.
O le faaiuga o le fuaiupu e faapea mai; ua faaopoopoina ai foi tagata e toatele lava i le Alii, ae o le amataga o le fuaiupu o loo ta‘u mai ai le amio lelei o Panapa.
O le amio lelei o se uiga e faigata ona maua e se tagata. O le amio lelei e lē maua ona o sou tamaoaiga, poo le maualuga foi o lou soifua a‘oa‘oina. E lē maua foi ona ua lelei sau galuega, poo se tofi i totonu o se ekalesia o galue ai.
O le amio lelei, e maua ina ua oo i lou loto suiga lelei. Ina ua maua e lou loto se mea lelei ma suia ai le loto mai le leaga i le lelei. Pe suia ai le loto mai le mata‘ua i le filemu, auā foi o le loto o le tagata, o le loto ua aafia i natura agasala.
Na soifua mai le tagata ma le natura pau, ma e leai ni mea tau le Atua e maua i totonu o o tatou loto, vaganā ua tatou talia ma faaulufale Iesu i o tatou loto, ona amata aliali mai ai lea o uiga matagofie o le Atua o lo tatou faatusa na fai faatatau i ai tatou talu le amataga.
Silasila foi i soifuaga o le ausoo, e gaoi le isi alii, masalo vale le isi ae gutu oso le isi, ma le tele o uiga faatagata ua tatou masani ai.
Ae ina ua faatuatua atoatoa ia Iesu, faato‘ā amata ai ona alia‘e le tele o uiga matagofie faaleatua, ma tosina ai le toatele i le Ekalesia ma le Talalelei, auā sa amio lelei ona taitai, faapei o Panapa.
O le isi faamatalaina o le soifuaga o Panapa, e alofa i le Atua. Silasila foi: “sa ia te ia le fanua, ua ia faatauina, ua aumai foi tupe o le tau, ma tuu mai i le au aposetolo e pule.” (Galuega 4:37). Sa silafia e Panapa le manaoga o le Ekalesia ma sa lē ‘alo lava i le ata o le laau.
E lē faatagā auauna na o upu, e lei fevaavaaia‘i poo ā mea a isi o fai. Sa ia lagona ma mautinoa i lona loto le mea e fai. Aisea? O le tagata e faatumuina e le Agaga Paia. E lē gata la sa auauna i le Atua i lona taimi ma lona malosi, ae sa foai faatasi ma lona tamaoaiga.
O le soifuaga faatuatua e lē lima u‘u ai, ae lima foai ona ua silafia, e lē nofo aitalafu le Atua i se tagata e aao mafola.
O Panapa foi sa ia iloaina lelei le suiga o le olaga o Paulo. A o masalosalo le Ekalesia ma ona taitai i le feliua‘ina o le soifuaga o Paulo, o Panapa lava sa taulamua ina ia aami ma aumai Paulo e faaaogā i le galuega. Faitau le Galuega 9:26-28. E lei fefe Panapa pe popole, nei mea ane, ua sili atu Paulo ia te ia. Leai se lagona faapena, sa ia silafia lelei, o le tagata faaaogāina Paulo.
O uiga faaletagata, e musu tele ae vaai atu o le a alualu ma manuia nisi tagata. E taumafai e fai ni mea e faatoilalo ma faamasiasi ai isi, ina ia siitia ai sona tulaga ma maua ai sona tauleleia, ae lē faapena Panapa.
O Panapa lava foi na ia silafia lelei foi le aogā o Mareko (John Mark) i le galuega. Manatua foi o Mareko lea sa solomuli i le malaga faamisionare muamua a Paulo. Ina ua sauni le malaga faamisionare lona lua a Paulo, sa lē toe manao e ave Mareko ona sa faavaivai i le malaga muamua.
Ae o Panapa lava sa finau mai ina ia vaeluaina le au misionare, ona o lea o Paulo ma Sila, ae malaga Panapa ma Mareko.
O le a lē vailiiliina i lenei taimi poo ai e sa‘o, poo Panapa poo Paulo, ae ina ua faaiuiu le galuega a Paulo, sa toe tusi ia Timoteo (2 Timoteo 4:11) “Ia oulua o mai ma Mareko, aua e aoga ia ia te au i le galuega.”
E foliga mai la i lea faaupuga a Paulo, o Mareko e lei maumau lona soifua galue, e ui sa tuumuli i le malaga faamisionare muamua. Ave ai la le faamalo ia Panapa, auā sa ia mautinoa, e iai le alofa tunoa o le Atua e taofimauina le tagata i taimi faigata. Ae faigofie ona e iloa atu le aao o le Atua i le soifuaga o isi, pe afai e tonu o tatou loto. E tāua tele le loto lelei.
Fai mai le mau a le alii lauiloa o Aristotle, o le a‘oa‘oina o le mafaufau e aunoa ma le a‘oa‘oina o le loto, e lē se a‘oa‘oga lea mea. O lona uiga, e tatau ona a‘oa‘oina le mafaufau, ae ia faasilisili le a‘oa‘oina o le loto o le tagata.
Ai foi o le mea lea na faasuafaina ai ia Panapa; auā o le uiga o lona igoa; atalii o le faamalosi. Manaia se aiga ae tele ni tagata e pei o Panapa e iai.
Ua tele le ola faavaivai o tagata, ae manaia le soifuaga o Panapa, tatou te vaavaai i ai, o le loto lava e fua i ai. A lelei le loto, e lelei mea e fai. A lelei le loto, e lelei mea e manatunatu i ai. A lelei le loto, e te iloa atu foi na o mea lelei i le soifuaga o le isi uso a tagata.
Soifua
