Galue i Samoa tamaitai faamasino Samoa mai NZ, Ida Malosi

Ua faatauto nei ma talia e avea ma se tasi o Faamasino o le Faamasinoga Maualuga a le atunuu, le tamaitai faamasino mai Niu Sila, o se tasi o alo ma tamafanau a Samoa, o Ida Malosi, lea na faatauto i luma o lana afioga i le Ao Mamalu o le Malo i le vaiaso talu ai.
Sa auai le afioga i le Faamasino Sili ma le faauluuluga o le matagaluega o faamasinoga faapea aiga ma uo a le tamaitai faamasino.
O se mitamitaga lea i le Faamasino Sili ma le vasega o faamasino ina ua faaopoopo atu se isi auauna aoga ma tāua i le faatinoga o le galuega, aemaise lava o se alo tamaitai o le atunuu ua leva tausaga o galue i Niu Sila i ona tofiga faaloia, seia oo ina avea ma uluai tamaitai o le Pasefika na tofia e avea ma faamasino i Aotearoa.
E 12 masina o le a galue ai le tamaitai faamasino o Ida Malosi, i le Faamasinoga Maualuga a le atunuu, ma o ia le uluai tamaitai faamasino Samoa ua galue i lea faamasinoga ua na o alii o loo galulue ai i le tulaga faamasino.
Ua toalua ia te ia tamaitai faamasino i le faamasinoga o mataupu tau tulafono a le atunuu e pei ona sa muamua filifilia ma tofia ai se tasi o tamaitai o le atunuu o Mata Tuatagaloa, o loo galue nei i le Faamasinoga Faaitumalo le District Court.