O le vaiaso nei e tutulai ai i le Faamasinoga Maualuga alii ofisa e toalua o le ofisa o le Tiute i le matagaluega o tupe maua, o i laua ia ua masalomia ma tuuaia i le gaoia o se vaegatupe tele a le tiute e tusa ma le $1.5 miliona.
O fuainumera ia na tuuina mai e leoleo ina ua fesiligia e tusa ai ma le faaletonu na tulai mai i lea ofisa o le Malo o loo pito tele seleni o loo maua ai mai le totogi o tiute o oloa e faaulufale, ma oloa e auina ese ma Samoa.
O le Aso Gafua, aso 13 o Fepuari e pei ona faaalia e leoleo na toesea ai lea tupe tele, i le taimi ua mānava galuega.
E faapea mai se faamatalaga mai leoleo, o alii e toalua ua molia o tagata mulimuli ia na tuua le ofisa ina ua mānava galuega i le Aso Gafua lea.
O le tinoitupe e faapea sa teu i le sefe poo le volt a le ofisa, ma le faamoemoe e faato‘ā teu i le faletupe pe a oo i le aso e sosoo ai, ma o se faiga lea pe a oo ina ta le 4 o aso taitasi ua tapunia faletupe ae e lei mae‘a ona tuufaatasia tupe maua o aso taitasi.
Na logo leoleo ina usuai atu galuega o le Aso Lua, aso 14 o Fepuari ua leai le taga sa teu malu ai seleni maua o le Aso Gafua, ma e maua atu e nisi o le ofisa le sefe u‘amea ua matala. Na alu le aso atoa o faia suesuega a leoleo ma o le afiafi na faato‘ā maua ai ina ua mae‘a ona fesiligia ma faatalanoa taulelea o le ofisa ua molia.
O le isi e 22 tausaga le matua a o le isi e 19 ma o ni alii ofisa e lei leva ona galulue ua faato‘ā ta‘i tolu tausaga o le tautua. Faaalia e leoleo o le fale o se tasi o i laua ia na maua mai ai le taga tupe, lea sa iai le tusa ma le $30,000 tupe ae o le isi vaega atoa o tupe ua faamauina i siaki.
Faaalia e leoleo o moliaga o le gaoi a o avea ma tagata faigaluega ua molia ai ia alii ofisa, ma o le faasalaga maualuga pe a faamaonia e mafai ona faasala ai, o le fitu tausaga i le falepuipui.
E lē o se taimi muamua lea ua tulai mai ai ni faaletonu tau tupe i lea ofisa o le Malo.
O tausaga ua mavae sa gaoia ai foi ni seleni ma molia ai ni tagata faigaluega, ma ua mae‘a tuli faasalaga o se tasi o tamaitai sa umia le tulaga o se suetusi ma le tausi tusi mo le ofisa o le tiute.
O se isi o tamalii na faasala tupe e le faamasinoga i le lima afe tala, ona sa lē mafai ona faasala i le falepuipui ona o tulaga o gasegase faigata ua aafia ai.
O se isi faaletonu tau tupe i le ofisa lava o le tiute o loo tuuaia ai se isi tagata faigaluega sinia ua lē toe galue, peitai o loo aumau nei i fafo lea tagata ma e lē o iloa poo afea e aumai ai faapagota i Samoa e tali i tuuaiga.
