O le vaiaso na tea nei na faateia ai le faalogo ina ua faasalalau mai i le leitio se pepe 9 masina na galo i totonu o se faleaoga o tamaiti laiti, i le vaiaai o Porirua. E faapea na tagi le pepe ona lagona mai lea e tuaoi ma maua ai le fesoasoani e aumai ai i fafo lenei alualutoto, ua o faiaoga ae galo ai i le faleaoga.
O le nusipepa a le Dominion na faasalalau ai le tala tusia ma na faapea e tusa o le ono i le afiafi na maua ai le tamaitiiti ae na o ese faiaoga i le kuata e tea ai le lima. E tusa la e 45 minute na tuu ai le pepe e aunoa ma se isi e vaaia, e pei ona molimau le pule aoga.
E tele ni fesili ua tulai mai i lenei faafitauli. O fea mātua o le pepe? O le ā le mea na lē pikiina ai lo la alo i le taimi a o lei mae‘a le tiute a faiaoga? Aisea na lē siakiina ai e faiaoga le faleaoga poo iai ni isi tamaiti o totoe ai a o lei lokaina le faleaoga? Oka se faatamala!
O le tulai mai o lenei faafitauli e tele itu e ao ona mataitu i ai mātua ma faiaoga. E tele foi le aafiaga o le aoga o lenei mea ua tupu mai, e fai ma a‘oa‘oga ia i tatou mātua faapea foi ma faiaoga.
O le itu lava ia i mātua e ofo ai i le galo ona o e aumai le la tama. O le itu foi i faiaoga e ofo i le leai o se magafagafa i le siakiina poo iai ni tamaiti i totonu a o lei lokaina le faleaoga. O se tiute sili lea ona tāua a o lei tuua le faleaoga.
E matuā sili ona tāua le fafagu lea ua aumai i aoga laiti faapea faiaoga i le taimi nei, e tusa o lenei faafitauli ua tulai mai. O le mea lea, soia lo tatou tuua‘i o le leaga i se tasi. O le upu lava a le atunuu, “E momoe lava ma manū, ae sau mala e atia‘i”.
O le matuā galo nimo le isi tala e fai i ai. Ua galo i mātua, galo foi i faiaoga. Ae momoli le faamalo i le Samaria agalelei na ia laveai mai si nei alualutoto i lona tagi ua leai se tasi e vaaia o ia. O le ā se mea e mafai pe afai e tagitagi ae leai se tasi e lagona si ona leo? E lē taumate o le a oo i se tulaga sili atu ona faigata ma maumau ai le oloa a le Atua.
