Fusuaga a Samoa ma Tahiti

Tusia: eventpolynesia.com

 

Ua faalauiloa mai le sauni atu o le aufusu faapolofesa a Samoa e auai i le fusuaga tele e faia i Tahiti i le Aso Faraile, 25 o Novema. 

O Faimasasa Tavui o Samoa i le aupaga cruiserweight o le a taualugaina lea fusuaga tele i le paga faapitoa e sefululua taamilosaga ma Mosese Sorovi o Fiti mo le fusi o le UBO International.

O Tony Iapesa o Alamagoto o le a fetaui ma Jean Louis Arihau o Tahiti i le aupaga ‘welterweight’, a o Michael Fonoti o Falealii ma Palauli o le a fetaui ma Tinitua Neagle o Tahiti i le aupaga ‘light welterweight’. 

O alii faiaoga o le ‘au a Samoa o le tofa Asiata Napoleon Stanley ma Ofisa Vili.

Faaalia e Pa’u Fereti Puni o le pulega a le Event Polynesia, “O le taimi muamua lenei ua malaga ai se aufusu faapolofesa a Samoa e taaalo i Tahiti ma o se vagea o tapenaga mo le taamilosaga o fusuaga faapolofesa a le Pasefika o loo fuafua e amata i le tausaga fou.”

O le mae’a o taaloga a le Pasefika ia Setema lea na faia i New Caledonia ua sauni ai nei nisi o alii fusu a Tahiti e fusu faapolofesa ma o le mafuaaga lea o le malaga o le aufusu faapolofesa a Samoa e tali le lu’i a Tahiti.

O le taaloga a le Pasefika 2011 ua tulaga maualuga ai nei Tahiti i fusuaga, lea na manumalo ai i pine auro e lima, sosoo New Caledonia e lua pine auro, ae taitasi pine auro a Samoa, Nauru ma Papua Niu Guinea.

Saunoa Reginald Leca o le pulega o fusuaga a Tahiti, “O Samoa sa fua i ai le maualuga o fusuaga a le Pasefika i le tele o tausaga. Peitai o lea ua pine silia Tahiti i fusuaga ‘amateur’ a le Pasefika. 

O le talia e le aufusu faapolofesa a Samoa o le valaaulia a Tahiti, o se avanoa lea e fua ai le lelei o Tahiti i fusuaga faapolofesa.”

O le taamilosaga o le Pacific International Boxing Championship i le tausaga fou, o le a oo atu ai le atina’eina o fusuaga a le Pasefika i le tulaga o loo iai taamilosaga lakapi a le IRB i le Pasefika. Pei ona silafia, o le mae’a o sailiga siamupini faaitumalo a atunuu taitasi ona sosoo lea ma le taamilosaga o le Pacific Rugby Cup lea e fetaui ai ‘au tailua a Toga, Fiti ma Samoa e pei ona iai ‘au ua faaigoaina o Savaii ma Upolu. 

A mae’a ona filifilia loa lea o le Manu Samoa, Flying Fijians ma le Ikale Tahi a Toga mo le taamilosaga a le Pacific Nations Cup lea e aofia ai Iapani faapea ‘au laiti a Niu Sila ma Ausetalia.

Fetalai Pa’u, “O le isi lea mafuaaga o le malosi o le lakapi i le Pasefika ona o loo iai taamilosaga e tausinio ai tama taaalo. A taunuu le taamilosaga o fusuaga faapolofesa a le Pasefika, o se matuā faamanuiaga lea mo tamafusu a Samoa i le iai o se isi alamanuia pe a uma le taimi o taaloga ‘amateur’.

O le taamilosaga lenei o fusuaga faapolofesa a le Pasefika o le a sailia ai siamupini o aupaga taitasi, lea o le a muamua ona talimalo ai Niu Sila ia Mati o le tausaga fou. O le fonotaga o loo fuafua e faia i Samoa i le aso 29 ma le 30 o Novema, o le a sainia ai se maliliega a fai fusuaga mai atunuu e fā o le a faasolo ai le taamilosaga e aofia ai Samoa, Niu Sila, Fiti ma Tahiti.

O le Aso Lua 15 o Novema e taunuu ai i Aukilani le aufusu a Samoa ma le faamoemoe e tasi le vaiaso koleni ai i le Vili’s Boxing Gym i Manurewa ae lei malaga atu mo Tahiti.