E feilafi eseese teuga ma sauniuniga a tamā i le faamanatuina o le latou aso paepae, ae o le ata manino foi lea o loo atagia mai ai i tua se tina lelei ma se fanau lelei o loo ave pea le latou faamuamua i le tamā o le aiga auā o ia o le ulu o le aiga.
O upu a le tusi o le tamā aulelei ma ona uiga lalelei, o ona tua atu o loo tulai mai ai se tina lelei ma se fanau lelei. O le faaiuga o le vaiaso na amata ai ona faatino galuega lelei ma galuega alofa a le tina ma le fanau i le tamā e ala lea i le tapenaina o se taumafataga i le fale’aiga a’o loma ai le Aso Sa o Tamā, ua lē gata i totonu o ekalesia ae ua oo foi i aiga taitasi.
O lagona o tina ma fanau, o le tamā o le ulu lea o le aiga, e fanau mai e ia le alofa i totonu o le aiga, ma ua alagatatau ai lava ona ave le faamuamua ia tamā ona o ia e taimua i meafai i totonu o aiga.
I totonu o falesa taitasi i le Aso Sa, ua lē lasi ae ua atulasi le matagaofie o le aulelei o tamā ona o lea ua fuli le tina e fai teuga e aulelei ai le tamā i totonu o le malumalu. O laei ua saunia a’o le fuarosa mūmū ma le rosa paepae ua tui i le taga o le ofu ua fai lea ma ata vaaia o le aiga fiafia i le Aso Sa o Tamā ua iai Iesu.
O tapenaga ia i le itu o le tino, ae o le itu faaleagaga o le tasi lea sao o tina ma fanau talavou i totonu o isi ekalesia na latou saunia polokalame faaevagelia, siva faitaga, ma tala faatino e momoli ai lo latou sao i le Aso Sa o Tamā, ae o lauga o le Aso Sa, o le ‘au’au lea o polokalame na faatnoina lava e tamā.
O lu’itau poo upu faamalosi mai le afioga a le Atua i totonu o nisi malumalu sa fai lea ma taiala mo tamā e ala i o latou tiute i totonu o aiga ma ekalesia e faapea, amuia ē loto mamā auā latou te iloa atu le Atua, o lona uiga e tatau i tamā ona maua le loto mamā ona latou iloa lea o le Atua, e lelei ana mea e fai, e manuia foi mea uma na te faia i totonu o lona aiga ma lana ekalesia.
O tamā o le ulu o le aiga, o ia ua ave iai le meaalofa mai le Atua e taitaiina le aiga i ala ma le amiotonu o le Atua auā le manuia o le aiga. O le tina ua faalupe lava i latou o le pae ma le auli, o latou e faufautua malosi i tiute o le ulu o le aiga o loo faatinoina i soo se aso ma soo se taimi.
Fai le sao o le G-Mana mo le Aso Sa o Tamā
O le G-Mana o le tasi lea kamupani o loo latou faatāuaina aso faapitoa o tamā i tausaga uma, e pei ona fai ai ana faigameaalofa mo tamā uma o Samoa i totonu o Aukilani. O nei meaalofa mo tamā e tusia o latou suafa ona tuu lea i totonu o le pusa ona fai ai lea o se’i mo suafa e 30 e manumalo e mauaina faailogas tupe e $50.00 e faatau ai se malu taeao a tamā i le Aso Sa. Na vaaia le tumutumu o lea kamupani i le taeao o le Aso Toonai i tamā na auai atu e faatāuaina lea avanoa, aemaise ai o se avanoa e mafuta faatasi ai tamā o le atunuu, e fiafia ma fai ai le taumafataga auā o lea sa saunia foi e le aloalii ia Galumalemana Tai Galumalemana ma le aufaigaluega le bbq auā le fofoga taumafa.
Na maualuga lea faamoemoe auā sa faatasi atu iai le afioga i le Ao Mamalu o le Malo o Samoa ia Tuimalealiifano Vaaletoa Sualauvi II faapea lana Masiofo ia Faamausili Leinafo, o le Konesula o le malo o Samoa ia Faolotoi Reupena Pogi, o le Minisita o tagata atu motu o le Pasefika ia Hon Aupito Su’a William Sio, o le afioga ia Patele Michael Alipia Endermann o ia foi sa taitaiina le polokalame i le sauniga lotu. O faamanuiaga ma saunoaga autu o le aso na saunoa faamanuia ai le afioga i le Konesula o Samoa ia Faolotoi Reupena Pogi i tamā uma o Samoa i le tapena atu mo le Aso Sa, na faaopoopo foi le afioga i le Minisita ia Aupito Su’a William Sio i faamanuiaga o le aso, faatasi ai ma lana saunoaga faaminisita na ia tuualalo ai i tamā o Samoa ina ia tuu atu lo latou tau’au e galulue ai i le puipuiina o le tulafono o le sauaina o aiga o loo tetele nei i totonu o nei atunuu. O lona uiga e tatau ona aua ne’i tupu i totonu o aiga Samoa nei solitulafono o le sauaina e tamā o tina ma fanau, e tatau ona faaeteete iai.
O le saunoaga a le afioga i le Masiofo ia Faamausili Leinafo na ia momoli ai faamanuiaga o le Aso Sa o Tamā i tamā uma lava o Samoa i Aukilani, auā o le faatinoina lava lea o faamoemoe i totonu o le G-Mana, e saunoa le afioga i le Masiofo a le Ao o le Malo e momoli faamanuiaga mo tamā pe a oo i le Aso Sa o Tamā, ae a oo i le Aso Sa o Tina ona saunoa faamanuia lea o le afioga i le Ao o le Malo ia Tuimalealiifano Vaaletoa Sualauvi II.
