“O se faanoanoaga tele lea i le faamasinoga”..Vui Clarence Nelson
Ua molimauina e le Faamasinoga Maualuga a le atunuu e lē o faaitiitia ae ua taatele ma faatupulaia pea solitulafono tau feusuaiga e aafia ai fanau teine ona o gaioiga a o latou lava tamā moni.
Ua o se fagogo tagiao lenei solitulafono inosia i fofoga o le atunuu peitai e lē o natia le tulai mai pea e ui ina iai polokalame ma taumafaiga e taofia ai.
O le vaiaso nei na agiga ai i luma o le faamasinoga se isi solitulafono tau feusuaiga fai faamalosi ua faamaonia na faia e se tamaloa ua 43 tausaga lona matua na aafia ai lona lava afafine moni. O le sefulu fitu o tausaga o le afafine na aafia ai i le gaioiga a lona tamā.
“O se gaioiga lenei ua gausia ai le faatuatuaga ma le talitonuga o le teineititi i lona lava tamā moni”, na saunoa ai le alii faamasino le afioga Vui Clarence Nelson.
O le matuia ma le ogaoga o le solitulafono na faamatalaina ai i le lipoti a le ofisa faanofo vaavaaia e faasino i aafiaga o le teineititi e faapea, ua matuā lē toe fia vaai lē na aafia i lona tamā, faapea foi se lagona ua fiafia ina ua lē toe mafuta faatasi i latou ma lo latou tina ma le tamā o le aiga talu ona aliali mai le solitulafono.
O tausaga ua alu ma nisi o mataupu faapenei ua mae‘a tagofia e le faamasinoga, e leai lava se faasalaga ua ese ai, na o le falepuipui mo ni tausaga se tele. Faaalia e Vui Clarence Nelson o le umi o tausaga mo se tamaloa e faia se faiga aiga fai faamalosi poo se faaoolima matagā i sona lava afafine moni, o loo momoli ai se feau tāua ina ia taofia aemaise o se feau mo i latou o faamoemoe e faia, e leai se avanoa mo latou o le falepuipui lava pe a faamaonia.
O le tamaloa 43 tausaga sa ia teena moliaga uma o le faiaiga faamalosi ma le faaoolima matagā, peitai e nao le lua moliaga o le faaoolima matagā na faamaonia ma le moliaga e tasi o faiaiga fai faamalosi ae soloia uma isi moliaga e 4 ona ua lē mafai ona faamaonia.
O le faaiuga lenei ua suia ai e le faamasinoga le iuga na taunuu i ai le iloiloga a se laulau o faatonu na faamaonia uma ai moliaga.
O le malosiaga faaletulafono o le faamasinoga ua lē talia ai se vaega o le iuga a le laulau o faatonu, ae faaaogā na o le iuga mo moliaga e tolu, tasi le faiaiga fai faamalosi ae lua le faaoolima matagā.
E 15 tausaga na faasalaina ai lē ua molia peitai ua toesea le 11 masina sa nofo taofia ai i le vaaiga a leoleo a o faagasolo suesuega ma le faamasinoga, ma le tausaga e tasi ona o le faato‘ā molia lea o le tamā i se solitulafono.
Ua totoe ai tausaga e 13 ma le masina e tasi ua avea ma ona faasalaga faafalepuiupui. Sa talia e le faamasinoga le faamatalaga a lē ua molia e faapea sa ‘onā i se fagu voka ma ni fagupia le mafuaaga na ia faia ai le solitulafono.
Peitai o le saunoaga a le faamasino, e lē o se ‘alofaga le ‘ona i le faia o le solitulafono.
