O loo iai lava se fuafuaga mo le tuufaatasia o se lotu faamanatu e manatua ai aiga ma uo pele sa toesea faafuasei ona o le mala faalenatura sa aafia ai Samoa i le tausaga talu ai.
O le masina lenei e atoa i ai le tasi le tausaga talu ona tupu lea foi vaaiga matautia i le atunuu.
O le faia o se lotu faamanatu, sa iai lava le faamoemoe o le sui o le malo le afioga i le Konesula i Aukilani, Faolotoi Reupena Pogi, faapea le Hai-Komesina i Ueligitone, le afioga ia Tuiataga Asi Blakelock, faatasi ma taitai o le komiti ina ia faataunuuina. O le ala lea o loo faatumauina ai pea lea faamoemoe e lē o mafai ona aveesea, ona e tāua tele le faia o se sauniga faamanatu. E lei mafai ona maua se feiloaiga ma le Konesula o Samoa, talu ai o loo toesea mo fuafuaga faalemalo, ma o loo iai pea i le atunuu i Samoa. Peitai sa maua se feiloaiga ma le susuga i le faafeagaiga, Asora Amosa, o le taitaifono o le komiti sa tuufaatasia ma faatinoina le sauniga o le Tsunami i le tausaga talu ai.
Sa ta‘ua ma faamaonia mai e Asora, e moni o loo iai lava le faamoemoe mo le faia o se lotu faamanatu, ma e lē tatau foi ona toe solomuli le komiti i saunoaga ma faamatalaga sa faamatuuina muamua. Faaalia e Asora, e tatau ma e lē o aveesea foi le tāua tele o se sauniga faapea e faia, ona e tele ona itu e tāua ai.
E ui lava ina faapea ua atoa le tausaga talu ona tupu lea faalavelave matautia, peitai o loo olaola pea manu‘a ma lagona mafatia ona o soifua sa maimau ma avesea atu ai.
O le agaga o le tiga faatasi, ma le tutufaatasi i taimi o faanoanoaga, atoa ai ma se faamafanafanaga mai le agaga o le Atua e auautetele ai le agaga ma le autū o lea faamoemoe pe a faataunuuina.
Sa fesiligia foi le susuga i le faafeagaiga, poo fea se vaega o Aukilani o loo fuafuaina e faataunuuina ai lea sauniga, pe afai ae mautu sona faaiuga e faia pea. O le saunoaga a le auauna sa ia faailoa ai, sa iai lava le talanoaga e faaaogāina le fale tele o le Pasefika i Manukau, le Telstra Clear, ona e iai foi mafuaaga talafeagai.
O le toatele o tagata ma le mamalu o le atunuu e alaala ma papaaao i Aukilani i Saute, ma o se avanoa tāua foi lea e amanaia ai le toatele o le atunuu o loo i lea foi itu o le aai. E lē gata foi lea, o le lotu sa faia muamua, sa faataunuuina i le itu i sisifo, ma e ao foi ina faapaleni ma tuu faafeagai ma le nofoaga sa faaaogāina muamua, atonu e fetaui lelei foi mo finagalo o tagata uma.
E iai le faamoemoe o le a maua se tonu maumaututu, i le aso ma le taimi e faataunuuina ai lea faamoemoe tāua tele mo Samoa, e manatua ai pea le toatele o i latou sa maliliu, aemaise le tele o le tamaoaiga ma meatonino sa faaleagaina talu mai le Galulolo o le 2009.
