Ua fuafua le aiga o Pauli Sanele le alo tama o le tina o Pauli Falefia o loo finau mai o latou ua iai le pule o le maketi tuai i Salelologa, e faatu se pisinisi a le aiga i le vaega o iai le maketi tuai, o se faleoloa.
O le molimau lea a se tasi o molimau e vavalalata sootaga ma le aiga le tamaitai o Simolo Te‘o.
“O le fuafuaga lena ua leva ona fuafua mai o se faleoloa”.
O le taimi nei e lē o faaaogāina le nofoaga e le kamupani o le Pure Pacific mo le teuina ai o fua o le laau o le nonu o loo fuafua e faatau i Saina.
Ua faailoa e le tina o Pauli Falefia i luga o le alaleo leitio o le Talofa FM, le faasāina o soo se tasi ona toe solia le fanua ma le fale poo le maketi tuai ua tulai mai ai le feteenaiga ma se vaega o le aiga sa Pauli, ina ua sainia se maliega e nisi o matai ma sui o le kamupani o le Pure Pacific latou te faatauina ai le fale ma faaaogā e teu ai le nonu.
Faaalia e le molimau o Simoilo Te‘o, ua lē mautonu sui o le kamupani i le tulaga ua aliali mai ae ua uma ona tuuina atu le lima sefulu afe, le tau o le maketi i Salelologa i aao o Pauli Apelu ma nisi o matai na auai i le sainiga o le maliega a o molimauina e le tamaitai loia o Ruby Drake ma sui o le kamupani o le Pure Pacific.
E lei manuia sailiga i le fia maua o le susuga Masuisui Junior Pereira le pule o le Pure Pacific i se tulaga ua oo i ai le latou osiga feagaiga e ala i le maliega ua mamulu ai le lima sefulu afe, ae ua faaalia e Simolo Te‘o, o le toe faafoiina o le tupe e leai se latou pisinisi i ai, ae o le tulaga e tatau ona iai, o le toe faafoi o le seleni e matai na tauaao i ai le tau o le maketi.
Faaalia e Simolo na latou maua faamatalaga e lei faamaonia e faapea e selau afe le tau atoa o le fale, ae e lē o iloa e latou poo fea le isi lima sefulu afe, pe afai e na o le isi ‘afa ($50,000) lea na faatino ai le fefaatauaiga ma nisi o matai o le aiga sa Pauli.
O loo iai se molimau e faapea o le eleele o loo iai le maketi tuai o se meatotino a le Malo o loo i lalo o le pulega a le Faalapotopotoga o eleele o Samoa le Samoa Land Corporation, peitai o loo finau mai Pauli Falefia o le fanua ua avea ma meatotino a lo latou aiga.
E lē o mafai ona faamaonia lea tulaga i le taimi nei ae na pau le faamatalaga na tuuina mai i le kamupani na faatauina le maketi tuai i Salelologa, o le fanua o loo faia i ai feutanaiga ma le Matagaluega o Punaoa Faalenatura ma le Siosiomaga mo le lisiina.
