E na o le lima aso sa iai i Samoa le alii fomai vai faanatura mai Ausetalia o Will Shannon ma lana aumalaga e toatolu, ae faaosofia ona lagona e fia faatuina i Samoa se isi ana auaunaga o se falemai mo vai faanatura, e agai i ai tagata e vaai o latou gasegase ma maua mai ai vai e gaosia i lau ma aa, faapea fua o laau o le vaomatua.
O se auaunaga e lei oo muamua mai i Samoa, ae ua tautino le alii fomai e 6 i le 12 masina o le a tapena ai lenei faamoemoe ona tino mai lea. O le manaomia tele o lenei ituaiga o auaunaga faalesoifua maloloina i Samoa na faailoa i le alii fomai i ni ana feiloaiga ma le Minisita o le soifua maloloina ma le afioga i le Palemia a o iai le alii fomai o Will i Samoa i le vaiaso ua mavae.
O le manaomia tele o lea foi auaunaga tau soifua maloloina na molimauina i le lolofi atu o le faitau selau ma selau o tagata mai lava i faafeagaiga ma faletua o faifeau e oo i tagata faigaluega ma le lautele o le atunuu aemaise o tamā ma tina matutua faapea ma fanau e fia maua le avanoa e siaki ai e le alii fomai ma aumai ni a latou vai.
O le naunau tele o le atunuu e fia maua se avanoa e tiga ona oo i le valu i le po e lē faafiti i le faatali pea o se avanoa e oo ai i le alii fomai o Will Shannon. Na oo lava foi ina tau vevesi ai nisi ma tuua‘ia le faasologa o tagata e vaai le alii fomai, ina ua o atu lava isi faasasa‘o loa i le fomai ae ua leva ona saofafai ma faatali o latou avanoa.
Na maua lava le onosai o le toatele e ui ina sa iai ma ia foi ituaiga o tagata e oso faalava e tiga ona silafia faatoa oo atu, ae manao lava e fia muamua i le fomai.
O le Aso Toonai na tea nei le aso mulimuli na vaaia ai le atili lolofi atu ai o tagata i le maota poo le hall a le ekalesia Assembly of God i Lotopa ma saili avanoa pea i le alii fomai o Will. O le avanoa foi lea na saofia ai ma se 15 minute sa tauofiofi o le tusitala e fia fesiligia ai le alii fomai.
Na matuā fiafia le alii ma ia faailoa o le falemai tuma‘oti ua tapunia ae ua i lalo o le Malo le Medcen i Vailima, o le a faatu ai le falemai o vai faanatura. O le a faatu ai ma se nofoaga e faapitoa i le palu ma le suiina o vai faanatura. O se kolisi e aoao ai tagata e fia maua lea tomai o le a faatuina ai foi.
Ua taliu nei le alii fomai i Ausetalia mo le faia o tapenaga uma e tuuina atu i le Malo mo lona faamoemoe ia faatu le falemai o vai faanatura e avea ma nofoaga mo atunuu o le Pasefika e malaga mai i ai e saili fofo i gasegase o le tino.
