Ua faaopoopoina pea le faitau aofai o tagata o le atunuu ua faatau fanua i Vaitele ma ua siitia ai ma manaoga o lea toatele i ni auaunaga e tuuitiitia ai le tau malaga mamao mai i Apia o loo tapuvae tasi i ai le tele o auaunaga ma tautua e lē gata i le Malo ae o pisinisi tumaoti.
O le mafuaaga lea o se fuafuaga a le malo e ala mai i le matagaluega o le soifua maloloina, ina ia fausia se isi falemai i Vaitele ina ia faaitiitia ai le lolofi atu o gasegase i le falemai autu o le Malo o loo i Motootua.
O loo iai nei le tautua a le falemai tumaoti o le Medcen i le nofoaga ua faatutu ai fale gaosi oloa ma pisinisi i Vaitele peitai, e lē o toatele nisi o faaaogāina ona e fai si taugata pe a fua i le auaunaga faalesoifua maloloina o loo ofoina e le malo.
Faaalia e le minisita o le soifua maloloina, o se isi lea atina‘e o loo silasila i ai le Malo e tatau ona faatino, ona e lē gata e vavae i ai le toatele o le ‘au gasegase, ae o le lata foi mo tagata mai nuu e tau mamao ma le falemai autu o Tupua Tamasese Mea‘ole i Motootua.
