Ua iai le manaoga o Leoleo e faalautele lana auaunaga i le atunuu e pei ona iai nei se fuafuaga e tatala nisi lala i vaega eseese o Samoa.
E ese mai i ona ofisa autū i Apia aemaise foi Tuasivi i le Motu tele i Salafai, ona pau le tele o lala o loo iai nei o loo i itumalo e pei o le atu Aleipata lea e i Lalomanu, o le lala o loo i Poutasi i Falealili, o le Malaevaalele i Faleolo, ma le Maketi i Fugalei ma le lala fou lea e lei leva nei o na tatala i Faleata.
O le lala lea e i Faleata ua vaaia le matuā tele o le fesoasoani i galuega faatino a le Ofisa Tutotonu i Apia.
Faaalia e le Alii Komesina o Leoleo Lilomaiava Fou Taioalo, o lenei lala ua toeitiiti lava vaelua i ai le tele o le galuega i Apia ona ua tapa lava e i latou o loo i Faleata ma nofoaga tuaoi le fesoasoani nai lo le tau tuli mai o le ofisa i Apia.
“O le vaavaai mamao lea a le Matagaluega ina ia gafatia e le Matagaluega o Leoleo le tali atu i manaoga o le mamalu o le atunuu ma o nisi o lala fou o le Ofisa o Leoleo o le a aofia ai Lufilufi, Afega, Lefaga ma se isi lala se tasi i le motu tele i Salafai”, o se faaaliga lea a le Alii Komesina o Leoleo.
Faaalia e Lilomaiava Fou, i Faleata lava ia, ua maua ai e latalata lava i le 40 tagi ma mataupu mo Leoleo o loo faatoai atu i ai i vaiaso taitasi ma o le tele lea sa masani ona aumai atoa lava i le ofisa o leoleo i Apia, ma o le faaopoopo o le numera o leoleo ua mafai ai ona faatino nei galuega sa tele le taimi na tau faatali le atunuu mo se tali.
O le faatupega o le faaopoopoga lenei o lala o Leoleo, ua faaalia e le Alii Komesina ua faatupe i le fesoasoani o loo maua mai i galuega fesoasoani a le Matagaluega o Leoleo a le Malo o Ausetalia lea o loo feagai ma le faatautaiga o le tele o suiga o loo feagai ma le Matagaluega o Leoleo ma Falepuipui i Samoa nei.
Tele taimi o leoleo e alu i mataupu e lē oo i le Faamasinoga
Na tapa foi le ofisa o leoleo ona ua faatuputupulaia foi mataupu ua tapa ai e le atunuu le fesoasoani a Leoleo ae e lē o ni mataupu e oo atu i le Faamasinoga.
E silia i le 70 le numera o talosaga e oo atu i Leoleo i vaiaso taitasi, ma o se tulaga na ta‘ua e le matagaluega e tele le taimi, tele foi le tupe e alu ai a le Matagaluega, ae e lē o iai se fesoasoani e mafai ona lagolagoina Leoleo i nei faafitauli.
“O le matuā tele o le taimi ae o le tele lava o ia faafitauli e mafua mai ona ua lē mafai e aiga ma mātua ona taofiofi le faasuaava o fanau poo tamā foi o aiga ua onā atu ma faamisa i tina poo tuaoi foi.
O le tele lava o taimi e toe faaleleia ae e lē oo i le Faamasinoga, ma o le taimi lea e alu e tau faafilemu ai le toatele lenei o le matuā tele lava.
O le tele foi o le atunuu e iai le manatu foi lea o Leoleo e iai potu e faamomoe ai onanā ae e leai ni auaunaga faapea e faamomoe ai onanā ma toe tutuli i o latou aiga i le aso e sosoo ai, ae e fai lava ona o le taumafai e faatupu pea le filemu ma taofia ai nisi faafitauli tetele atu e ono tulai mai,” o se faaaliga lea a le alii komesina o Leoleo, Lilomaiava Fou Taioalo.
“Ua mautu le vaega o loo feagai ma sauāga i totonu o aiga, ae o tagi la ia o loo unaia lava e tatau ona faamautu tagi poo talosaga ina ia oo ai i le Faamasinoga, ae o auaunaga lautele nei e lē oo lava i le Faamsinoga auā e uma loa le vevesi toe talosaga mai e toe tatala i tua tagi ma talosaga, ma e fautuaina lava le atunuu ina ia iloilo lelei lava faaiuga fai a o lei oo i le Faamasinoga auā o le taimi lenei e fai loa le tagi e faigata tele ona toe tatala i tua ae e pei foi lele o le ita lava e vave ai ona oo mai tina ma tamaitai aemaise o aiga ina ia taofi ai se sui o le aiga ua faigata, peitai e sauni atu loa o le a faaauau le mataupu ona toe tapa mai foi lea e toe tatala i tua.
E tele lava la le galuega ua faatino i le taimi nei a’o lei faamautu mai tagi e ave i le Faamasinoga.”
Na fesiligia le alii Komesina o Leoleo, pe faapefea le fesoasoani a pulega a alii ma faipule ma na faaalia e Lilomaiava o loo iai le fesoasoani ae e pei ona ta’ua o auaunaga lautele, o mataupu laiti ma e tele lava ina tulai mai i totonu o aiga ae o mataupu ogaoga o loo tulai mai i totonu o afioaga o loo malosi ai le lagolago lea a pulega a nuu taitasi.
