“Faigata le lagolago a nisi faipasi, e popole i laisene o pisinisi”
O loo faaluafesasi mafaufau o nisi o le au faipasi i Upolu pe lagolago i le latou mau e tetee i le suia o le itu e tutu ai faitoto’a o a latou pasi ma taofi malaga uma a pasi mo le masina, ina ia faailoa ai lo latou te’ena o le fuafuaga a le Malo.
O le fono a le aufaipasi i Upolu i le Aso Lua ua mavae na taumafai ai e faamautu le latou ioega muamua e tetee i le suiga o le itu e tutu ai faitotoa o a latou taavale ona e taugata, ma e faaitiitia ai le malosi atoatoa o le pasi mo le saogalemu o tagata malaga.
Peitai na faaalia e se sui o le au tetee i le suiga o le itu auala le PASS, sa fautuaina ai e le alii loia sa avea ma taitaifono le afioga Toleafoa Solomona Toailoa le sosaiete e toe silasila lelei i le latou tusi o le a ave i le Minisita o Pulega o Femalagaiga i luga o le Laueleele pe o talafeagai ma malosi le latou mau ina nei afaina ai a latou laisene pisinisi.
Faaalia e lea sui o le PASS e faigata tele i nisi o le au faipasi ona atoatoa le latou lagolago i se fuafuaga e taofia faigamalaga ma le toe lauina ai o pasese mai nuu ma afioaga o loo laisene ai ona e ono aveesea ai a latou laisene ma faaletonu ai loa ma a latou pisinisi.
“O le itu faigata lena o loo mamafa i nisi sui, ona a taofia loa malaga a pasi mo se masina atoa e faaali ai le tetee ona faaono aapa lea o le Malo e sei laisene o pasi, ma sei atu ai ma laisene o a latou pisinisi”, o le finagalo lea o se tasi o faipasi ua le manao e faailoa lona suafa.
O le matau a le tusitala o lenei nusipepa na maua le avanoa e fesiligia ai se sui sa auai i le fono, ona sa toe tutuli i fafo se vaega o le au tusitala na ulufale i le fonotaga e le mafai ona faafofoga i taualumaga o le mataupu, e iai sui o le sosaiete e lagolagoina le vaega faaupufai o le HRPP.
O sui ia o loo faaluafesasi o latou finagalo i le taofia o malaga a pasi i le masina atoa pe afai o le taunuuga lea o se faatofalaiga a le sosaiete.
O le matau foi a le tusitala i le fonotaga sa auai ma sui o le Komiti o le au tetee i le suiga o le itu auala le PASS, ma ua fesiligia ai le lotolotoi o lea komiti i le unaia o le sosaiete e tetee atu i le fuafuaga a le Malo.
Peitai na faaalia e se sui o le PASS e le o manao e faasalalau lona suafa e leai se aafiaga o le latou faalapotopotoga i le fuafuaga a le sosaiete, ae ua mafua ona faatasi ai i le fonotaga a le au faipasi ona o le fia ave o ni fautuaga.
O fautuaga ia na le mafai ona faailoa e le alii loia o Toleafoa Solomona Toailoa, ina ua fesiligia e le tusitala o lenei nusipepa.
“E le mafai ona ou tauina atu le tulaga lena”, o le tali mai lea a le alii loia ae sa ia le mafai ona aumai ni mafuaaga o le le mafai ona faailoa o mafuaaga.
O le asō, Aso Gafua 31 o Aukuso 2009 o loo toe alu ai se isi solo tetee a le PASS i le Malo e saga faamautu ai le latou tetee i le suiga o le itu auala o le a feoai ai taavale i Samoa e amata i le aso 7 o le masina o Setema 2009.
O le Aso Lulu 26 o Aukuso 2009 na faatoa maua ai le finagalo autasi o le sosaiete ma ave ai loa le latou talosaga i le Minisita o Galuega o loo iai ma le vaaiga a le Pulega o felauaiga i luga o le laueleele.
Ua faaopoopo i le talosaga ma se manaoga tau tupe o le sosaiete e faatupe ai le suiga o faitotoa. E $50 afe e sui ai le faitotoa o le pasi laupapa e tasi, ae $80 afe mo le faitotoa o le pasi faamalu (ready made bus).
O loo faatalitali pea le sosaiete a le au faipasi i Savaii i le latou talosaga na muamua e $50 afe e sui ai foi le faitotoa o le pasi laupapa e tasi.