Ua sauniuni nei le Malo a le National e faaofi i le Palemene se tulafono fou e tatala ai le avanoa i pisinisi ma kamupani tumaoti latou te pulea ai le vaaia o Falepuipui a le Malo. Ua saunoa le taitai o le Malo o se faiga paaga a le Malo ma kamupani tumaoti o se tulaga taua lea mo le agai i luma o le faafoeina o falepuipui.
Ae talitonu le taitai o le vaega faaupufai o le Leipa, le alii o Lilomaiava Phil Goff, o lea laasaga e le faaitiitia ai i latou e solitulafono, ae o se auala e atili tele ai tupe o le a maua e kamupani ma pisinisi tumaoti, ma e ono tulai mai ai ni faaletonu ona o faiga faapaaga a le Malo ma nei kamupani ma pisinisi tumaoti.
E silia atu ma le $680 miliona tala le tupe a le Malo ua fuafua e faaaoga i le tausaga 2009 aua le tausiga o falepuipui o loo nofosala ai ni pagota e 8,000 i Niu Sila. Ou te manatu o lenei vaega tupe ua fuafua le Malo ina ia foai i le aufaipisinisi ma kamupani tumaoti e ala i konekarate e latou te faafoeina ai falepuipui i Niu Sila.
Ae o se saunoaga a le alii loia o Peter Williams ua faapea ai, “E faafoe loa falepuipui e pei o se pisinisi, ona faigofie lea ona ofi atu ma faiga piopio ma faasolitulafono.”
Atonu o le popolega o loo ia Peter Williams o le mea na tupu mai Amerika lea na faasala ai ni alii faamasino e toalua ina ua faamaonia ua la talia se vaega tupe e sili atu ma le $4 miliona tala Amerika. O lenei tupe na totogi atu i nei faamasino e faasalaina ai i le falepuipui (o loo pulea e se kamupani tumaoti) le toatele o tupulaga na molia ma oo atu i le faamasinoga a latou solitulafono. Aua o le faiga o le konokarate faapisinisi o falepuipui, o le toatele o pogata e te vaaia, o le tele foi lena o le tupe e totogi atu e le Malo i lau pisinisi.
A o faagasolo le fuafuaga lea a le Malo, o loo taumafai foi le vaega a le ACT ina ia faaofi atu le tuuina o le pule i alii ma tamaitai faamasino e mafai ai ona faamamafa faasalaga e tuuina atu ia i latou ua solitulafono.
O loo taufaaofi atu e le ACT se tulafono e taua o le “3 Strikes Law”. O le uiga o lea fuafuaga afai e faatolu ona molia oe i se solitulafono mamafa, (e pei o le fasioti tagata) ona soloatoa lea i le falepuipui ma e le maua se avanoa i le palola (parole) sei vagana ua atoa le 25 tausaga i le falepuipui.
Fai mai le talitonuga a le ACT, o se faiga lea e faaitiitia ai amio solitulafono a tagata, ma o loo faatinoina e le atunuu o Amerika.
Peitai ane, o le fautuaga a le Matagaluega o le Va i Fafo ma Fefaatauaiga o loo fautuaina le Malo ina ia toe silasila toatoa ae lei laasia lea tulaga ona e ono faitioina ai Niu Sila e atunuu o Malo Aufaatasi, ona o nei tulaga e ono faaleaogaina ai aia tatau a pagota, e pei ona puipuia i Tulafono Faavaomalo. E pei o le maliega faavaomalo i le puipuiga o aia tatau a tagata taitoatasi faapea le maliega faavaomalo e taofia ai le sauaina ma le faataugaina o se tasi e ala i ni auala e le talafeagai ai ma se tagata soifua.
A tatou silasila foi i Amerika, e le o taliaina uma e setete o Amerika lea tulafono sei vagana ai nisi o setete e pei o Kalefonia. O le isi tulaga, e le o faaitiitia ai le fuainumera o tagata solitulafono. O le tulaga ua maitauina i setete o Amerika o loo mafai ai ona faafalepuipui faasoloatoa, ua avea ma tulaga ua atili ai ona le fefefe pagota ma ua matua fuli e fai le leaga ia.
A o le itu e pito i sili ona ou popole ona o setete o Amerika e pei o Kalefonia ua mamafa ai nei faasalaga, o setete nei e aupito i sili ona toatele ai tagata uli, ma tagata Mexico o loo falepuipui ai.
O lou popolega la i ia faiga, ona o le a matua afaina ai o tatou tagata. Atonu e faapea nisi, a solitulafono loa le tagata ave loa e loka i le falepuipui. Ae o le talitonuga a le toatele o tagata o loo tetee i ia faiga a le Malo ma le ACT, o nei tagata ua solitulafono o tagata soifua ma e tatau ona tausia o ni tagata soifua ae le o le fai e pei o le faiga o ni manu (sei tulou).
Afai e te tausi se tagata e pei o le faiga o se manu, o le a faapena foi ona amio le pulea ma atili ai ona leaga.
